«Ekologik madaniyat – sogʻlom kelajak asosi» loyihasi doirasida Qipchoq davlat oʻrmon xoʻjaligi maʼmuriy binosida tadbir oʻtkazildi

Bugungi kunda atrof-muhit muhofazasi va ekologik barqarorlikni taʼminlash global ahamiyatga ega masalalardan biriga aylandi. Amudaryo tumanida faoliyat yuritayotgan “Jayxun ilhomlari” nodavlat notijorat tashkilotining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Ekologik madaniyat – sogʻlom kelajak asosi” nomli grant loyihasi ham ushbu dolzarb masalaga qaratilgani bilan ahamiyatlidir. Mazkur ijtimoiy ahamiyatga ega loyihaning asosiy mazmun-mohiyati aholining ekologik ongi va madaniyatini yuksaltirish hamda ushbu sohada amalga oshirilayotgan ishlarni keng jamoatchilik oʻrtasida targʻib qilishdan iboratdir.

Loyiha doirasida ekologiya va atrof-muhitni muhofaza qilish, tabiiy resurslardan oqilona foydalanishga doir qonun hujjatlarining mazmunini aholining keng qatlamiga yetkazish bosh maqsad qilib olingan. Xususan, tuman hududlarida yashil makonlarni kengaytirish, daraxtlarni asrash va sanitariya holatini yaxshilash orqali aholi salomatligi uchun qulay muhit yaratishga hissa qoʻshish koʻzda tutilgan.

Loyiha doirasida yaqinda “Jayxun ilhomlari” nodavlat notijorat tashkiloti va “Amudaryo TV” telekanali tahririyati hamkorligida Qipchoq davlat oʻrmon xoʻjaligining maʼmuriy binosida tadbir oʻtkazildi.

Tadbirning asosiy mavzusi oʻrmon va toʻqayzorlarni asrash, hududdagi daraxtlarni noqonuniy kesish holatlarining oldini olishga qaratildi. Yigʻilishda tumanning Qipchoq hududidagi ovul va mahallalarning sanitariya holati, ekologik vaziyatni yaxshilash borasidagi muammolar va ularning yechimlari ham tahlil qilindi.

Yigʻilishda soʻzga chiqqan loyiha koordinatorlari Robiya Yoʻldosheva, Mahmudjon Shomurodov, Mansur Tojiboyev va boshqalar ekologik muammolarning oqibatlari, tabiatni asrashdagi har bir fuqaroning shaxsiy masʼuliyati haqida keng turda toʻxtaldilar.

Taʼkidlanganidek, oʻrmonlar – tabiatning oʻpkasi boʻlib, ular nafaqat havo musaffoligini taʼminlaydi, balki tuproq eroziyasining oldini olish, yer osti suvlarini saqlash va bioxilma-xillikni asrashda muhim omil hisoblanadi. Shu bois, Qipchoq davlat oʻrmon xoʻjaligi tasarrufidagi maydonlarda nazoratni kuchaytirish masalasi kun tartibining bosh mavzusiga aylandi. Afsuski, hali-hanuz tabiatga vaxshiylarcha munosabatda boʻlish, daraxtlarni noqonuniy kesish orqali moʻmay daromad orttirishga urinish holatlari uchrab turibdi. Yigʻilishda bunday salbiy holatlarga qarshi kurashishda nafaqat oʻrmon xoʻjaligi inspektorlari, balki keng jamoatchilik, mahalla faollari va huquq-tartibot organlari bilan hamkorlikni yangi bosqichga olib chiqish zarurligi qayd qilindi.

Shuningdek, muhokamalar davomida tumanning aholi yashash punktlari – ovul va mahallalardagi ekologik vaziyatga ham alohida eʼtibor qaratildi. Hududlardagi sanitariya holatini yaxshilash, chiqindilarni belgilanmagan joylarga tashlashning oldini olish va aholi orasida ekologik madaniyatni yuksaltirish borasidagi ishlar tahlil qilindi. Har mavsumda "Yashil makon" umummilliy loyihasi doirasida mahallalarda manzarali va mevali daraxt koʻchatlarini ekish, yashil hududlarni kengaytirish ishlarini jadallashtirish lozimligi qayd etildi. Zero, toza va ozoda mahalla, yashillikka burkangan koʻchalar – aholi salomatligi va farovonligining asosidir.

Yigʻilishdan keyin Qipchoq davlat oʻrmon xoʻjaligida amalga oshirilayotgan ishlar koʻzdan kechirildi. Xoʻjalik masʼullari taʼkidlaganlaridek, ular zimmasidagi vazifa faqatgina mavjud daraxtlarni qoʻriqlash bilan cheklanib qolmaydi. Oʻrmon xoʻjaligi masʼullarining bosh vazifasi – tabiat va jamiyat oʻrtasidagi uygʻunlikni taʼminlash, oʻrmon fondi yerlaridan oqilona foydalanish, yoʻqolib ketish xavfi ostida turgan oʻsimlik turlarini qayta tiklash va koʻpaytirish hamda mevali va manzarali daraxt koʻchatlari nihollarini koʻpaytirib, hududning yashilligiga hissa qoʻshishdan iboratdir. Xoʻjalik masʼullari jurnalistlarga bu borada amalga oshirilayotgan keng koʻlamli amaliy ishlar haqida batafsil maʼlumotlar berdi.

Qipchoq davlat oʻrmon xoʻjaligida boʻlib oʻtgan ushbu tadbir tabiatimizni asrash yoʻlidagi saʼy-harakatlarni birlashtirish hamda kelajak avlodga obod va farovon Vatan qoldirish yoʻlidagi muhim amaliy qadam boʻldi.