36-SONLI MAKTABDA “MARDLAR QOʻRIQLAYDI ONA VATANNI!” MAVZUSIDA BAYRAM TADBIRI OʻTKAZILDI

Oʻsib kelayotgan yosh avlodni vatanparvarlik ruhida tarbiyalash, ular ongida milliy oʻzlikni anglash tuygʻularini uygʻotish, kelajagi buyuk Vatanimizni chuqur muhabbat bilan sevib-ardoqlashga oʻrgatish, avvalo oilada, qolaversa, maktab taʼlimi orqali uzviylik asosida amalga oshiriladi. Bu borada umumtaʼlim maktablarining boshlangʻich sinflar oʻqituvchilari tomonidan amalga oshiriladigan maʼnaviy-maʼrifiy tarbiyaviy darslar, ayniqsa, turli bayramlar munosabati bilan oʻtkaziladigan tadbirlarning ahamiyati katta. Chunki aynan ana shunday tadbirlar orqali oʻsib kelayotgan yosh avlod qalbida ona Vatanga mehr-muhabbat tuygʻulari shakllanadi, oʻz kelajagi, ota-onasi va oilasi taqdiri ona Vatan taqdiri bilan chambarchas bogʻliqligini chin yurakdan anglashga odatlanadi.

Qurolli Kuchlarimizning 33 yilligi va 14-yanvar – Vatan himoyachilari kuni munosabati bilan Amudaryo tuman Maktabgacha va maktab taʼlimi boʻlimiga qarashli 36-sonli umumtaʼlim maktabining 3-“A” sinf oʻquvchilari ishtirokida oʻtkazilgan “Mardlar qoʻriqlaydi ona Vatanni!” mavzusidagi maʼnaviy-maʼrifiy tadbir ham yosh avlod qalbida ana shunday milliy oʻzlikni anglash, ona Vatanga cheksiz mehr-muhabbat tuygʻularini yanada mustahkamlashga xizmat qilgani bilan muhim ahamiyat kasb etdi.

Boshlangʻich sinf oʻqituvchisi, 3-“A” sinf rahbari Nasiba Bobojonova tomonidan mazkur sinf oʻquvchilari ishtirokida tashkillashtirilgan bayram tadbirini maktab direktorining oʻquv ishlari boʻyicha oʻrinbosari Vahobjon Davletov ochib, bayram ishtirokchilarini Qurolli Kuchlarimizning 33 yiilligi bilan samimiy tabrikladi. Shu bilan birga u Yangi Oʻzbekistonimizning Qurolli Kuchlari qudrati, dunyodagi rivojlangan davlatlar armiyalari orasida tutgan oʻrni haqida oʻquvchilarga batafsil maʼlumotlar berib, ona Vatan himoyachisi boʻlishdek sharafli kasbning masʼuliyati, Vatanimiz sarhadlarini himoya qilish voyaga yetgan har bir yigitning ona Yurt oldidagi muqaddas burchi ekanligini taʼkidladi.

Tadbir davomida oʻquvchilar oʻz ustozlari Nasiba Bobojonova rahbarligida Vatanni, doʻstlik va tinchlikni, ona Vatan posbonlari – mard va jasur askarlarni sharaflovchi sheʼrlar aytishdi. Oʻgʻil bolalar joʻrvozligida ijro etilgan “Bizlar kichik askarlarmiz” qoʻshigʻi bayramga yanada joʻshqinlik baxsh etdi. “Jasur askar” qoʻshigʻiga oʻgʻil bolalar tomonidan maromiga yetkazib ijro etilgan raqs, shuningdek, qiz bolalar ijrosidagi “Vatan”, “Katyusha”, “Yoronlar” qoʻshiqlari joʻrligidagi raqslar bayramga fayz, ishtirokchilar qalbiga koʻtarinki kayfiyat ulashdi.

Tadbir davomida endi 8-9 yoshga toʻlgan bolajonlar qalblarida ona Vatanga cheksiz mehr-muhabbat, kelajakka ishonch bilan Qurolli Kuchlarimizni sharaflovchi sheʼrlar aytib, kuy-qoʻshiqlar va raqslarni mahorat bilan ijro qilganlaridan bayram ishtirokchilari, ayniqsa, ustozlari mamnun boʻldilar. Bayram munosabati bilan 3-“A” sinfning barcha oʻgʻil bolalariga – boʻlgʻusi ona Vatan himoyachilariga bayram sovgʻalari taqdim etildi.

Robiya Yoʻldosheva.