10-dekabr — Oʻzbekiston Respublikasining Davlat madhiyasi qabul qilingan kun

Oʻzbekiston Respublikasi Davlat madhiyasining matni va musiqasi Oʻzbekiston Respublikasining 1992-yil 10-dekabrdagi “Oʻzbekiston Respublikasining Davlat madhiyasi toʻgʻrisida”gi Qonuni bilan tasdiqlangan.

Ushbu Qonunning 2-moddasida “Oʻzbekiston Respublikasining Davlat madhiyasiga zoʻr ehtirom bilan qarash Oʻzbekiston Respublikasi har bir fuqarosining vatanparvarlik burchidir”, deb belgilab qoʻyilgan Davlat suvereniteti ramzi boʻlgan madhiya matni Oʻzbekiston xalq shoiri Abdulla Oripov tomonidan yozilgan.

Unga Oʻzbekiston xalq artisti Mutal Burxonov musiqa bastalagan. Oʻzbekiston Respublikasi davlat madhiyasi mustaqillikka eʼtiqodni targʻib qiladi. Uning matni fuqarolarimizni mustaqil davlat qurish yoʻlida matonat va jasoratga, sabr-toqat va fidokorlikka, kurashga chaqiradi, milliy gʻururni uygʻotadi.

Madhiyamizni baralla ijro etarkansiz, uning mangu qoʻshiq ekanini yana bir karra anglaysiz. Sport musobaqalarida gʻalaba qozongan hamyurtlarimiz, harbiylar, hatto maktab ostonasiga ilk qadam qoʻygan bolajonlar, barchamiz bu qoʻshiqni qoʻlimiz koʻksimizda boʻlgani holda magʻrur aytamiz. Zero, madhiyamiz yurakdan chiqib, yuraklarga yetib boruvchi, jahon uzra baralla yangraydigan mangu, muhtasham taronadir. Unda shonli tariximiz, mehnatkash xalqimizning salohiyati, kuch-qudrati, maʼrifatparvar bobolarimizning orzu-umidlari, yurt istiqboli mujassam.

Shu kunlarda Respublika Maʼnaviyat va maʼrifat markazi tomonidan Oʻzbekiston Respublikasi Davlat madhiyasi qabul qilingan kun munosabati bilan yurtimizning barcha goʻshalarida bayram tadbirlari, maʼrifiy tadbirlar oʻtkazilmoqda.

Davlatimiz madhiyasi - tinch va osoyishta, ozod hamda erkin hayotimiz, yorugʻ kelajagimizga boʻlgan ishonchimiz timsolidir. Bizni va farzandlarimizni gʻalabaga undab turuvchi hayot qoʻshigʻimizdir! Vatandoshlarimizni Davlat madhiyasi qabul qilinganligining 32 yillik bayrami bilan samimiy muborakbod etaman. Oʻzbekiston farzandlari jahon arenalarida turib Vatan madhiyasini baralla kuylayversin.

I.Matkarimov, Respublika Maʼnaviyat va maʼrifat markazi Amudaryo tuman boʻlinmasi rahbari