Farovon mahallasi yoshlar yetakchisi mahalla yoshlariga tayanch boʻlmoqda

Mamlakatimizda mahalla institutini yanada takomillashtirishga qaratilgan islohotlar natijasida mahalla yoshlari yetakchisi lavozimining joriy etilishi yoshlar hayotiga oid koʻplab muammolarni ijobiy hal etishda muhim ahamiyat kasb etmoqda. Ayniqsa, yoshlar tadbirkorligini rivojlantirish, ularning bandligini taʼminlash va boʻsh vaqtlarini mazmunli oʻtkazishda yoshlar yetakchilari tomonidan amalga oshirilayotgan keng qamrovli ishlar yoshlarning ijtimoiy faolligini oshirib, hayotda oʻz oʻrinlarini topishlariga imkoniyat yaratmoqda.

Mangʻit shahrining “Farovon” mahalla fuqarolar yigʻini, garchi yaqin yillarda yangi aholi maskanlari hisobiga tashkil etilgan boʻlsa-da, infratuzilmasi jadal rivojlanib borayotgan, haqiqatan ham nomiga munosib obod va farovon mahallalardan biri hisoblanadi. Bugun mahalladagi 642 ta xonadon tarkibidagi 710 ta oilada 2534 nafar aholi istiqomat qiladi. Ulardan 1551 nafaridan ziyodi – 30 yoshgacha boʻlgan yoshlar, shundan 891 nafari 14 yoshdan 30 yoshgacha boʻlgan intiluvchan va izlanuvchan yigit-qizlardir. Shundan kelib chiqib aytish mumkinki, mahalla yoshlar yetakchisining faoliyat koʻlami, uning yon daftarida qayd etilgan kundalik ish rejalari salmogʻi ham ancha keng qamrovli.

Bugungi kunda mahalla yoshlarining 48 nafari davlat sektorida, 85 nafari xususiy sektorda faoliyat olib borishadi. 171 nafar yoshlar oʻzini-oʻzi band qilish tamoyili asosida shaxsiy daromad manbaiga ega. 191 nafar yosh oliy taʼlim muassasalarida, 28 nafari esa professional taʼlim muassasalarida tahsil oladi. Shuningdek, mahalladagi umumtaʼlim maktablarida 167 nafar oʻquvchi-yosh taʼlim olayotgan boʻlsa, mehnat muhojirligidan qaytgan 19 nafar yoshlarning ham turmush tarzi va boʻsh vaqtlarini mazmunli oʻtkazishi yetakchining doimiy eʼtiborida.

2025-yilning ilk kunlaridanoq ishsiz yoshlarni band qilish boʻyicha amalga oshirilgan ishlar tufayli 6 nafar yoshlarga hokim yordamchisi tavsiyasi asosida imtiyozli kredit ajratilib, chorvachilik yoʻnalishida oʻzini-oʻzi band qilish imkoniyati yaratildi. Yana 4 nafar talaba-yoshning shartnoma toʻlovlari “Yoshlar daftari jamgʻarmasi” hisobidan qoplab berildi. Shuningdek, 3 nafar yoshning zamonaviy kasb-hunar boʻyicha oʻquv kurslari xarajatlari ham qoplandi.

Oʻzbekiston Respublikasi Prezidentining yoshlar tadbirkorligini rivojlantirish va bandligini taʼminlashga qaratilgan Farmon va qarorlari asosida mahalla yoshlaridan Asadbek Yalgʻoshevga temirchilik mahsulotlarini uy sharoitida tayyorlash, Bonu Tojimovaga esa ayollar sartaroshligi, manikyur va pedikyur xizmatlari boʻyicha tadbirkorlik faoliyatini yoʻlga qoʻyish uchun 7 yillik imtiyozli kredit ajratilib, ularning doimiy bandligi taʼminlandi.

Shu bilan birga, mehnat muhojirligidan qaytgan yoshlarning muammolarini oʻrganish va hal etish maqsadida maxsus dasturlar ishlab chiqilib, joylarga chiqib suhbatlar oʻtkazilmoqda. Yoshlarning boʻsh vaqtlarini mazmunli oʻtkazish, ularni milliy-maʼnaviy va vatanparvarlik ruhida tarbiyalash, madaniyat, sanʼat, sport, kitobxonlik va axborot texnologiyalari sohalariga jalb etish maqsadida taniqli yozuvchi va shoirlar, olimlar bilan uchrashuvlar, davra suhbatlari, kitobxonlik kechalari va sport musobaqalari tashkil etilmoqda. Bu esa yoshlarning ijtimoiy faolligini oshirib, oʻzlariga va kelajakka boʻlgan ishonchini yanada mustahkamlashga xizmat qilmoqda.

Xususan, “Besh tashabbus olimpiadasi” doirasidagi tadbirlar orqali mahalladagi 14 yoshdan 30 yoshgacha boʻlgan yoshlar oʻzlarining qiziqish va intilishlarini, iqtidorlarini amalda namoyon etishayotgani eʼtiborga munosib. Natijada Farovon mahallasi yoshlari orasidan tumanimiz sport sohasini rivojlantirishga munosib hissa qoʻshadigan koʻplab sportchi-yoshlar yetishib chiqmoqda. Ularning saʼy-harakatlari bilan yaqinda tumandagi ovul va mahallalar yosh spotchilari ishtirokida Davlat xavfsizlik xizmati kubogi uchun oʻtkazilgan mini futbol musobaqalarida Farovon mahallasi mini futbol jamoasi tumanda faxrli 1-oʻrinni egallab, mazkur musobaqaning Respublika bosqichiga yoʻllanmani qoʻlga kiritdilar.

Mahalla yoshlar yetakchisining yoshlar qalbiga yoʻl topish, shu orqali mavjud muammolar yechimini birgalikda izlash va oʻz vaqtida bartaraf etish, yoshlarning turmush sharoitlarini yanada yaxshilash boʻyicha zarur chora-tadbirlar belgilash kabi amaliy ishlari nafaqat yoshlar hayotini ijobiy tomonga oʻzgartiradi, balki mamlakatimiz ijtimoiy-iqtisodiy tarqqiyotini ham yangi bosqichga koʻtarishga xizmat qiladi.

Farovon mahallasi yoshlar yetakchisi Shohrux Roʻzmatovning har bir ish kuni mamlakatimiz hayotiga daxldor ana shunday intilishlar bilan, ishchanlik ruhida oʻtadi. Uning el-yurt farovonligi yoʻlidagi bu saʼy-harakatlari mahalla yoshlari kamolotida oʻz ifodasini topmoqda.

Robiya Yoʻldosheva