"Ustozlar milliy forumi" doirasida shuʼba seminarlari oʻtkazildi

19-avgust kuni Amudaryo tumanida Oʻzbekiston Respublikasi Maktabgacha va maktab taʼlimi vazirligi tashabbusi bilan tashkil etilgan anʼanaviy toʻrtinchi "Ustozlar milliy forumi" "Mahoratli oʻqituvchi – millat tayanchi" shiori ostida oʻz ishini boshladi. Taʼlim sifatini oshirish va sohaga innovatsion yondashuvlarni joriy etishdek ezgu maqsadlarni oʻzida mujassam etgan ushbu nufuzli anjuman mamlakatimizning barcha hududlarida boʻlgani kabi, Amudaryo tumanida ham yuqori saviyada tashkil etildi.

Qayd etish joizki, mamlakatimizda soʻnggi yillarda taʼlim tizimini tubdan isloh qilish, oʻqituvchilarning kasbiy mahoratini yuksaltirish va ular uchun munosib shart-sharoitlar yaratishga davlat siyosati darajasida eʼtibor qaratilmoqda. Bu jarayonda pedagoglarni muntazam ravishda sohadagi yangiliklardan xabardor qilish, ularga eng ilgʻor metodikalarni oʻrgatish va oʻzaro tajriba almashish imkoniyatini yaratish muhim ahamiyatga ega. Har yili yangi oʻquv yili arafasida oʻtkaziladigan "Ustozlar milliy forumi" ana shunday tizimli ishlarning yorqin namunasidir.

Toʻrtinchi bora oʻtkazilayotgan “Ustozlar milliy forumi” Qoraqalpogʻiston Respublikasi miqyosida 14-avgust kuni, Nukus shahrida oʻtkazilib, unda tumandan 14 ta fan yoʻnalishi va maktabgacha taʼlim yoʻnalishi boʻyicha 33 nafar ilgʻor pedagoglar ishtirok etgan edi.

Forumning mantiqiy davomi sifatida tumandagi 1-sonli umumiy oʻrta taʼlim maktabi va 4- hamda 5-sonli maktabgacha taʼlim tashkilotlarida fan yoʻnalishlari boʻyicha shuʼba seminarlari boʻlib oʻtdi.  Shuʼba seminarlarida 14 ta fan yoʻnalishlari boʻyicha 85 ta umumtaʼlim maktablaridan oʻz fanining yetuk bilimdonlari boʻlgan 1177 nafar ilgʻor oʻqituvchilar hamda 53 ta maktabgacha taʼlim tashkilotidan 53 nafar mohir pedagoglar ishtirok etishib, 2025-2026 oʻquv yilida oʻqituvchi va tarbiyachilar oldiga qoʻyilgan maqsad va vazifalar, oʻz fan yoʻnalishlari boʻyicha soʻnggi yangiliklar boʻyicha bilim va koʻnikmalarga ega boʻlishdi. Shuningdek, yangi oʻquv rejalari, dasturlar, yangi avlod darsliklari va zamonaviy baholash tizimining mazmun-mohiyati ham atroflicha muhokama qilindi.

Shuʼba seminarlarida trener-oʻqituvchilar tomonidan oʻquv jarayoniga tatbiq etiladigan ilgʻor metodikalar boʻyicha mahorat darslari oʻtkazildi. Ishtirokchilar oʻzlarini qiziqtirgan savollarga mutaxassislardan batafsil javob olish imkoniyatiga ega boʻldilar. Forumning ushbu bosqichi nafaqat nazariy bilimlar berish, balki amaliy koʻnikmalarni shakllantirish, oʻqituvchilar oʻrtasida jonli muloqot va fikr almashish uchun samarali maydon vazifasini oʻtadi. Endilikda, seminarlarda olingan bilim va koʻnikmalar 25-30-avgust kunlari maktablardagi uslub birlashma va pedagogik kengash yigʻilishlarida barcha pedagoglar ishtirokida keng muhokama qilinishi rejalashtirilgan.