Alisher Navoiy tavalludi munosabati bilan 62-sonli maktabda tadbir oʻtkazildi

Har yili oʻzbek adabiyoti va madaniyatining buyuk namoyandasi, ulugʻ shoir va mutafakkir Alisher Navoiy tavalludi yurtimiz boʻylab keng nishonlanadi. Maʼlumki, Navoiyning ilmga boʻlgan ishtiyoqi erta uygʻonadi, u 4 yoshida maktabda taʼlim ola boshlagan. 7 yoshida Farididdin Attorning "Mantiq ut-tayr" asarini yoddan bilgan. Shu bilan birga, 7-8 yoshlaridan boshlab gʻazallar yoza boshlagan. Bu yil buyuk mutafakkir bobomizning tavalludiga 584-yil toʻldi.

Shu munosabat bilan tumanimizdagi 62-sonli maktabda “Buyuk zotga taʼzim” deb nomlangan badiiy kecha oʻtkazildi. Maktabning boshlangʻich sinf oʻqituvchisi B.Arikova tomonidan tashkillashtirilgan tadbirni maktabning maʼnaviy-maʼrifiy ishlar boʻyicha direktor oʻrinbosari Z.Atayev ochib berdi. U oʻz soʻzida Alisher Navoiy ijodining ahamiyati va uning bugungi yosh avlod tarbiyasidagi oʻrniga toʻxtalib oʻtdi. Tadbir davomida maktabning boshlangʻich sinf oʻquvchilari faol ishtirok etishdi. Ayniqsa, 4-sinf oʻquvchilari oʻz chiqishlari bilan barchaga manzur boʻldi. Oʻquvchilar oʻzlari yod olgan oʻzbek adabiyotining bebaho durdonalari boʻlmish Navoiy gʻazallari, hikmatli soʻzlari va ruboiylarini aytib berishdi.

Darhaqiqat, oʻqituvchilarning va oʻquvchilarning bu kabi tadbirlarni oʻtkazishdagi tashabbuskorligi va faolligi Navoiy dahosiga ehtirom timsoli hamda shoirning adabiy merosining bardavomligini taʼminlaydi. Shu jihatdan, “Buyuk zotga taʼzim” nomli ushbu tadbir yoshlar qalbida Navoiyga boʻlgan hurmat va muhabbatni yanada mustahkamlagani bilan ahamiyatli boʻldi.

Alisher Navoiy nafaqat oʻzbek adabiyotining, balki butun Sharq tsivilizatsiyasining ulugʻ siymolaridan biri sanaladi. Uning asarlari faqat bir davr yoki xalqqa emas, balki butun insoniyatga daxldor ekanligi bugungi kunda ham oʻz isbotini topmoqda. Ayniqsa, bobokalonimizning turli xalqlar oʻrtasida tinchlik va doʻstlikni mustahkamlash, bashariyatning yorugʻ kelajagini birgalikda qurishga chorlaydigan gʻoya va qarashlarining ahamiyati hozirgi tahlikali davrda tobora ortib bormoqda. Shuningdek, uning bebaho ijodiy merosi haqli ravishda jahon adabiyoti daholarining buyuk asarlari bilan bir qatorda turishi bizga cheksiz gʻurur va iftixor bagʻishlaydi. Shu bois, bunday tadbirlarning tashkil etilishi nafaqat adabiy merosimizni targʻib qilish, balki yosh avlodni ezgulikka, tafakkurga, vatanparvarlikka chorlash yoʻlida muhim ahamiyat kasb etadi.

Madina Jabborova, QDU 3-bosqich talabasi, tahririyat amaliyotchisi.