DAVLATBIKA RAJABOVA – FOLIB!
Har kuni erta tongda oʻrnimizdan turib, eshigimizni ochsak, nigohimiz qoʻshnilarimizga tushadi. Ular bilan salomlashib, omonlik soʻrashib xotirjam uyimizga kiramiz. Bizning qon-qonimizga singib ketgan bu odatimizda ota-bobolarimizning asriy qoʻni-qoʻshnichilik, mahalladoshlik rishtalari mujassam ekanligini oʻzimiz ham sezmaymiz. Aslida esa qoʻshnilarimizning, ana shunday koʻnglimizga yaqin insonlarimiz istiqomat qiladigan mahallamizning tinch-osoyishtaligi - har birimizning tinchligimiz, osoyishtaligimizdir.
Bugungi kunda ovul, mahallalarda sogʻlom turmush tarzini barqarorlashtirish, aholi orasida hukumatimiz qarorlarining mazmun-mohiyatini keng tushuntirish, ishsiz, ishga yaroqli aholining ish bilan bandligini taʼminlash, umummilliy qadriyatlarimiz, anʼanalarimizni keng targʻib etish, oʻsib kelayotgan yosh avlodni sogʻlom, ona Vatanimizga munosib vorislar qilib voyaga yetkazish, aholi orasida yaqin qoʻshnichilik, mehr-oqibat tuygʻularini tarbiyalash va bardavom boʻlishiga erishishda ovul-mahalla fuqarolar yigʻinlari maslahatchilarining xizmati alohidadir.
Ha, ular bugun oʻz hududlaridagi istiqomat qiluvchi oilalarning yaqin sirdoshi, lozim boʻlsa, yoʻl-yoʻriq koʻrsatuvchi maslahat-goʻyiga aylanishgan. Bolalar dargohlari, umumtaʼlim va kasb-hunar taʼlimi muassasalari muammolariga ham oʻzini daxldor deb bilib, yechimiga ustozlar bilan birga bel bogʻlaydi ular.
Bular yaqinda tuman madaniyat uyida boʻlib oʻtgan fuqarolar yigʻinlarining "Eng namunali diniy maʼrifat va maʼnaviy ahloqiy tarbiya masalalari boʻyicha maslahatchisi” koʻrik tanlovida ham yaqqol aks etdi.
Tuman xotin-qizlar qoʻmitasi va "Mahalla” xayriya jamoat fondi tuman boʻlinmasi tomonidan tashkillashtirilgan ushbu tadbir xuddi bayram tusini oldi. Gʻoliblik uchun bellashgan maslahatchilar 3 ta shart boʻyicha oʻzlarining mahoratlarini namoyish etdilar. Dastlab ularning faoliyatlariga doir hujjatlari, koʻrsatkichlari bilan hakamlar hayʼati yaqindan tanishib chiqdilar.
Ayniqsa maslahatchilar ish faoliyati davomida duch kelayotgan muammolar, ular yechimini yoritish yuzasidan sahna koʻrinishi namoyish etish sharti juda hayajonli boʻldi.
Oxirgi shartda maslahatchilar oʻz ish faoliyatlariga doir savollarga javob berdilar.
Koʻrik-tanlov yakuniga koʻra Mangʻit shahridagi Navoiy nomli mahalla fuqarolar yigʻini maslahatchisi Davlatbika Rajabova birinchi oʻringa, "Toʻlqin” ovul fuqarolar yigʻini maslahatchisi Guljon Sapenova ikkinchi oʻringa, "Boʻzyop” ovul fuqarolar yigʻini maslahatchisi Gulzoda Koʻbayeva uchinchi oʻringa loyiq, deb topildi.
Shuningdek namunali faoliyat olib borayotgan, "Kuyuk koʻpir” ovul fuqarolar yigʻini maslahatchisi Tamara Karimova, "Qilichboy” ovul fuqarolar yigʻini maslahatchisi Raʼno Jumaniyozovalarga ragʻbatlantiruvchi mukofotlar topshirildi.
Asli kasbi kutubxonachi boʻlgan Davlatbika Rajabova 2004-yilda Navoiy nomli mahalla fuqarolar yigʻini maslahatchisi qilib tayinlangan edi. Oʻn yilga yaqin faoliyati davomida u koʻpchilikka ibrat boʻlib oʻz vazifasini ado etib kelayotir. Demoqchimizki, uning koʻrik tanlovda eng namunali maslahatchi, deb topilgani bejiz emas.
- Mahallamiz aholisining ogʻzibirchilikli, mehr-oqibatli ekanligi doim meni quvontiradi va dalda beradi. Munavvar opa Sodiqova, Farida opa Davletova, Oyjon opa Oʻrozboyeva, Tozagul opa Xudoyorova singari onaxonlarimiz doimo beminnat koʻmak berishadi. Bugungi namoyish qilgan sahna koʻrinishimizni ham qoyillatib ijro qilishdi va gʻolib boʻlishimga koʻmaklashishdi. Ularga suyanib yana koʻp rejalar tuzib qoʻyganman, - deydi D.Rajabova.
U oʻz suyanchiqlari – mahalla onaxonlari bilan mazkur tanlovning Qoraqalpogʻiston Respublikasi bosqichiga tayyorgarlikni boshlab yubordi.
Oygul RAJABOVA,
Komila SAGITOVA.
Suratda: D.RAJABOVA
M.ShOMURODOV olgan surat.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
