Turli yillar davomida yoshlar tashkilotlarida ishlagan sobiq hamkasblarning uchrashuvi boʻlib oʻtdi

Yoshlar taʼlim-tarbiyasi barcha davrlarda ham jamiyatning eng muhim vazifalaridan biri boʻlib kelgan. Kelajak avlodning bilimli, qatʼiyatli va jamiyatning faol aʼzosi boʻlib voyaga yetishi mamlakatning yorugʻ kelajagini belgilaydi. Oʻzbekistonda ham yoshlarning har tomonlama rivojlanishi, jamiyatdagi oʻz oʻrnini mustahkamlashlariga koʻmaklashish maqsadida turli tashkilotlar tuzilgan. Mustaqillikdan keyin turli davrlarda tashkil qilingan Oʻzbekiston Yoshlar ittifoqi va “Kamolot” Yoshlar ijtimoiy harakati hamda hozirda faoliyat yuritayotgan Yoshlar ishlari agentligi yoshlarni har tomonlama qoʻllab-quvvatlashda muhim vosita boʻlgan va shunday boʻlib kelmoqda.

Koʻp yillar davomida Amudaryo tumanidagi yoshlar tashkilotlarida faoliyat yuritib, ayni kunlarda nafaqada, keksalik gashtini surayotgan bir guruh kasbdoshlar va maslakdoshlar har yili yigʻilib, diydorlashishni odat qilishgan. Bu yil ham ushbu anʼana davom ettirilib, faxriylar Mangʻit shahridagi “Istiqlol” toʻyxonasida uchrashdilar.

Umrining navqiron yillarini yoshlar tarbiyasidek sharafli va mashaqqatli kasbga bagʻishlagan nuroniylar bugun ham jamiyat taraqqiyotiga hissa qoʻshishni oʻzlarining doimiy burchi va vazifasi deb bilishadi. Ular oʻz bilim va tajribalarini yangi avlodga oʻrgatib, yoshlarni yorugʻ kelajak sari ruhlantirishni, bu yoʻlda ularga ustozlik va murabbiylik qilishni oʻz oldlariga maqsad qilib qoʻyishgan.

Tadbirda “Nuroniy” jamgʻarmasi Amudaryo tuman boʻlimi boshligʻi Bekman Allaberganov, mehnat faxriylari, uzoq yillar yoshlar tashklotlarida turli lavozimlarda samarali faoliyat yuritgan Yangiboy Rajabov, Soliy Yoʻldoshev, Sobir Boltayev, Ozod Tojimurodov, Gulchehra Otaboyeva, Xonimjon Rajabova, Gulasal Oʻrozimbetova, Farhod Matkarimov va boshqalar tadbirda soʻzga chiqib, oʻzlari ishlagan davrlarni esga oldilar va bugun yurtimizda yoshlar uchun yaratilgan sharoitlar, ularga berilayotgan imtiyoz va imkoniyatlar haqida toʻlqinlanib soʻzladilar.

Uchrashuvda yoshlik davrlarining qizgʻin xotiralari, mashaqqatli mehnat yoʻllari va birgalikda oʻtkazilgan shonli kunlar yodga olindi. Doʻstlar davrasida hamkasblar va maslakdoshlar bir-birlari bilan olis yillarni eslab, saflarini barvaqt tark qilgan doʻstlari ruhiga Qurʼon tilovat qilishdi. Bu kabi diydorlashuv onlarida sobiq hamkasblar oʻrtasidagi samimiy doʻstlik va birodarlik tuygʻulari yanada mustahkamlangan boʻlsa, ajab emas.

Tadbirda sobiq Ittifoq davridagi Sovet Ittifoqi Kommunistik partiyasining yoshlar tashkiloti, yaʼni “Komsomol” safida ishlagan, bugun 70-80 yoshdan oshgan nuroniy otaxon va onaxonlardan tortib, bugungi kunda Yoshlar ishlari agentligida faoliyat yuritayotgan navqiron yoshlargacha ishtirok etishdi. “Avlodlar uchrashuvi” nomini olgan bu tadbir har bir ishtirokchida bir olam taassurotlar qoldirdi.

Tarixga nazar tashlaydigan boʻlsak, 1918-yilning xuddi shu sanasida, yaʼni 29-oktyabr kuni ishchi va dehqon yoshlar ittifoqlarining I Butunrossiya sezdi boshlangan. Unda Rossiya kommunistik yoshlar ittifoqi tashkil etilgan. Tashkilot keyinchalik Lenin kommunistik yoshlar ittifoqi, 1926-yil mart oyidan boshlab Butunittifoq Lenin Kommunistik Yoshlar Ittifoqi deb yuritilgan. Sobiq Sovet Ittifoqi parchalanib ketishi bilan komsomol tashkiloti ham tugatildi.

1991-1996-yillarda bu tashkilot oʻrnida Oʻzbekiston Yoshlar ittifoqi faoliyat yuritdi. Keyinchalik, 1996-yilda mamlakatimizning birinchi Prezidenti Islom Karimov Farmoni bilan “Kamolot” jamgʻarmasi tuzildi. 2001-yilda esa u “Kamolot” yoshlar ijtimoiy harakatiga aylantirildi. 2017-yilda “Kamolot” tugatilib, Oʻzbekiston Yoshlar ittifoqi tuzildi, keyin esa bu tashkilotning vazifalari yanada kengaytirilib, u Yoshlar ishlari agentligiga aylantirildi.

Ushbu tizimdagi tashkilotlarda faoliyat yuritib, ayni kunlarda nafaqada boʻlgan nuroniylar hozir ham kelajak avlod tarbiyasiga befarq emaslar. Ular oʻzlarining hayotiy tajribalari, bilimlari va ajdodlardan meros boʻlib kelayotgan milliy urf-odat va anʼanalarimizni yoshlarga oʻrgatishi orqali jamiyatning maʼnaviy-axloqiy asoslarini mustahkamlashga hissa qoʻshib kelmoqdalar. Qolaversa, oilaviy qadriyatlarni, oʻzaro hurmat va insoniylik tuygʻularini yoshlar oʻrtasida targʻib qilib, bu orqali yoshlarning maʼnaviy dunyosini boyitish, ularni oʻz hayotiy pozitsiyalariga ega boʻlgan shaxslar qilib tarbiyalashda ham jonbozlik koʻrsatmoqdalar.