Vatanparvarlik oyligi davom etmoqda
Mamlakatimizda oʻsib kelayotgan yosh avlodni vatanparvarlik ruhida tarbiyalash, ularni milliy-maʼnaviy qadriyatlarga sadoqatli, jasur insonlar qilib kamolga yetkazish bugungi kunning ustuvor vazifalaridan biri hisoblanadi. Ayniqsa, ona Vatanni shunchaki sevish emas, kindik qoni tomgan tabarruk makonni fidoyilik bilan himoya qilish, shu muqaddas makon bilan faxrlanish tuygʻusi bilan yashashga oʻrgatish, ana shunday sadoqatli yoshlar hisobiga milliy armiyamiz tarkibini mustahkamlashga qaratilgan amaliy chora-tadbirlar muhim ahamiyatga ega.
Bu borada Davlat xavfsizlik xizmati Chegara qoʻshinlari harbiy xizmatchilari va hamkor tashkilotlar tomonidan chegaraoldi hududlarda istiqomat qiluvchi yoshlar oʻrtasida “Vatanparvarlik oyligi” doirasida olib borilayotgan vatanparvarlik mavzusidagi targʻibot-tashviqot tadbirlari oʻzining ijobiy samarasini bermoqda va kundan-kunga ushbu tadbirlarda qatnashish istagidagi yoshlar qamrovi ortib bormoqda.
Oʻzbekiston Respublikasi Prezidentining 2025-yil 1-dekabrdagi “Oʻzbekiston Respublikasi Qurolli Kuchlari tashkil etilganligining 34 yilligi hamda Vatan himoyachilari kuni bayramiga tayyorgarlik koʻrish va uni yuqori saviyada oʻtkazish dasturini ijro etish toʻgʻrisida”gi farmoniga koʻra, ayni kunlarda mamlakatimizning barcha hududlarida “Vatanparvarlik oyligi” munosabati bilan yoshlar ishtirokida maʼnaviy-maʼrifiy mavzulardagi uchrashuvlar, Qurolli Kuchlarimizning bugungi qudrati xususidagi muloqot tadbirlari oʻtkazilmoqda.
Ana shunday tadbirlardan biri yaqinda Qoraqalpogʻiston Respublikasi Davlat xavfsizlik xizmati Chegara qoʻshinlari harbiy qismi harbiy xizmatchilari va Amudaryo tumani mutasaddi tashkilotlari masʼullari bilan hamkorlikda amalga oshirildi. Tumanning chegaraoldi hududida joylashgan maktab oʻquvchilari ishtirokida oʻtkazilgan “Ochiq eshiklar kuni” tadbirida yuqori sinflar oʻquvchilari, ularning chaqiruvga qadar boshlangʻich tayyorgarlik fani oʻqituvchilari ishtirok etdilar.
Tadbirda maktab oʻquvchilariga Davlat xavfsizlik xizmati Chegara qoʻshinlari harbiy zobitlari tomonidan Milliy Armiyamizning bugungi qudrati, harbiylar salohiyati, Qurolli Kuchlarining jangovarlik holati toʻgʻrisida qimmatli maʼlumotlar taqdim etildi. Shuningdek, tadbir jarayonida zamonaviy harbiy texnikalar va qurol-aslahalar, xizmat hayvonlaridan harbiy xizmat jarayonida foydalanish toʻgʻrisida koʻrgazmali chiqishlar namoyish qilindi. Ayniqsa, harbiy xizmat jarayonida xizmat itlaridan foydalanish borasidagi koʻrgazmali chiqish yoshlarda katta qiziqish uygʻotdi. Unda xizmat itining turli buyruqlarni benuqson bajarishi, shuningdek, shartli chegara buzuvchini ushlab berishdagi jasorati ona Vatan himoyachisi boʻlish orzusidagi yoshlarda unutilmas taassurotlar qoldirdi.
“Ochiq eshiklar kuni” tadbiri davomida harbiy xizmatchilar bilan maktab oʻquvchilari ishtirokida davra suhbati ham oʻtkazildi. Davra suhbati maktab oʻquvchilari uchun qiziqarli taassurotlarga boy boʻldi. Unda oʻquvchi-yoshlar harbiy xizmat yoʻnalishlari, mamlakatimizdagi oliy hamda oʻrta maxsus harbiy bilim yurtlaridagi mutaxassisliklar, mazkur bilim yurtlariga qabul jarayonlari, Qurolli Kuchlar safida xizmat qilish qonun-qoidalari boʻyicha oʻzlarini qiziqtirgan savollar bilan murojaat qildilar va barcha savollariga harbiylar tomonidan batafsil javoblar oldilar.
Shuningdek, tadbir davomida yoshlar oʻrtasida sportning arqon tortish yoʻnalishi boʻyicha kuch sinash musobaqalari hamda maktab oʻquvchilari va harbiy xizmatchilari oʻrtasida “Zakovat” intellektual oʻyini tashkillashtirildi. Arqon tortishish musobaqalari hamda “Zakovat” intellektual oʻyinida faollik koʻrsatgan gʻolib jamoaga diplom va esdalik sovgʻalar topshirildi.
“Vatanparvarlik oyligi” doirasidagi bu kabi tadbirlar Qoraqalpogʻiston Respublikasi boʻylab davom etmoqda.
Robiya Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
