Oʻquvchilar harbiy qismga tashrif buyurib, harbiylarning yashash sharoiti bilan yaqindan tanishdi

Mamlakatimizda yoshlarni vatanparvarlik ruhida tarbiyalash masalasiga alohida eʼtibor qaratilmoqda. Bu yoʻnalishda amalga oshirilayotgan ishlarning bir qismi sifatida, yoshlarning milliy Armiyaga boʻlgan hurmatini va muhabbatini oshirishga qaratilgan turli tadbirlar, shu jumladan, harbiy qismlarga tashriflarni misol sifatida keltirish mumkin. Shunday tadbirlardan biri 2024-yil 27-dekabr kuni Amudaryo tumanidagi harbiy qismda boʻlib oʻtdi.

Oʻzbekiston Respublikasi Prezidentining 2024-yil 12-dekabrdagi Farmoyshiga muvofiq, mamlakatimizda Qurolli kuchlarimizning 33 yilligi hamda “Vatan ximoyachilari kuni” bayramini yuqori saviyada nishonlash maqsadida turli tadbirlar oʻtkazish rejalashtirilgan. Bu tadbirlar yoshlarni harbiy xizmatga tayyorlashda muhim ahamiyatga ega boʻlib, ularning Vatanga muhabbatini kuchaytirishga xizmat qiladi.

Farmoyish ijrosini taʼminlash maqsadida harbiy qism maʼmuriyati tumandagi 80-sonli, 32-sonli va 33-sonli umumtaʼlim maktablari bilan hamkorlikda ishlab chiqqan ish rejaga asosan ushbu maktablar oʻquvchilarining Mangʻit shahridagi 9202-sonli harbiy qismga tashrifi koʻzda tutilgan.

Yangi yil bayrami arafasida uyushtirilgan tashrifning asosiy maqsadi – oʻquvchilarni harbiy qismdagi qurol-yarogʻ va texnikalar, harbiy xizmatchilarning kun tartibi va yashash sharoiti bilan tanishtirishdan iborat boʻldi. Tashrif davomida yoshlar harbiy texnika va qurol-aslahalar, harbiylarning chiqishlari va mashqlari bilan yaqindan tanishib, ularning faoliyati haqida maʼlumotlarga ega boʻldilar.

Amudaryo tumani Maktabgacha va maktab taʼlimi boʻlimiga qarashli 80-, 32- va 33-sonli umumtaʼlim maktablari oʻquvchi yoshlari hamda ushbu maktablardagi “Vatan tayanchi” otryadi aʼzolari harbiylar bilan suhbatlar qurib, ularning kundalik hayoti va xizmat shartlari haqida maʼlumotga ega boʻldilar. Yoshlarga harbiy xizmatni oʻtash, Vatanga xizmat qilish qanchalik sharafli va masʼuliyatli vazifa ekanligi hayotiy misollar orqali tushuntirildi. Bu maʼlumotlar va harbiy qismga tashrif taassurotlari ularning Vatanga boʻlgan muhabbati hamda yurt taqdiriga daxldorlik hissini yanada kuchaytirishga xizmat qilishi shubhasiz.

Yoshlar, shuningdek, harbiy qismda harbiy xizmatchilar uchun yaratilgan shart-sharoitlar, ularning kundalik hayoti bilan ham yaqindan tanishdilar. Kutubxona, maʼnaviyat xonalarida boʻlib, harbiy xizmatchi uchun nafaqat jismoniy kuch, balki bilim va dunyoqarash ham qanchalik muhimligini anglab yetdilar.

Ushbu tashrifdan keyin ishtirokchilar boshqa tengdoshlarining ham harbiy xizmatga boʻlgan qiziqishini yanada oshirib, ularni Vatanga xizmat qilishga chorlasa ajab emas. Bu esa kelgusida yoshlar orasidan koʻplab Vatan himoyachilari yetishib chiqishiga, mamlakatimizning kelajakdagi harbiy qudratini mustahkamlashga va yoshlar oʻrtasida Milliy Armiyaga boʻlgan ishonchning ortishiga xizmat qiladi.

Tashrifdan keyin harbiy qismda Yangi yil bayrami munosabati bilan katta tadbir oʻtkazildi. Bayramda harbiy xizmatchilar va ularning oila aʼzolari ishtirok etdi. Harbiylarga mehnatlari uchun tashakkur izhor qilish va ularning oila aʼzolari doimiy eʼtiborda ekanini namoyish qilish maqsadida tashkil etilgan bayram tadbirida harbiy xizmatchilarning farzandlari ham ishtirok etdi. Harbiylarning farzandlari uchun tayyorlangan sovgʻalar ularning Yangi yilni xursandchilik va mamnunlik bilan oʻtkazishlariga xizmat qilishi shubhasiz. Ayniqsa, Qorbobo va Qorqizdan sovgʻa olgan bolajlonlarning quvonchi tadbir ishtirokchilari va tashkilotchilarini ham toʻlqinlantirdi. Bu kabi tadbirlarning oʻtkazilishi harbiylar orasida birdamlik muhitini kuchaytirishga ham xizmat qiladi.

Gʻ.Yeshniyozov