FAROVON MAHALLASIDAGI EHTIYoJMAND OILALAR DOIMIY EʼTIBORDA

Ijtimoiy himoya odamlar nigohida nogironligi boʻlgan shaxslar, kam taʼminlangan oilalar, keksa yoshdagi odamlarning hayoti bilan bogʻliqdek koʻrinadi. Ammo mantiqan olib qaraydigan boʻlsak, hozirgi kunda ijtimoiy himoya taʼlim, sogʻliqni saqlash, ijtimoiy-maʼnaviy hayotning turli jabhalariga kirib bormoqda.

Mangʻit shahrining Farovon mahallasida ham nogironligi boʻlgan bolalarning inklyuziv taʼlimga jalb qilinishi, ularning sogʻligʻini mustahkamlash maqsadida nogironligi boʻlgan muhtoj shaxslarga protez-ortopediya moslamalari va reabilitatsiya vositalarini navbat kutmasdan vaucher asosida, 20 foiz ragʻbatlantirish sifatida taqdim etilayotgani kompleks ijtimoiy xizmat har bir ehtiyojmand oilaga kirib borganidan dalolatdir.

“Mahalla yettiligi” bilan hamkorlikda uyma-uy kirib borib oʻtkazilgan xatlov natijalariga koʻra, mahalla hududidagi 2534 nafar aholining turmush tarzi individual yondashuv asosida oʻrganildi va 88 nafar nogironligi boʻlgan shaxslar, 63 nafar kam taʼminlangan oilalar, 1 nafar oʻzgalar parvarishiga muhtoj yakka-yolgʻiz fuqaro kompleks ijtimoiy xizmatlar bilan qamrab olindi. Shuningdek, protez-ortopediya moslamalari va reabilitatsiya vositalariga muhtoj 7 nafar nogironligi boʻlgan shaxs vaucher asosida zarur moslamalari bilan taʼminlandi.

Oʻzgalar parvarishiga muhtoj keksalar va nogironligi boʻlgan shaxslarning kundalik hayot tarzini yaxshilash boʻyicha ham tegishli choralar koʻrildi. Unga koʻra, 6 nafar oʻzgalar parvarishiga muhtoj fuqarolarga ijtimoiy xizmat koʻrsatuvchi assisentlar biriktirildi. 15 ta kambagʻallik reyestri roʻyxatidagi muhtoj oilalarga uch nafar koʻngilli homiy biriktirilib, bu oilalar ham har tomonlama qoʻllab-quvvatlandi.

Mahalla ahlining oʻzaro hamjihatligi tufayli turli bayram sanalari munosabati bilan kambagʻallik reyestriga kiritilgan, shuningdek, kam taʼminlangan va ehtiyojmand oilalar, nogironligi boʻlgan shaxslarni yoʻqlab borish, ularning koʻngillarini koʻtarish, bayramona kayfiyat ulashish maqsadida xayr-saxovat tadbirlarini oʻtkazish doimiy anʼanaga aylangan.

Har bir oilada bayram shukuhi hukm surishi uchun bayramlar arafasida sovgʻa-salomlar ulashish, ayniqsa, nogironligi boʻlgan bolajonlar qalbida hayotsevarlik tuygʻularini uygʻotish maqsadida ularning har biri bilan muloqotlar oʻtkazish, inklyuziv taʼlim bilan qamrab olish orqali alohida qobiliyat va iqtidorlarini namoyon etishlari uchun shart-sharoitlar yaratishga eʼtibor qaratiladi.

Ayni kunlarda Farovon mahallasida 8-dekabr — Oʻzbekiston Respublikasi Konstitutsiyasi kuni hamda Yangi yil bayramlariga qizgʻin tayyorgarlik koʻrilmoqda. Xalqimiz sevib nishonlaydigan ushbu bayramlar arafasida kam taʼminlangan, ehtiyojmand hamda boquvchisini yoʻqotgan oilalar, nogironligi boʻlgan bolalar va katta yoshdagi shaxslar holidan xabar olish, bayram sovgʻalarini taqdim etish, ularga xushkayfiyat bagʻishlashga qaratilgan tadbirlarni amalga oshirish rejalashtirilgan.