“Yilning eng yaxshi tarbiyachisi – 2025” tanlovining tuman bosqichi gʻoliblari aniqlandi

Mamlakatimizda Maktabgacha taʼlim tizimini yanada takomillashtirish, ayniqsa, mazkur tashkilotlarda faoliyat olib boruvchi tarbiyachi-pedagoglarning kasbiy mahoratini rivojlantirish, tajriba va tashabbuslarini qoʻllab-quvvatlash, sohada oʻzaro sogʻlom raqobat muhitini yaratish, ilgʻor innovatsion gʻoyalarni amaliyotga samarali joriy etishni taʼminlashga qaratilgan eʼtibor tufayli soʻnggi yillarda maktabgacha taʼlim tashkilotlari nufuzi ortib, taʼlim-tarbiya sohasining ishonchli boshlangʻich tayanch boʻgʻiniga aylandi. Bunda soha vakillarining kasbiy malakasini oshirish, ilgʻor tajribalarini ommalashtirish, ularning ijodkorlik qobiliyatlarini yuzaga chiqarish maqsadida oʻtkazilayotgan turli mavzulardagi koʻrik-tanlovlar, festivallar va musobaqalar oʻzining ijobiy samarasini bermoqda.

Oʻzbekiston Respublikasi Maktabgacha va maktab taʼlimi vazirligining buyrugʻi asosida Amudaryo tuman Maktabgacha va maktab taʼlimi boʻlimining majlislar zalida boʻlib oʻtgan maktabgacha taʼlim tashkilotlari direktorlarining oʻrinbosarlari va tarbiyachi-pedagoglari ishtirokidagi “Yilning eng yaxshi tarbiyachisi – 2025” kasbiy koʻrik-tanlovining tuman bosqichi ham bilimdon, tashabbuskor va oʻz kasbining fidoyilari boʻlgan xodimlarni aniqlash, ularning tajribalarini ommalashtirish va ragʻbatlantirishga qaratilgani bilan muhim ahamiyat kasb etdi.

Tanlovda davlat maktabgacha taʼlim tashkilotlarida uslubchi, tarbiyachi lavozimida faoliyat yuritayotgan va kamida 2 yillik amaliy ish tajribasiga ega xodimlar qatnashishlari, ishtirokchilar oʻz kasbiy faoliyatlariga doir 3 daqiqalik videorolik tayyorlab, koʻrik-tanlov hayʼatiga taqdim qilishi, shuningdek, “Eng yaxshi direktor oʻrinbosari” yoʻnalishi boʻyicha ishtirokchi boshqa yoʻnalishlardagi ishtirokchilarga innovatsion seminar tashkil etishi zarurligi musobaqa Nizomida belgilab qoʻyilgan.

Koʻrik-tanlovning ochilish marosimiga bagʻishlangan yigʻilishda soʻzga chiqqan Amudaryo tuman Maktabgacha va maktab taʼlimi boʻlimi boshligʻi Yalgʻashboy Shamuratov , Taʼlim, fan va madaniyat xodimlari kasaba uyushmasi tuman qoʻmitasi raisi Ulugʻbek Abdurahmonov va boshqalar koʻrik-tanlovni oʻtkazishdan koʻzlangan maqsad va kutilayotgan natijalar xususida batafsil toʻxtalib, ishtirokchilarga muvaffaqiyatlar tiladilar.

Tanlovda “Eng yaxshi MTT direktori oʻrinbosari”, “Yilning eng fidokor tarbiyachisi”, “Eng yaxshi ijodkor-ixtirochi tarbiyachi”, “Oʻz faoliyatida innovatsion va axborot texnologiyalarini qoʻllaydigan eng yaxshi tarbiyachi”, “Eng yaxshi eko-targʻibotchi tarbiyachi”, “Yangi Oʻzbekistonda yangi avlodni maʼnaviy kamolotga yetaklovchi eng yaxshi tarbiyachi” yoʻnalishlari boʻyicha 101 nafar tarbiyachi-pedagoglar va 12 nafar MTT direktori oʻrinbosarlari gʻoliblik uchun oʻzaro bellashdilar.

Tanlovning birinchi shartiga koʻra, test topshiriqlarini bajarish orqali ishtirokchilarning nazariy bilimlari sinovdan oʻtkazildi.

Birinchi shart boʻyicha 20 balldan yuqori natijaga erishgan 34 nafar tarbiyachi-pedagog va 9 nafar direktor oʻrinbosarlari ikkinchi shart talabiga koʻra, oʻz faoliyatlariga doir 3 daqiqalik videoroliklarini namoyish etdilar. Mazkur shart boʻyicha 40 va undan yuqori ball toʻplagan 19 nafar ishtirokchi tanlovning hal qiluvchi – uchinchi shartida qatnashish huquqini qoʻlga kiritdilar.

Koʻrik-tanlovning uchinchi sharti qizgʻin bahslarga boy va yuqori ishchanlik ruhida oʻtdi. Unga koʻra, “Eng yaxshi direktor oʻrinbosari” yoʻnalishi ishtirokchilari kasbiy faoliyatiga doir seminar oʻtkazish, boshqa yoʻnalishlar boʻyicha ikkinchi shart gʻoliblariga mashgʻulot-ishlanmalarini tayyorlash talablari qoʻyildi.

Uchinchi shart boʻyicha belgilangan talablarni toʻgʻri va muvaffaqiyatli uddalagan 51-sonli DMTT direktori oʻrinbosari Gulxumor Qozoqboyeva “Eng yaxshi direktor oʻrinbosari” yoʻnalishida faxrli 1-oʻrinni egalladi. Ushbu yoʻnalishda 2-oʻrin 2-sonli DMTT direktori oʻrinbosari Salomat Toʻrayevaga, 3-oʻrin 44-sonli DMTT direktori oʻrinbosari Sevara Shamuradovalarga nasib etdi.

“Yilning eng fidokor tarbiyachisi” yoʻnalishida 2-sonli DMTT tarbiyachisi Mavluda Kamalova birinchi, 40-sonli DMTT tarbiyachisi Muyassar Kenjayeva ikkinchi, 21-sonli DMTT tarbiyachisi Shahnoza Qoʻshmanova 3-oʻrin sohibalari boʻlishdi.

Shuningdek, “Eng yaxshi ijodkor-ixtirochi tarbiyachi yoʻnalishida I-oʻrin 48-sonli DMTT tarbiyachisi Oʻgʻiloy Sobirovaga, 2-oʻrin 45-sonli DMTT tarbiyachisi Oltinoy Oʻrazimbetovaga, 3-oʻrin 26-sonli DMTT tarbiyachisi Muborak Sabirovaga nasib etdi.

“Innovatsion va axborot texnologiyalarini qoʻllaydigan eng yaxshi tarbiyachi” yoʻnalishida esa 6-sonli DMTT tarbiyachisi Durdona Qurbanbayeva birinchi, 44-sonli DMTT tarbiyachisi Barno Avezbayeva ikkinchi, 35-sonli DMTT tarbiyachisi Munira Qalandarova 3-oʻrinni egalladi.

“Eng yaxshi eko-tarbiyachi” yoʻnalishida 6-sonli DMTT tarbiyachisi Sadoqat Shamuratova 1-oʻringa loyiq koʻrildi. Ushbu yoʻnalishda 27-sonli DMTT tarbiyachisi Shahlo Jumamuratova ikkinchi, 22-sonli DMTT tarbiyachisi Dilnoza Nurimmatova 3-oʻrin sohibalari boʻlishdi.

“Yangi Oʻzbekistonda yangi avlodni maʼnaviy kamolotga yetaklovchi eng yaxshi tarbiyachi” yoʻnalishi boʻyicha esa 44-sonli DMTT tarbiyachisi Sohiba Gulmirzayeva birinchi, 45-sonli DMTT tarbiyachisi Yulduz Adilova ikkinchi, 48-sonli DMTT tarbiyachisi Salima Matnazarova uchinchi oʻrinlarni qoʻlga kiritdi.

Koʻrik-tanlov yakunida Amudaryo tuman Maktabgacha va maktab taʼlimi boʻlimi boshligʻi Yalgʻashboy Shamuratov tanlovning barcha ishtirokchilariga minnatdorchilik bildirib, tashakkurnomalar bilan taqdirladi. Barcha yoʻnalishlar boʻyicha gʻoliblikni qoʻlga kiritgan ishtirokchilarga Taʼlim, fan va madaniyat xodimlari kasaba uyushmasi tomonidan faxriy yorliqlar va esdalik sovgʻalari topshirildi. Koʻrik-tanlovda 1-oʻrinlarni egallagan ishtirokchilarga tanlovning Qoraqalpogʻiston Respublikasi bosqichiga yoʻllanmalar berildi.

ROBIYa YOʻLDOShEVA.