Oʻzbekiston Respublikasi Sogʻliqni saqlash vazirining oʻrinbosari Elmira Basitxonova ishtirokida yigʻilish oʻtkazildi

Mamlakatimizda onalik va bolalikni muhofaza qilish, perinatal va neonatal xizmatlarni takomillashtirish boʻyicha izchil chora-tadbirlar amalga oshirilmoqda. Sohada zamonaviy tibbiy texnologiyalarni joriy etish, onalar va chaqaloqlarga koʻrsatilayotgan yordam sifatini oshirish hamda tizim samaradorligini taʼminlashga alohida eʼtibor qaratilmoqda.

Shu maqsadda, 4-mart kuni Amudaryo tumani Tibbiyot birlashmasi majlislar zalida Oʻzbekiston Respublikasi Sogʻliqni saqlash vazirining oʻrinbosari Elmira Basitxonova ishtirokida yigʻilish oʻtkazildi.

Unda Amudaryo, Beruniy, Ellikqalʼa va Toʻrtkoʻl tumanlari tibbiyot birlashmalari masʼul xodimlari ishtirok etishdi. Tadbirda onalik va bolalikni muhofaza qilish borasida amalga oshirilayotgan ishlar tahlil qilinib, tibbiy xizmat koʻrsatish tizimini yanada yaxshilash yuzasidan takliflar bildirildi.

Joriy yilning 25-fevral kuni Sogʻliqni saqlash vaziri tomonidan yangi tugʻilgan chaqaloqlarga, jumladan, muddatidan oldin chala tugʻilgan hamda bemor chaqaloqlarga tibbiy yordam koʻrsatish tizimini yaxshilashga qaratilgan yangi qaror qabul qilindi. Qarorga koʻra, Respublika perinatal markazi mamlakat boʻylab barcha tugʻruq muassasalari, jumladan, 46 ta tumanlararo perinatal markaz uchun bosh muassasa sifatida belgilandi.

Mazkur markazning asosiy vazifalari perinatal oʻlim holatlarini kamaytirish uchun barcha tugʻruq muassasalarida zamonaviy texnologiyalar va tasdiqlangan standartlarga asoslangan neonatal yordam tizimini shakllantirish, har oy, chorak va yil davomida neonatal xizmatlar samaradorligini baholash va takliflar kiritish, mamlakat boʻylab neonatologlarning malakasini oshirish va ularga uslubiy yordam koʻrsatish hamda hududlar bilan ishlovchi maxsus mutaxassislarni belgilashdan iboratdir. Shuningdek, har bir hududda neonatologik konsultativ-reanimatsion transport xizmatini tashkil etish ham rejalashtirilgan.

Sogʻliqni saqlash vazirining 2025-yil 28-fevraldagi qaroriga muvofiq, tugʻish yoshidagi ayollar va homiladorlarga tibbiy xizmat samaradorligini oshirish, sifatli antenatal parvarish tizimini joriy etish nazarda tutilgan. Qarorga muvofiq, homiladorlik davrida antenatal parvarishni sifatli tashkil qilish, homiladorlikka qarshi koʻrsatmalar roʻyxatini shakllantirish va ularni amaliyotda qoʻllash, homiladorlikni tibbiy va ijtimoiy asoslar boʻyicha toʻxtatish jarayonini aniq reglamentlash, ogʻir homiladorlik asoratlari boʻyicha shoshilinch tibbiy yordam koʻrsatish tartiblarini ishlab chiqish hamda onalik va bolalik boʻyicha maxsus shtablar faoliyatini tartibga solish belgilandi.

Onalar va chaqaloqlar oʻlim holatlarining oldini olish maqsadida sogʻliqni saqlash tizimida muhim chora-tadbirlar amalga oshirilmoqda. Xususan, onalar va chaqaloqlar oʻlimi bilan bogʻliq klinik va patologoanatomik tekshiruvlar tartibini ishlab chiqish, barcha tugʻruq muassasalarida perinatal va neonatal oʻlimni rasmiy qayd etish va tahlil qilish tizimini joriy etish, onalar va chaqaloqlar salomatligi bilan bogʻliq favqulodda holatlarda shoshilinch tibbiy yordamni takomillashtirish kabi yoʻnalishlar ustida ish olib borilmoqda. Barcha tugʻruq muassasalari, xususan, “Ayollar maslahatxonalari boʻlimlari” bilan tugʻruq statsionarlari oʻrtasida muvofiqlashtirilgan aloqa tizimi yoʻlga qoʻyilishi ham belgilandi.

Sogʻliqni saqlash tizimidagi muammolardan biri boʻlgan korruptsiyaga qarshi kurashish ham davlat eʼtiborida. Barcha tibbiyot muassasalarida taʼmagirlik va korruptsiya holatlarini butunlay yoʻq qilish, shuningdek, sogʻlom axloqiy muhitni shakllantirish maqsadida xodimlarning kasbiy majburiyatlari qayta koʻrib chiqilishi belgilangan. Tugʻruq muassasalari va “Ayollar maslahatxonalari boʻlimlarida” xizmat sifatini oshirish maqsadida rahbariyat tomonidan xodimlarning lavozimlarini rotatsiya qilish ham nazarda tutilmoqda.

Yuqoridagi vazifalar bilan Oʻzbekistonda onalar va chaqaloqlarga koʻrsatiladigan tibbiy yordam sifatini sezilarli darajada oshirish maqsad qilingan. Yigʻilishda respublika perinatal markazining tashkil etilishi, homiladorlar va chaqaloqlar uchun yangi tizimlarning joriy qilinishi, shoshilinch yordam xizmatlarining takomillashtirilishi hamda korruptsiyaga qarshi qatʼiy choralar koʻrilishi ushbu sohadagi tub oʻzgarishlarning muhim qismi hisoblanishi qayd qilindi.

Shohzod Qurbonboyev.