“Yosh saylovchi” yoshlar forumi boʻlib oʻtdi

Yoshlarimizning mamlakat kelajagi uchun muhim boʻlgan siyosiy jarayonlarda faol ishtiroki katta ahamiyatga ega. Shuni eʼtiborga olgan holda joriy yil 27-oktyabr kuni boʻlib oʻtadigan Oʻzbekiston Respublikasi Oliy Majlis Qonunchilik palatasi va mahalliy kengashlar deputatligiga saylovlarda yoshlarning munosib ishtirok etishlarini taʼminlash, saylovda har bir ovozning mamlakat taraqqiyotida muhim ahamiyatini keng targʻib qilish maqsadida hududlarda “Yosh saylovchi” targʻibot loyihasi doirasida turli tadbirlar tashkil etilmoqda. Xususan, Amudaryo tumanida ham loyiha doirasida targʻibot tadbirlari tashkil etilib, ularga koʻplab yoshlar qamrab olindi.

Targʻibot loyihasi doirasida “Yosh saylovchining huquqlari” hamda “Yoshlar va saylov” uchrashuvi, ochiq muloqotlar tashkil etilib, ularda saylov jarayoni, uning ahamiyati, saylovchi huquqlari yuzasidan tushunchalar berildi. Tumandagi 82-sonli maktabning faollar zalida boʻlib oʻtgan yoshlar ishtirokidagi uchrashuv oʻquv-seminar tarzda tashkil etildi. Unda tuman Yoshlar ishlari boʻlimi boshligʻi Bekzod Oʻrinboyev soʻzga chiqib, yoshlarni yurtimiz kelajagiga, Vatan ravnaqiga befarq boʻlmaslikka, saylovda faol ishtirok etishga chaqirdi.

Shuningdek, saylov muhim siyosiy jarayon ekanligi, unda ishtirok etish har bir fuqaroning siyosiy huquqi hamda imkoniyati ekanligi, har bir ovoz yurtimizdagi islohotlarga taʼsir qilishi hayotiy misollar orqali tushuntirildi. Tadbirda saylovga oid videorolik namoyish etilib, yoshlarning bu boradagi bilimlari yanada mustahkamlandi. 

“Yosh saylovchi” targʻibot loyihasi asosida tuman Xotira maydonida yoshlar forumi tashkil etildi. Forum doirasida yoshlarning huquqiy savodxonligini oshirishga yoʻnaltirilgan interaktiv uchrashuvlar, qiziqarli viktorinalar oʻtkazilib, yoshlarning saylov jarayonlaridagi ishtiroki keng targʻib qilindi.

Qolaversa, yigit-qizlar uchun foydali boʻlgan "Yosh saylovchi" viktorinasi, "Zakovat" intellektual oʻyiniga oʻxshash "Ibrat farzandlari", "Mutolaa", "Qizlar akademiyasi", "Bilasizmi?" loyihalari doirasidagi oʻyinlar hamda "Besh tashabbus" musobaqalarida yoshlarning zukkoligi, topqirligi va epchilligi sinovdan oʻtkazildi.

Shuningdek, tadbir davomida yoshlarni zamonaviy kasblarga va xorijiy tillarga bepul oʻrgatuvchi loyihalar – “Ustoz AI”, “Uz Chess” kabi pavilonlar tashkil etildi. Bu loyihalar yoshlar oʻrtasida katta qiziqish uygʻotib, ularga professional va shaxsiy rivojlanish uchun keng imkoniyatlar taqdim etdi. Ayniqsa, birinchi marta saylovda qatnashayotgan yosh saylovchilarning eʼtiborini jalb qilish maqsadida loyiha taqdimotlari interaktiv tarzda oʻtkazildi. 

Bundan tashqari, yoshlarni harbiy vatanparvarlik ruhida tarbiyalash maqsadida tashkil etilgan harbiy qurol-aslahalar koʻrgazmasi ham ularda katta taassurot qoldirdi.

Tadbir davomida yoshlarning nafaqat siyosiy, balki umumiy bilimlarini ham boyitishga qaratilgan intellektual bellashuvlar tashkil qilindi. Ayniqsa, “Siz bilasizmi?” deb nomlangan viktorinalar yoshlarning huquqiy savodxonligini oshirishda muhim ahamiyat kasb etdi. Viktorinalar gʻoliblariga qimmatbaho sovgʻalar topshirildi. Yoshlar oʻzlarining fikr va mulohazalarini bildirar ekan, saylov jarayonlari toʻgʻrisidagi koʻplab savollarga huquqiy jihatdan batafsil javob olishdi. Viktorina va intellektual oʻyinlar nafaqat yoshlarning, katta yoshli kishilarning ham huquqiy bilimlarini oshirishga yordam beradi.

“Yosh saylovchi” yoshlar forumi tuman Madaniyat boʻlimi tomonidan tayyorlangan gala kontsertga ulanib, yuqori kayfiyatda davom etdi. Gala kontsertda tumanimizning isteʼdodli xonandalari, estrada ijodkorlari oʻzlarining shoʻx-shodon kuy-qoʻshiqlari bilan ishtirokchilarga bayramona kayfiyat ulashdi. Xonandalar Vatanni madh etuvchi, yoshlik, goʻzallik, doʻstlikni tarannum etuvchi kuy-qoʻshiqlar ijro etdilar. 

Oʻtkazilgan forum nafaqat yoshlarning huquqiy bilimlarini oshirishga, balki ularda milliy gʻurur va vatanparvarlik tuygʻularini mustahkamlashga qaratilgan madaniy-maʼrifiy tadbir sifatida ham muhim ahamiyat kasb etdi.

Charos Arslonova, tuman hokimligining Axborot xizmati rahbari.