Huquqni muhofaza qiluvchi organlar tomonidan tuman Tibbiyot birlashmasi faoliyati oʻrganildi

Qoraqalpogʻiston Respublikasi prokurori tomonidan tasdiqlangan “Dolzarb 15 kunlik” tadbirlar rejasi doirasida Amudaryo tumanida ham huquqni muhofaza qiluvchi organlar tomonidan maqsadli oʻrganish ishlari amalga oshirilmoqda. Jumladan, aholining sogʻligʻini muhofaza qilish, tibbiy xizmatlar samaradorligini oshirish va ijtimoiy himoya tizimini takomillashtirish borasidagi chora-tadbirlarga ustuvor ahamiyat qaratilmoqda.

Yaqinda tuman Prokuraturasi tomonidan Oʻzbekiston Respublikasi Prezidentining tegishli Farmon va Qaroriga asosan joriy etilgan “Tibbiyotda 90 kunlik oʻzgarishlar” hamda “Toza qoʻllar” dasturi doirasida tuman Tibbiyot birlashmasida amalga oshirilgan ishlar tahlil etildi.

Jumladan, tuman Tibbiyot birlashmasi faoliyati qaror talablari asosida oʻrganilib, yoʻl xaritalarining ijrosi, kelib tushgan murojaatlar tahlili, yuqumli va ijtimoiy xastaliklarga qarshi choralar, onalar va bolalar oʻlimi holatlari hamda ushbu sohadagi muammolar oʻrganildi.

2025-yilning birinchi choragida tuman Tibbiyot birlashmasi tomonidan ichkilikbozlik va narkologik muammolarga duchor boʻlgan shaxslar roʻyxati shakllantirilgan. Unga koʻra, 22 nafar shaxsga yoʻllanma berilgan boʻlib, shundan 8 nafari majburiy, 14 nafari ixtiyoriy ravishda statsionar muassasalarga yotqizilgan.

Probatsiya nazoratida turuvchi 120 nafar shaxsning 110 nafari tibbiy koʻrikdan oʻtkazilgan. Ularning 8 nafarida kasallik aniqlangan boʻlib, 1 nafari statsionar, 7 nafari ambulator tarzda davolanmoqda.

Narkologiya xonasida hozirda 213 nafar surunkali ichkilikbozlikka moyil va 9 nafar giyohvandlikka moyil shaxslar dispanser hisobida turadi. 2025-yil mart oyi yakuniga qadar 147 nafar bemor tibbiy koʻrikdan oʻtkazilib, bir qismi Nukus shahridagi ixtisoslashtirilgan muassasalarga yoʻnaltirilgan.

Hozirgi vaqtda 247 nafar parvarishga muhtoj shaxslardan 188 nafariga, tibbiy koʻrikdan oʻtkazilgan yakka yolgʻiz keksalarning 109 nafariga zarur maslahat va davo choralari belgilangan. Shuningdek, 204 nafar nogironligi boʻlgan shaxslar, 36 nafar yakka yolgʻizlar, 114 nafar ichkilikka ruju qoʻyganlar, 42 nafar tazyiq va zoʻravonlikka uchragan fuqarolar hamda ogʻir ijtimoiy ahvoldagi 98 nafar shaxs tibbiy koʻrikdan oʻtkazilgan.

Jami hisobda tumanda 389 ta tibbiy koʻrik oʻtkazilib, tibbiy tavsiyalar va ijtimoiy yordamlar koʻrsatildi.

Tanosil kasalliklari, OIV va OITSga qarshi profilaktika ishlari doirasida joylarda 116 ta seminar va uchrashuvlar tashkil etilgan. Shuningdek, maktablarda tibbiy madaniyatni oshirish, xatarli kasalliklardan saqlanish yuzasidan 88 ta targʻibot tadbiri oʻtkazilgan. Bu tadbirlar orqali aholi orasida tibbiy madaniyatni oshirish, xatarli kasalliklar oldini olish yuzasidan tushuntirish ishlari olib borilgan.

Tuman markaziy poliklinikasi qabul boʻlimiga turli shikastlar bilan murojaat qilgan 149 nafar fuqaro boʻyicha ichki ishlar boʻlimiga maʼlumotlar taqdim etilgan. Bu esa huquqbuzarliklarning oldini olish va jinoyatchilikka qarshi tezkor hamkorlikni taʼminlashga xizmat qilmoqda.

Amudaryo tuman koʻp tarmoqli markaziy poliklinikasining ruhiy kasalliklar xonasida 1025 nafar bemor dispanser nazoratida turibdi. Ulardan 11 nafari ijtimoiy xavfli shaxslar sifatida qayd etilgan. Mart oyi davomida 224 nafar bemor tibbiy koʻrikdan oʻtkazilib, psixotrop va neyroleptik dori vositalari bilan taʼminlandi. Shu bilan birga, 28 nafar bemor mutaxassis shifokorlar xulosasiga koʻra statsionar davolanishga yoʻnaltirildi.

2025-yilning birinchi choragida 6 nafar ruhiy bemor turli huquqbuzarlik sodir etgan boʻlib, ulardan 5 nafari tibbiy koʻrikdan oʻtkazildi.

Amudaryo tumanida “Dolzarb 15 kunlik” doirasida tuman prokuraturasi tomonidan amalga oshirilayotgan mazkur chora-tadbirlar nafaqat tibbiy sohada, balki aholining ijtimoiy himoyasi, salomatligi, huquqiy madaniyati va xavfsizligini taʼminlashda muhim ahamiyat kasb etmoqda.

Shohzod Qurbonboyev tayyorladi.