Amudaryo tumanida 9-may — Xotira va qadrlash kuni munosabati bilan bayram tadbiri oʻtkazildi
Urush — insoniyat oʻz qoʻli bilan, oʻziga qarshi oʻylab topgan eng qaygʻuli va dahshatli falokatlardan biridir. Ikkinchi Jahon urushi tarixdagi ana shunday eng halokatli va mashʼum voqea boʻlib, 70 milliondan ortiq inson hayotiga zomin boʻldi. Urush tufayli millatlar taqdiri oʻzgardi, shaharlar yer bilan yakson etildi, millionlab insonlarning bolaligi, yoshligi va umri xazon boʻldi.
Bu kabi ulkan fojiadan xulosa chiqarish — har bir avlodning insoniy burchidir. Tinchlik — beqiyos neʼmat, uni asrash esa har birimizning muqaddas vazifamizdir. Xotira – abadiy, qadr esa muqaddas tuygʻudir. Har yili 9-may sanasi munosabati bilan joylarda oʻtkaziladigan tadbirlarda ham shu ikki tuygʻu ulugʻlanib, urush qahramonlari eʼtirof etiladi, oʻtganlar xotirlanib, oramizdagi qahramonlar – front orti mehnat faxriylariga ehtirom koʻrsatiladi.
8-may kuni Amudaryo tumanida ham Xotira va qadrlash kuni munosabati bilan tantanali tadbir oʻtkazildi. Tadbirda Amudaryo tumani hokimi Sobir Xoʻjametov, deputatlar, huquqni muhofaza qiluvchi organlar rahbarlari, jamoatchilik faollari, taʼlim muassasalari masʼullari va faxriylar qatnashdilar. Ishtirokchilarga Oʻzbekiston bayrogʻi tasviri tushirilgan “Sharaf lentalari” tarqatildi.
Tadbir avvalida 9-may – Xotira va qadrlash kuni munosabati bilan aholi salomatligini mustahkamlash maqsadida tashkil qilingan yugurish marafonining gʻoliblari taqdirlandi.
Tantanali tadbirda tuman hokimi Sobir Xoʻjametov va tuman Mudofaa ishlari boʻlimi boshligʻi, mayor Shuhrat Mamatovlar yigʻilganlarni Ikkinchi jahon urushida fashizm ustidan qozonilgan gʻalabaning 80 yilligi bilan tabriklab, ushbu sananing mamlakatimiz boʻylab keng nishonlanishi yurtimiz ozodligi, tinchligi va ravnaqi yoʻlida jon bergan, mehnat frontida fidokorona xizmat qilgan, urush maydonlarida va front ortida mashaqqat chekkan insonlarga boʻlgan hurmat va ehtiromning yorqin ifodasi ekanini taʼkidladilar.
Tadbirda Ikkinchi jahon urushida halok boʻlgan yurtdoshlarimiz xotirasi yodga olinib, Qurʼon tilovat qilindi. Soʻngra ishtirokchilar tomonidan Motamsaro ona haykali yodgorligi poyiga gulchambarlar qoʻyildi.
Ikkinchi jahon urushi millionlab insonlarning bevaqt halok boʻlishiga, shaharlar va qishloqlar vayronaga aylanishiga, iqtisodiyot va ijtimoiy hayotda ogʻir oqibatlarga olib keldi. Urush nafaqat moddiy, balki maʼnaviy zarar ham yetkazdi — butun bir avlodning taqdiri vayron boʻldi, oilalar parokanda boʻldi. Nafaqat 5-yil davomida, balki urush tugaganidan keyin ham uning ayanchli oqibatlari tugamadi. Urushdan keyingi qayta tiklanish yillarida millionlab insonlar ogʻir mehnat va mashaqqat bilan iqtisodiyotni, infratuzilmani, ijtimoiy hayotni tiklash ishlarida fidoyilik koʻrsatdilar. Oradan 80-yil oʻtsa ham oʻsha mashʼum kunlarning chiqarilgan saboq bugungi avlodlarni tinchlikning qadriga yetishga chorlab kelmoqda.
Xotira va qadrlash kuni — bu faqat oʻtganlarni yod etish kuni emas, balki bugungi tinch hayotimizni qadrlash, xalqimiz koʻrsatgan jasoratni ulugʻlash, vatanga sadoqat ruhini avlodlar ongiga singdirish vositasi hamdir. Bu kun orqali yoshlarimiz yaqin oʻtmishda ajdodlarimizning qanday ogʻir yoʻllardan oʻtib, tinchlikka qanday qiyinchilik bilan erishganlarini his qilishadi.
Tadbirda tuman Madaniyat boʻlimi sanʼatkorlari tomonidan vatanparvarlik ruhidagi kuy-qoʻshiqlar ijro etildi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
