55-sonli maktabda “Uch avlod uchrashuvi” nomli tadbir oʻtkazildi

Mamlakatimizda keksa avlod vakillarini eʼzozlash, ularga hurmat-ehtirom koʻrsatish milliy-maʼnaviy qadriyatlarimizdan biri sanaladi. “Qarisi bor uyning parisi bor”, “Keksalar – xonadonlarimiz farishtalari” kabi hikmatlar ham bejizga yaratilmagan. Chunki katta hayotiy tajribaga ega boʻlgan nuroniy otaxon va onaxonlarimizning oʻgit va nasihatlari, ularning duolari biz hayotda erishayotgan muvaffaqiyatlarimizning ilhomchisidir. Shu bois, pir-u badavlat otaxon va onaxonlarimiz hamisha xalqimiz hamda davlatimiz eʼzozida.

Oʻzbekiston Respublikasi Vazirlar Mahkamasining 2020-yil 28-maydagi “Keksalarni davlat tomonidan qoʻllab-quvvatlash tizimini yanada takomillashtirishning qoʻshimcha chora-tadbirlari toʻgʻrisida”gi Qaroriga asosan har yilning noyabr oyi yurtimizda “Keksalar uchun turizm oyligi” sifatida belgilangan.

Oylik doirasida keksa va nogironlarni qoʻllab-quvvatlash, ularning vaqtini mazmunli tashkil etish maqsadida turli ijtimoiy loyihalar amalga oshiriladi, mamlakatimizning diqqatga sazovor joylariga sayohatlar uyushtiriladi. Oylik davomida mamlakatimizdagi barcha tuman va shaharlardagi masʼullar ishtirokida sayohat qilish istagini bildirgan keksalar va nogironlar roʻyxatlari shakllantirilib, ularning mazmunli sayohat qilishlari uchun zarur sharoitlar yaratilmoqda. Bundan tashqari, ovul va mahallalarda, jamoat tashkilotlari hamda taʼlim-tarbiya muassasalarida koʻpni koʻrgan nuroniy otaxon va onaxonlar ishtirokida “Uch avlod uchrashuvi” tadbirlari tashkil etilib, unda yuzlab yoshlarning ishtiroki taʼminlanayotgani barchaga manzur boʻlmoqda.

Joriy yilning 14-noyabr sanasida Amudaryo tumani Maktabgacha va maktab taʼlimi boʻlimiga qarashli 55-sonli umumtaʼlim maktabida ham “Keksalarni eʼzozlash, ularga hurmat-ehtirom koʻrsatish – xalqimizga xos ezgu fazilat”, “Qahramonlar xotirasi mangudir” mavzularida maʼnaviy-maʼrifiy tadbir oʻtkazildi.

Tadbirda Amudaryo tuman Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari Zokirjon Saʼdullayev, Mudofaa Vazirligi faxriylari Endirboy Oʻrozboyev, Ilhom Yerdashev, Milliy gvardiya xodimi Nurlan Oʻrozboyev, Oʻzbekiston “Veteran” jangchi-faxriy va nogironlar birlashmasining Amudaryo tumani boʻlimi aʼzolari Mambatsoliy Abdullayev, Ozod Xoʻjaniyozov, Qadamboy Erimbetov, Anvar Qoʻshboyev, 55-sonli maktabning chaqiriqqa qadar boshlangʻich taʼlim rahbari Nurbek Oʻrozboyevlar hamda oʻquvchi-yoshlar ishtirok etdilar.

Tadbirda Mudofaa Vazirligi faxriylari Ilhom Yerdoshev va Endirboy Oʻrozboyevlar oʻzlarining jangovor harbiy xizmat davrlari, ona Vatan sarhadlarini himoya qilishdagi safdoshlarining mardlik va jasoratlari, shuningdek, Vatan himoyachisi boʻlishdek sharafli kasbning masʼuliyati xususida soʻz yuritib, Milliy Armiyamizning kuch va salohiyati toʻgʻrisidagi oʻquvchi-yoshlarni qiziqtirgan savollarga ham javob berdilar.

Tadbirning “Qahramonlar xotirasi mangudir” deb nomlangan qismida oʻquvchi-yoshlar Oʻzbekiston “Veteran” jangchi-faxriy va nogironlar birlashmasining Amudaryo tuman boʻlimi aʼzolari – sobiq Afgʻoniston urushi ishtirokchilari bilan dildan suhbat qurdilar.

Bundan 35-40-yil avval Afgʻoniston davlati hududida kechgan ayovsiz janglarda qahramonlik va mardlik namunalarini koʻrsatgan faxriy jangchilar bugun nuroniy yoshga yetishgan. Ular ayni paytda keksalik gashtini surayotgan boʻlishsalar-da, hamisha yoshlar davrasida, maʼnaviy-maʼrifiy suhbatlari orqali yosh avlodni Istiqlol gʻoyalariga, milliy-maʼnaviy qadriyatlarimizga daʼvat etib kelishadi.

Mazkur tadbirda ham sobiq faxriy-jangchilar Afgʻon urushida shahid ketgan amudaryolik qahramon yurtdoshlarimiz bilan bogʻliq xotiralari haqida yoshlarga soʻzlab berdilar. Shu bilan birga bugungi tinch-farovon hayotning qadriga yetish, Ona Vatanga munosib, bilimli, yuksak maʼnaviyatli insonlar sifatida kamol topishga intilib yashash har bir yoshning zimmasidagi burch va masʼuliyati ekanligini taʼkidladilar.

Tadbir davomida oʻquvchi-yoshlar nuroniy otaxonlarning oʻgit va nasihatlari, ularning jangovor faoliyatlari oʻzlari uchun ibrat va namuna boʻlajagini taʼkidladilar.

Samimiy ruhda, nuroniylar bilan dildan suhbat tarzida oʻtgan “Uch avlod uchrashuvi” tadbiri oʻzining maʼnaviy-maʼrifiy, tarbiyaviy ahamiyati bilan oʻquvchi-yoshlarda katta taassurot qoldirdi.

Robiya Yoʻldosheva.