Oq oltin ovuli dalalarida qut-baraka nafasi ufurmoqda

Amudaryo tumanining Oq oltin ovuli oʻzining yam-yashil tabiati, keng va serhosil dalalari, sermeva bogʻlari, mehnatkash xalqi hamda goʻzal manzaralari bilan bir bor mehmon boʻlgan inson qalbida umrbod ajoyib xotira boʻlib qoladi. Amudaryo sohilidan esib turuvchi mayin, salqin shabada tabiatning xushboʻy ifori bilan dimogʻingizga xush yoqadi, tanangizga kuch-gʻayrat, tetiklik bagʻishlaydi. Oʻpkangizni toʻldirib, toza havodan nafas olasiz. Jumurtov va Qoratov qir-tepaliklari bir qadam masofada, xuddi qarshingizda turganday tuyiladi.

Kun yorishib, quyosh osmonga bosh qoʻymasidan oldin, mirishkor dehqonlar va tadbirkor fermerlar oʻzlarining qadrdon dalalari tomon oshiqadi. Shu bois, Amudaryo tumanida yetishtiriladigan qishloq xoʻjaligi mahsulotlari, ayniqsa paxta va gʻallaning ilk hosil karvoni bayrami aynan Oq oltin zaminidan boshlanishi bejiz emas. Ovul odamlari uchun qishloq xoʻjaligi tirikchilik manbai boʻlish bilan birga turmush tarzi, hayot falsafasiga aylangan.

Dastlab Amudaryo tumanida joriy yil paxta va gʻalla yetishtirish boʻyicha qilinayotgan ishlarga eʼtibor qaratsak: joriy yilda “Eco teks” MChJ paxtachilik klasteri bilan tumandagi 348 ta fermer xoʻjaliklari 13 ming gektar yer maydonida paxta yetishtirish boʻyicha kontraktatsiya shartnomalari imzolashgan. Erta bahorda ekilgan chigit ayni kunlarda bir tekis unib, baravj rivojlanmoqda. Paxta maydonlarida tuproqni chuqur yumshatish, oʻgʻitlash kabi agrotexnik tadbirlar oʻz vaqtida amalga oshirilmoqda. Har gektardan oʻrtacha 44 tsentner yuqori sifatli paxta hosilini olish va umumiy hosil xirmonini 57 ming 220 tonnaga yetkazish koʻzda tutilgan.

Ayni paytda paxta maydonlarida ish qizgʻin tus olgan. Gʻoʻza qator oralariga dastlabki ishlov berish, oziqlantirish, gʻoʻzani yaganalash kabi agrotexnik tadbirlar sifatli amalga oshirilmoqda. Keng dala uzra esayotgan mayin shamol daryo va togʻ havosini ufuradi. Uzoqda qator-qator teraklar saf tortgan, yanada olisda esa togʻlar koʻzga tashlanadi. Musaffo osmon, ona zamin va inson mehnati uygʻunlashgan bu goʻzal manzara qalblarga shukronalik va ezgulik bagʻishlaydi. Nazarimda bu dalalarda hayot nafaqat moddiy, balki maʼnaviy mazmun kasb etadi.

Tumanda paxtadan tashqari, gʻalla yetishtirishga ham alohida eʼtibor qaratiladi. Amudaryolik gʻallakor fermerlar “Qipchoq gʻalla klaster” MChJ bilan tuzilgan kontraktatsiya shartnomalari asosida joriy yilgi hosil uchun 6 ming gektardan ortiq yerda bugʻdoy yetishtirmoqdalar. Yaqin kunlarda hosil oʻrim-yigʻim ishlari boshlanadi. Dehqon yuzida shodlik ifodasi. Chunki keng gʻalla dalalarida pishib-yetilayotgan boʻliq bugʻdoy boshoqlari moʻl hosildan darak beradi. Vaqtida bajarilgan agrotexnik tadbirlar oʻz natijasini koʻrsatyapti.

Oq oltin ovuli hududida faoliyat yuritayotgan 14 ta fermer xoʻjaligi tomonidan joriy yilda 850 gektar yerga paxta, 25 gektarga esa bugʻdoy ekildi. Ekish jarayonlari sifatli, agrotexnik talablarga toʻliq rioya qilingan holda amalga oshirildi.

Paxta dalalarida yerni chuqur yumshatish, suspenziya qilish, mineral va mahalliy oʻgʻitlar bilan boyitish, shuningdek, zararkunandalarga qarshi kurashish kabi agrotexnik tadbirlar belgilangan muddatlarda, aniq reja asosida olib borildi. Mehnat natijalari allaqachon oʻz samarasini bera boshlagan.

Bugʻdoyzorlarda ham agrotexnik tadbirlar puxta reja asosida amalga oshirildi. Yerni ekishga tayyorlash, urugʻlik tanlash, vaqtida sugʻorish hamda ekinni turli zararkunandalardan asrash maqsadida bajarilgan ishlar hosildorlikni oshirishga xizmat qildi.

Oq Oltin ovulidagi fermer xoʻjaliklari orasida Mahmud Yusupov raisligidagi “Saragul Yoʻldosheva” fermer xoʻjaligi 62 gektar yerda paxta va gʻalla ekib, hosildorlikni oshirish uchun barcha imkoniyatlardan samarali foydalanmoqda. Shuningdek, Gʻulomjon Allaberganov raisligidagi “Sobirova Malika” fermer xoʻjaligi ham gʻalla, kartoshka va bogʻdorchilik sohalarida faoliyat yuritib, ovul farovonligiga oʻz hissasini qoʻshmoqda. Har bir ekin oʻz vaqtida, agrotexnik talablarga muvofiq yetishtiriladi.

Aholi bandligini taʼminlash maqsadida ovul yoshlariga ajratilgan dalalarda ham ish qizgʻin. Serunum tuproq dehqon mehnatiga munosib javob qaytaradi. Qay tarafga nazar tashlamang, mehnatsevarlik bilan uygʻun goʻzal manzaralar. Kartoshka ekilgan maydonlarda qaynoq mehnat nishonasi koʻzni quvontiradi. Egatlarni toʻldirgan turli ekinlar allaqachon hosilga kirgan. Yosh dehqonlar egatlarga ishlov berib, ona yer bagʻridan oʻz mehnatlari bilan undirayotgan ziroat salmogʻidan mamnun.

Pomidor ekilgan maydonlar ham gullab-yashnamoqda. Bu goʻzal manzaralarni koʻrib, dehqonning yuzidagi tabassumni, koʻnglidagi mamnuniyatni his etmaslik mumkin emas. Dalalarning boshqa chekkasida esa yerga bagʻir bosgan qovun va tarvuz palaklari hosilga kirgan. Qalin palaklar koʻzni quvnatadi, shodlik bagʻishlaydi. Har bir egat toʻkinlik va barakadan darak beradi goʻyo.

Fayzga toʻla olmazorlar ham hosil yukidan egilib turibdi. Yaqin kunlarda ertagi olmalar pishib, oilalar dasturxonlarini bezaydi. Ha, oq oltinlik mirishkor dehqonlarning mehnati har faslda oʻz soʻzini aytadi. Ona yer fidoyi mehnatni mukofotlaydi, halol mehnatdan esa xalqimiz dasturxoniga qut-baraka yogʻiladi.

Oq oltin ovulliklar tabiatan kamtar va mehnatsevar. Qishloqda hayotning oʻziga xos ritmi bor: kun yorishmasidan uygʻonish, dalaga yoʻl olish, kun davomida samarali mehnat qilish va kechqurun oila davrasida hordiq chiqarish — bular oq oltinliklar hayotining kundalik stsenariysi, halol mehnat qilib, farovon turmush kechirish esa umrining asl mazmunidir.

Shohzod Qurbonboyev.