Oʻzbekiston Respublikasi Davlat bayrogʻi qabul qilingan kun munosabati bilan bayram tadbiri boʻlib oʻtdi

Davlat ramzlari har bir mamlakatning mustaqilligini ifodalovchi muqaddas belgidir. Respublikamiz davlat ramzlari xalqimizning shon-sharafi, tarixiy xotirasi va intilishlarini oʻzida mujassam etib, tinch va osoyishta, ozod va erkin hayotimiz, yorugʻ kelajagimizga boʻlgan ishonchimizning ifodasidir. Davlat ramzlari qabul qilingan kun mamlakatimizda bayram sifatida keng nishonlanadi.

18-noyabr – Oʻzbekiston Respublikasi davlat bayrogʻi qabul qilingan kun munosabati bilan Amudaryo tumani Madaniyat boʻlimi binosida bayram tadbiri boʻlib oʻtdi. Tadbirda tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov soʻzga chiqib, bayrogʻimiz mustaqillik, ozodlik, tinchlik va barqarorlik timsoli ekanligini taʼkidladi hamda barchani bayram bilan samimiy tabrikladi.

Nodirbek Kamolov oʻz soʻzida bayrogʻimiz xalqimizning asriy orzu-istaklari, gʻayrati va shijoatini, xalqimizga xos mehmondoʻstlikni mujassam etishini, milliy bayrogʻimizning davlat idora va muassasalari, oʻquv yurtlari, Oʻzbekiston aʼzo boʻlgan xalqaro tashkilotlar, chet ellardagi elchixona va doimiy vakolatxonalarimiz peshtoqida hilpirab turishi, turli bayram va tantanalarda, mamlakatimiz vakillari qatnashayotgan xalqaro miqyosdagi siyosiy, madaniy-maʼrifiy tadbirlarda, nufuzli sport musobaqalarida Vatanimizning shaʼni, xalqimizning gʻururini yorqin aks ettirishi barchamizga iftixor baxsh etadi, deya taʼkidladi.

Darhaqiqat, xalqaro sport bellashuvlarida gʻalaba qozongan sportchilarimiz sharafiga yurtimiz bayrogʻi baland koʻtarilgan lahzada har birimiz cheksiz hayajonga tushamiz, hech kimdan kam emasligimizni his qilamiz.

Bayram tadbiri tuman Madaniyat boʻlimi tomonidan tayyorlangan kontsert dasturi bilan davom etdi. Tumanimizning isteʼdodli xonandalari Vatan, tinchlik, mustaqillik, istiqlolni madh etuvchi kuy-qoʻshiqlar ijro etdilar hamda tadbirga yuqori bayramona ruh baxsh etdilar.

Qayd etish joizki, Davlat bayrogʻi Oʻzbekiston Respublikasining 1991-yil 18-noyabrdagi “Oʻzbekiston Respublikasining Davlat bayrogʻi toʻgʻrisida”gi Qonuni bilan tasdiqlangan. Davlat bayrogʻi Oʻzbekiston Respublikasi davlat suverenitetining ramzidir. Oʻzbekiston Respublikasining Davlat bayrogʻi xalqaro munosabatlarda Oʻzbekiston Respublikasining timsoli boʻladi.

Bayrogʻimiz oʻzida butun Oʻzbekiston sarhadida qadimda mavjud boʻlgan davlatlar bilan tarixan bogʻliqlikni hamda yurtimiz hududida yashovchi millat va elatlarning anʼanalarini mujassamlashtirgan.

Bayroqdagi moviy rang – uning ostida barcha millatlar turli xil xavf-xatarlardan xoli, emin-erkin holda ahil-inoq yashab kelayotgan musaffo osmonimiz hamda obi hayot ramzidir. Bu rang – davlatimiz fuqarolarining oʻzaro hamjihatlikda, bir-birini hurmat qilib, diniy bagʻrikenglik tamoyillari asosida tinch-totuv yashayotganining timsoli. Yashil rang esa tabiatning yangilanishi hamda yurtimizning jannatmonand ekanligi ramzidir. Bu rang koʻpgina xalqlarda navqironlik, umid va shodumonlik timsoli hisoblanadi. Qizil chiziqlar davlatimiz farovonligi, jamiyat taraqqiyoti yoʻlida oʻzaro hamjihatlik bilan hormay-tolmay mehnat qilayotgan yurt farzandlarining vujudida oqayotgan hayotiy qudrat timsolidir.

Davlat ramzlari hamisha muqaddas va ulugʻ sanaladi. Chunki u xalqning oʻtmishi, buguni va kelajagini oʻzida mujassam etgan Vatanning yorqin timsolidir.

Davlat bayrogʻi qabul qilinganligining 33 yilligi munosabati bilan tashkil etilgan bayram tadbiri yuqori bayramona ruhda hamda taassurotlarga boy tarzda oʻtdi.

Charos Arslonova, tuman hokimligining Axborot xizmati rahbari.