PEDAGOG-TARBIYaChILAR UChUN “METODIK MAHORAT SOATI” OʻQUV-SEMINARI OʻTKAZILDI
Mamlakatimizda maktabgacha taʼlim tashkilotlari faoliyatini jahon andozalari darajasida takomillashtirish, sohaga ilgʻor xorijiy tajribalarni, shu bilan birga davlat maktabgacha taʼlim tashkilotlarida faoliyat olib boruvchi yuqori malakali pedagog-tarbiyachilarning namunali innovatsion gʻoyalarini keng joriy etish orqali tarbiyalanuvchilarning qobiliyat va iqtidorlarini rivojlantirishga alohida eʼtibor qaratilmoqda.
Bu borada Amudaryo tuman Maktabgacha va maktab taʼlimi boʻlimi tasarrufidagi davlat maktabgacha taʼlim tashkilotlarida “Metodik mahorat kuni” doirasida amalga oshirilayotgan ishlar oʻzining ijobiy samarasini bermoqda.
Xususan, Oʻzbekiston Respublikasi Maktabgacha va maktab taʼlimi Vazirligining 2025-yil 2-sentyabr kungi buyrugʻi ijrosini taʼminlashga qaratilgan chora-tadbirlar tufayli tumandagi tayanch maktabgacha taʼlim tashkilotlarida malakali trener-mentorlar tomonidan innovatsion treninglar, oʻquv-seminar mashgʻulotlari olib borilmoqda.
Joriy yilning 7-oktyabr sanasida tumandagi 40-sonli va 5-sonli tayanch maktabgacha taʼlim tashkilotlarida “Metodik mahorat kuni” doirasida "Metodik mahorat soati” oʻquv-seminari tashkil etildi. Oʻquv-seminarini tuman Maktabgacha va maktab taʼlimi boʻlimining bosh uslubchisi Hulkar Babajanova ochdi va maktabgacha taʼlim tizimiga ilgʻor xorijiy tajribalarni keng joriy etishning afzalliklari xususida batafsil soʻz yuritdi.
Mazkur oʻquv-seminari 40-sonli va 5-sonli davlat maktabgacha taʼlim tashkilotlarida oʻtkazilib, har birida 27 nafardan pedagog-tarbiyachilar ishtirok etishdi va ularga malakali trenerlar tomonidan sohaga oid qimmatli maslahat va tavsiyalar berildi.
“Maktabgacha yoshda kognitiv rivojlanishni qoʻllab-quvvatlash” mavzusida oʻtkazilgan “Metodik mahorat soati” oʻquv-seminari yuqori saviyada tashkillashtirildi. Har ikkala davlat maktabgacha taʼlim tashkilotida oʻtkazilgan oʻquv-seminari avvalida malakali trenerlar – 40-sonli davlat maktabgacha taʼlim tashkiloti direktorining oʻrinbosari Albina Esnazarova hamda 5-sonli davlat maktabgacha taʼlim tashkiloti direktorining oʻrinbosari Gulchehra Yuldashevalar tadbirning maqsadi va kutilayotgan natijalari yuzasidan zarur maʼlumotlar berdilar. Ular “Maktabgacha yoshda kognitiv rivojlanishni qoʻllab-quvvatlash” mavzusidagi maʼruzalari orqali sohaga xorijiy tajribalarni keng joriy etish boʻyicha har biri 3 soatlik koʻrgazmali dars-mashgʻulotlarini olib bordilar.
Maktabgacha yoshdagi bolalarda kognitiv rivojlanishni qoʻllab-quvvatlash Singapurcha yondashuv boʻlib, bunda bolalarda elementar matematik koʻnikmalarni rivojlantirish, oʻqitish yondashuvi, savol-javoblar va tadqiqotga asoslangan oʻquvning dastlabki bosqichida bolaga hisoblashni oʻrgatish muhim ekanligi alohida taʼkidlandi.
Aynan ana shunday asosda olib borilgan taʼlimiy va tarbiyaviy ishlar bolaning barqaror rivojlanishini taʼminlaydi va eslab qolish qobiliyati, taʼlimiy mashgʻulotlarni oʻzlashtirish koʻnikmalari, iqtidori shakllanadi.
Yuqori ishchanlik ruhida oʻtkazilgan oʻquv-seminar mashgʻulotlari ishtirokchilar uchun qiziqarli taassurotlarga boy, savol-javoblar va oʻzaro tajriba almashuvlar asosida oʻtgani bilan muhim ahamiyatga ega boʻldi. Mazkur tadbir orqali oʻquv-seminar ishtirokchilari nafaqat xorijiy tajribalarni, balki milliy-maʼnaviy qadriyatlarga asoslangan innovatsion gʻoyalarni amaliyotga joriy etish boʻyicha qimmatli maʼlumotlarga ega boʻldilar.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
