MTTLARDA BOLALARNI SOGʻLOM OVQATLANTIRIShGA BAGʻIShLANGAN SEMINAR TAShKIL ETILDI

Barkamol avlodni tarbiyalab, voyaga yetkazish yoʻlidagi ilk qadam maktabgacha taʼlim tashkilotlaridan boshlanadi. Bu borada esa bolalar salomatligini taʼminlash va sogʻlom ovqatlantirishni tashkil etish, ayniqsa, yozgi sogʻlomlashtirish davrida tarbiyalanuvchilarning xavfsizligini taʼminlash masalalari muhim ahamiyatga ega. Amudaryo tumanida davlat-xususiy sherikchik asosida faoliyat yuritayotgan “Husniya” nodavlat maktabgacha taʼlim tashkilotida “Dolzarb 90 kun” doirasida oʻtkazilgan seminarda ham aynan shu masalalar atroflicha muhokama etildi.

Seminarda Qoraqalpogʻiston Respublikasi Maktabgacha va maktab taʼlimi Vazirligi mutaxassisilari, Qoraqalpogʻiston “Oshpazlar uyushmasi”, Amudaryo tumani Maktabgacha va maktab taʼlimi boʻlimi masʼullari, tuman Sanitariya epidemiologik-osoyishtalik va jamoat salomatligi boʻlimi shifokorlari, davlat xususiy-sherikchilik asosidagi hamda oilaviy nodavlat maktabgacha taʼlim tashkilotlari tarbiyachilari, oshpazlari va autsorsing asosida mahsulot yetkazib beruvchi taʼminotchi-tadbirkorlar ishtirok etdilar.

Seminarni tuman Maktabgacha va maktab taʼlimi boʻlimining davlat-xususiy sheriklik asosidagi taʼlim tashkilotlari faoliyatini muvofiqlashtirish boʻyicha bosh mutaxassisi Abdurashid Nasrullayev ochdi va ushbu seminarni oʻtkazishdan maqsad, nodavlat maktabgacha taʼlim tashkilotlarida sogʻlom ovqatlantirishni tashkil etishning ahamiyati, taʼlim-tarbiya jarayonlarini toʻgʻri olib borish toʻgʻrisida batafsil soʻz yuritdi.

Shundan soʻng Qoraqalpogʻiston Respublikasi Maktabgacha va maktab taʼlimi boʻlimi mutaxassislari soʻzga chiqib, maktabgacha taʼlim tashkilotlarining davlat va nodavlat tarmoqlarini yanada kengaytirish, ular oʻrtasida sogʻlom raqobat muhitini shakllantirish maqsadida Respublika miqyosida amalga oshirilayotgan keng qamrovli ishlar xususida seminar ishtirokchilariga zarur maʼlumotlar taqdim etdi.

Xususan, nodavlat maktabgacha taʼlim tashkilotlarida bolaning individual ehtiyojlarini hisobga olgan holda rivojlanishiga oid davlat talablari asosida hamda davlat oʻquv dasturiga muvofiq uning har tomonlama va barkamol rivojlanishi uchun qulay shart-sharoitlar yaratish, maktabgacha yoshdagi bolalarning oʻquv-tarbiyaviy faoliyatini tashkil qilish hamda maktabgacha taʼlim yoshidagi barcha tarbiyalanuvchilarni sogʻlom, xavfsiz ovqatlantirish barkamol avlod tarbiyasidagi eng muhim va dolzarb vazifa ekanligi alohida taʼkidlandi.

Oziq-ovqat mahsulotlari va taomlarning sanitariya qoidalari, meʼyorlari va gigiyena talablariga mosligi, sogʻlom ovqatlantirishni tashkil etish, tarbiyalanuvchilarning sogʻlom va barkamol oʻsishini taʼminlash uchun talablarga muvofiq sharoitlar yaratish nafaqat muassasalar rahbarlarining, balki oshpazlarning, taʼminotchi-tadbirkorlarning ham zimmalaridagi masʼuliyatli vazifasi ekani, bu borada aslo sustkashlikka yoʻl qoʻyib boʻlmasligi alohida qayd qilindi.

Seminarda soʻzga chiqqanlar bolaga beriladigan taomlarning sifati, yosh toifalariga koʻra quvvatlilik darajasi, sanitariya-gigiyena talablariga mosligi yuzasidan oʻz fikrlarini bildirdilar. Xususan, bolalar tartibsiz ovqatlantirilganda ulardagi ovqatlanish refleksi soʻnib, ishtahasi pasayishi, buning oqibatida ovqat hazm qilish aʼzolarining faoliyati buzilishi, shuning uchun bolalarni oʻz vaqtida ovqatlantirish uning sogʻlom oʻsib-ulgʻayishida muhim ahamiyatga egaligi, xavfsiz ovqatlantirishning barcha qoidalariga amal qilingandagina ularning rivojlanishida muammo boʻlmasligi alohida qayd etildi.

Ayniqsa, maktabgacha taʼlim tashkilotida taomnoma shakllantirilishida kunlik ratsionda bolalarning asosiy oziq-ovqat moddalarga boʻlgan ehtiyoji va yoshiga mos energiya quvvati bilan toʻliq taʼminlanishi, ularning tarbiyalanish sharoiti va sogʻligʻi, shuningdek, ovqatlanishning mahalliy iqlim sharoitidan kelib chiqib, milliy xususiyatlari hisobga olinishi lozimligi ishtirokchilarda katta qiziqish uygʻotdi.

Seminar jarayonida tumandagi 5-sonli tayanch davlat maktabgacha taʼlim tashkiloti metodisti, trener-mentor Gulchehra Yuldasheva tomonidan maktabgacha taʼlim tashkilotlarida yozgi sogʻlomlashtirish davrini tashkillashtirish boʻyicha vazirlik tomonidan ishlab chiqilgan uslubiy tavsiyalar yuzasidan tushuntirish ishlari ham olib borildi.

Seminar yakunida muhokama etilgan masalalar yuzasidan tushgan barcha savollarga masʼullar tomonidan batafsil javoblar, zarur tushuncha va tavsiyalar berildi.

Ravshan Bahromov.