“Dolzarb 90 kun” yoshlarga yangi imkoniyatlar eshigini ochmoqda

Yangi Oʻzbekistonda yoshlar uchun yaratilayotgan keng imkoniyatlar va ularga qaratilgan eʼtibor yoshlarning tashabbuskorligi hamda kreativ yondashuvlarida muhim oʻrin tutmoqda. Xususan, Prezident tashabbusi bilan amalga oshirilayotgan “Dolzarb 90 kun” loyihasi doirasida joylarda keng koʻlamli ijtimoiy-madaniy tadbirlar tashkil etilmoqda.

Oliy taʼlim muassasalari, umumtaʼlim maktablari va boshqa taʼlim-tarbiya maskanlarida turli toʻgaraklar faoliyati yoʻlga qoʻyilib, “Ilgʻor gʻoya”, “Mening start-up loyiham”, “Dolzarb 90 kun” kabi videokonferentsiyalar va seminarlar orqali yoshlarning ijtimoiy faolligi oshirilmoqda. Bu kabi jarayonlar talabalarni yangidan-yangi maʼlumotlar bilan boyitish barobarida ularda oʻz ustida ishlashga kuchli motivatsiya shakllantirmoqda.

Bu dastur doirasida amalga oshirilayotgan tashabbuslarni maʼlum maʼnoda bir-biriga bogʻlangan zanjir singari, yoshlarni yetuklik sari yetaklovchi yoʻl deb atash mumkin. Chunki oʻzlikni anglay olish — yetuklik belgisidir. Bugun ijtimoiy hayotda oʻz oʻrnini topishga intilganlar jamiyatda tobora koʻpaymoqda. Mazkur loyiha ular uchun oʻz salohiyatini namoyon etishga qulay imkoniyat va katta turtki boʻlmoqda.

Jahondagi koʻpgina mamlakatlar oʻzining bilimga chanqoq, zehni oʻtkir yoshlari bilan ajralib turishi bejiz emas. Bu, avvalo, taʼlim tizimi va oʻqitish metodikasining samarasidir. Shuningdek, bolani har tomonlama rivojlantirish, uning qiziqishlarini qoʻllab-quvvatlash — toʻgʻri yoʻnalishlardan biri. Bunda musiqa va sanʼat hamda sport toʻgaraklari yoshlarni maʼnan va jismonan yetuk shaxslar etib voyaga yetkazadi.

XXI asr – Oʻzbekiston yoshlari dunyo bilan hamqadam boʻlishi lozim. Biroq ayrim yoshlar texnologik imkoniyatlarni faqat koʻngilochar maqsadlarda ishlatishi, kitob mutolaasidan voz kechishi ularning intellektual rivojiga salbiy taʼsir koʻrsatmoqda. Bu esa umumiy maʼnaviy muhitga ham taʼsir oʻtkazishi mumkin. Shu sababli, yoshlarda sogʻlom tafakkur, bilimga chanqoqlik va shaxsiy masʼuliyatni shakllantirish muhim vazifadir.

“Dolzarb 90 kun” loyihasi doirasidagi tashabbuslar bu kabi muammolarga amaliy yechim sifatida xizmat qilmoqda. Agar inson oldiga maqsad qoʻyib, unga aniq muddat belgilasa, u holda natijaga erishish uchburchagi yuzaga keladi. Inson ushbu uchburchakning asosiy ustuniga aylanib, harakat va saʼy-harakat jarayonini kuchaytiradi. Bu esa natijaning tez va samarali boʻlishiga olib keladi.

Bugun raqamli texnologiyalar, sunʼiy intellekt orqali bilim olish va rivojlanish imkoniyatlari kengaymoqda. Shu jihatdan, mazkur 90 kunlik jarayon har bir yosh uchun yangi nafas, ilhom manbai boʻlishi, uning qiziqishlari va qobiliyatini aniqlashda muhim ahamiyat kasb etadi.

Vaqtni unumli foydalanish, kreativlik bilan harakat qilish — bugungi yosh avlodning asosiy burchidir. Biz qabul qilayotgan har bir qaror, tashlanayotgan har bir qadam kelajak poydevorini mustahkamlaydi.

Biz — yoshlar, oʻzimizda yangi choʻqqilarni zabt etishga boʻlgan iroda va aql-idrokni shakllantirishimiz shart. Chunki shu 90 kun mobaynida kelajakda xalqimizga manfaat keltiradigan, yetuk, layoqatli kadr sifatida shakllanish imkoniyati yaratilyapti. Shuning uchun har birimiz oʻzimizning ichki “men”imizni uygʻotaylik!

Zero, har bir inson — butun bir xalqni tashkil etadi. Uning qilayotgan amallari esa kelajak avlod taqdiriga bevosita taʼsir koʻrsatadi.

Mashhura Xayitboyeva, Oʻzbekiston davlat jahon tillari universiteti talabasi.