Mustaqillik bayrami hamda paxta yigʻim-terimi mavsumi oldidan nuroniylar uchun dasturxon yozildi

Joriy yilning 31-avgust sanasida Amudaryo tumanida Vatanimiz mustaqilligining 34 yilligi munosabati bilan, shuningdek, paxta yigʻim-terimi mavsumi boshlanishi arafasida nuroniy otaxon va onaxonlar uchun bayram dasturxoni yozildi. Ushbu ezgu tadbir “Diamond” restoranida oʻtkazilib, u samimiyat, mehr-oqibat va duolar bilan ishtirokchilarning yodida qoldi.

Tadbirda tuman hokimi Sobir Xoʻjametov ishtirok etib, yigʻilganlarni eng ulugʻ, eng aziz bayram — Mustaqillik kuni bilan tabrikladi. Hokim oʻz tabrik soʻzida istiqlol yillarida yurtimiz hayotida erishilgan ulkan oʻzgarishlar, xalqimizning orzu-umidlarini roʻyobga chiqarayotgan islohotlar haqida soʻz yuritib, nuroniylarga sihat-salomatlik, bardavom umr va ezgu tilaklarini izhor etdi.

Turli noz-neʼmatlar bilan bezatilgan dasturxon atrofida yigʻilgan nuroniylar istiqlolning eng buyuk neʼmat ekanini, mustaqillik tufayli xalqimiz hayoti tubdan yangilanganini, yurtimiz taraqqiyot sari yuksalayotganini taʼkidlab, bugungi dorilomon kunlarga shukronalar keltirdilar.

Darhaqiqat, bugun xalqimiz istiqlol tufayli oʻz taqdirini oʻzi belgilayotgan, erkin va ozod hayot kechirayotgan millatga aylandi. Mustaqillik bizga eng avvalo milliy qadriyatlarimizni tiklash, tarixiy xotiramizni qayta jonlantirish, ezgu orzu-intilishlarimizni amalga oshirish imkonini berdi. Istiqlol tufayli yurtimizda tinchlik va osoyishtalik qaror topdi, farovon hayot sari yoʻl ochildi. Muhtaram Prezidentimiz rahnamoligida amalga oshirilayotgan keng qamrovli islohotlar, taʼlim-tarbiya, sogʻliqni saqlash, iqtisodiyot, qishloq xoʻjaligi va boshqa sohalarda erishilayotgan yutuqlar – bularning barchasi mustaqillik tufayli qoʻlga kiritilmoqda.

Yurtimizda hukm surayotgan hamjihatlik va totuvlik nuroniylarimizning dasturxon boshida qilayotgan duolarining ijobati, desak aslo mubolagʻa boʻlmaydi. Tadbirga yigʻilgan nuroniylar ham avvalo istiqlolimizga abadiylik, yurtimizga tinchlik va osoyishtalik, dasturxonlarimizga toʻkin-sochinlik, xalqimizga tinchlik-omonlik va davlatimizga yuksak taraqqiyot tilab, duolar qildilar. Qolaversa, “oq oltin” xalqimizning boyligi, mamlakatimizning iqtisodiy barqarorligida muhim oʻrin tutuvchi xom ashyo ekanini taʼkidlab, uni nest-nobud qilmay yigʻib-terib olishda hamjihatlik bilan harakat qilish zarurligini qayd qilgan holda, paxtakor dehqon va fermerlarimizga kuch-gʻayrat, shijoat, ishlariga samara tilab, duoga qoʻl ochdilar.

Tadbirda faxriy nuroniylar ham soʻz olib, samimiy tabrik va tilaklarini bildirdilar. Ularning har bir soʻzi hayotiy tajriba, oqibat va duoga boy boʻlib, barcha yigʻilganlarda yuqori taassurot qoldirdi.  

Tadbir mobaynida tuman Madaniyat boʻlimi xonanda va ijodkorlari tomonidan kuylangan qoʻshiq va navolar yigʻilganlarga haqiqiy bayramona kayfiyat ulashdi. Milliy ruh va zamonaviy ohang uygʻunligida jaranglagan kuy-qoʻshiqlar nuroniylarning qalbiga quvonch bagʻishladi. Ijodkorlarning samimiy chiqishlari, dilbar ohanglari va dilrabo kuy-qoʻshiqlari tadbirning tantanavor ruhini yanada yuksaltirdi.

Bayramlar arafasida oʻtkazilgan bunday xayrli tadbirlarning ahamiyati beqiyosdir. Zero, nuroniylarga koʻrsatilayotgan eʼtibor va ehtirom, ularga yaratilayotgan sharoit va gʻamxoʻrlik — bu, avvalo, yosh avlod uchun ibrat namunasidir. Mehr-oqibat, duo-yu tilaklar va jamiyatdagi birdamlik kayfiyati ana shunday uchrashuvlarda yanada mustahkamlanadi. Bu esa el-yurtni ezgu maqsadlar yoʻlida birlashtiradi, hamjihatlik va barqarorlikni taʼminlaydi.

Shu bois, Mustaqillik bayrami va paxta yigʻim-terimi mavsumi arafasida oʻtkazilgan mazkur uchrashuv nafaqat nuroniylar uchun eʼtibor ramzi, balki butun tuman hayotida birlik, totuvlik va ezgu niyatlarning timsoli sifatida yodda qoladi.

Charos Arslonova, tuman hokimligining Axborot xizmati rahbari.