Yosh bilimdonlar “Zakovat”da bellashdi

Yurtimizda yoshlarning intellektual salohiyatini yuksaltirish, bilim va dunyoqarashini kengaytirish maqsadida turli loyihalar amalga oshirilmoqda. Ayniqsa, zakovat, hozirjavoblik, tezkor tafakkur va bilimga chanqoqlikni kuchaytirishga xizmat qiladigan “Zakovat” intellektual oʻyini tobora ommalashib bormoqda. Bu boradagi izchil saʼy-harakatlar, davlat tomonidan yaratilayotgan imkoniyatlar yoshlarimizni yanada faollikka undamoqda.

Oʻzbekiston Respublikasi Prezidentining 2022-yil 20-yanvardagi “Zakovat” intellektual oʻyinini aholi oʻrtasida ommaviy-maʼrifiy harakatga aylantirish va boshqa intellektual musobaqalarni rivojlantirishga doir qarori muhim huquqiy asos boʻldi. Qaror asosida intellektual oʻyinlar bilan shugʻullanayotgan oʻquvchi va talabalar uchun bir qator imtiyozlar belgilandi. Jumladan, respublika bosqichida gʻolib boʻlgan yoshlar oliy taʼlim muassasalariga test sinovlarisiz, bazaviy toʻlov-kontrakt asosida oʻqishga qabul qilinadi.

Ana shunday ezgu maqsadlarga xizmat qiladigan navbatdagi yirik intellektual musobaqa – “Zakovat” oʻyinining Amudaryo tumani bosqichi joriy yilning 15-aprel kuni boʻlib oʻtdi. “Oltin saroy” tantanalar majmuasida tashkil etilgan mazkur musobaqa koʻtarinki ruhda, yuksak tashkiliy saviyada oʻtkazildi. Unda tumandagi 86 ta umumtaʼlim maktablarining har biridan intellektual jamoalar ishtirok etdi. Har bir jamoa gʻoliblik uchun munosib kurash olib borib, bilim, hozirjavoblik, mantiqiy tafakkur va savollarga yondashish qobiliyatini namoyon etdi.

Musobaqani “Zakovat” intellektual klubi nodavlat notijorat tashkilotining Qoraqalpogʻiston Respublikasi boʻyicha koordinatori Dilshod Jumaniyazov boshqarib bordi. Uchrashuv davomida ishtirokchilar tarix, adabiyot, mantiq, falsafa va ijtimoiy mavzularga oid turli savollarda oʻz salohiyatlarini sinovdan oʻtkazishdi. Savollar chuqur fikrlash, xotira va bilimni birlashtirgan holda yechim topishni talab qildi. Jamoalar esa har bir savolga puxta tayyorgarlik bilan javob topishga harakat qilishdi.

Bu musobaqa nafaqat bilimlar bellashuvi, balki yoshlar orasida sogʻlom raqobat, bir-biridan oʻrganish va jamoaviy fikrlash madaniyatini shakllantiruvchi muhim maydon boʻldi. Ayniqsa, ovul va mahallalardagi iqtidorli yoshlar ushbu oʻyinda faol ishtirok etib, oʻz qiziqishlarini real natijalar bilan isbotlashdi.

Musobaqa nihoyasida hakamlar hayʼati tomonidan eng faol va bilimli jamoalar aniqlanib, gʻolib va faol ishtirokilar taqdirlandi. Gʻolib jamoa Qoraqalpogʻiston Respublikasi bosqichida ishtirok etish huquqini qoʻlga kiritdi.

Darhaqiqat, bunday musobaqalar nafaqat yoshlarning intellektual salohiyatini oshirish, balki ular orasida doʻstlik, fikr almashish va jamoaviy ishlash koʻnikmalarini mustahkamlashda ham muhim ahamiyat kasb etadi. “Zakovat” oʻyini esa bugungi yoshlarning bilimga boʻlgan qiziqishini yorituvchi, kelajak poydevorini mustahkamlovchi ijtimoiy-maʼnaviy koʻprik boʻlib xizmat qilmoqda.

Shohzod Qurbonboyev.