Mahalliy Kengash deputatlarining faolligi oshmoqda

Mamlakatimizda soʻnggi yillarda demokratik islohotlarni chuqurlashtirish, xalq hokimiyatchiligini toʻlaqonli taʼminlash hamda davlat boshqaruvini aholi manfaatlariga xizmat qiluvchi tizimga aylantirish borasida izchil chora-tadbirlar amalga oshirilmoqda. Bu jarayonda xalq deputatlari mahalliy Kengashlarining oʻrni va ahamiyati sezilarli darajada ortib bormoqda. Ayniqsa, hududlarni ijtimoiy-iqtisodiy rivojlantirish, aholini ijtimoiy himoya qilish, joylardagi muammolarni oʻz vaqtida aniqlash va bartaraf etishda mahalliy Kengashlar deputatlarining faolligi kuchaymoqda.

Soʻnggi yillarda qabul qilingan qonun hujjatlari mahalliy Kengashlarning nazorat funktsiyalarini kuchaytirishga qaratildi. Xususan, mahalliy darajada davlat organlari rahbarlarining hisobdorligi belgilab qoʻyilib, ularning oʻz faoliyati yuzasidan xalq vakillari oldida muntazam hisobot berib borishi yoʻlga qoʻyildi.

Bugungi kunda prokuratura, adliya, ichki ishlar, moliya, soliq, ekologiya va sogʻliqni saqlash organlari rahbarlarining mahalliy Kengashlar oldida hisobot berish amaliyoti joriy etilgan boʻlib, bu orqali davlat organlari faoliyatining ochiqligi va shaffofligi taʼminlanmoqda. Shu bilan birga, aholini qiynab kelayotgan muammolarni hal etishda deputatlik soʻrovlari institutining ahamiyati yanada ortmoqda.

Xalq deputatlari Amudaryo tuman Kengashi ham ushbu islohotlarni amalga oshirishda faol ishtirok etib kelmoqda. Tuman Kengashi tarkibi 25 nafar deputatdan iborat boʻlib, ular joylarda aholining manfaatlarini ifoda etish va himoya qilish yoʻlida izchil faoliyat olib bormoqda. Shu kunga qadar Kengash tomonidan 17 ta sessiya oʻtkazilib, ularda jami 145 ta masala koʻrib chiqildi hamda tegishli qarorlar qabul qilindi.

Sessiyalarda asosiy eʼtibor aholini qiynab kelayotgan muammolarni muhokama qilish, ularning yechimini topish va ijrosini nazorat qilishga qaratildi. Shu maqsadda deputatlar tomonidan joylarda 239 marotaba aholi bilan uchrashuvlar tashkil etildi. Ushbu uchrashuvlarda turli sohalarda faoliyat yurituvchi tegishli tashkilot va idoralar rahbarlarining 38 ta hisoboti hamda 13 ta axboroti tinglandi. Uchrashuvlar davomida aniqlangan muammolarni bartaraf etish uchun masʼul tashkilotlarga 86 ta deputat soʻrovlari yuborildi.

Deputat — bu xalq vakili, xalq dardini tinglab, uni yechish yoʻlida amaliy choralar koʻruvchi shaxsdir. Shu maʼnoda, Xalq deputatlari Amudaryo tuman Kengashiga 3-Doʻstlik saylov okrugidan saylangan deputat Madamin Kazakovning faoliyati eʼtiborga molikdir. U tuman Kengashida Mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiya raisi sifatida samarali faoliyat olib bormoqda.

Madamin Kazakov oʻz deputatlik faoliyati davomida aholini qiynab kelayotgan muammolarni bartaraf etish maqsadida masʼul tashkilotlarga 7 ta deputat soʻrovlari kiritgan. Ushbu soʻrovlar asosida bir qator ijobiy natijalarga erishilgan. Jumladan, aholi bilan uchrashuvlardan birida Farovon mahallasi aholisini tashvishga solib kelayotgan oqava suv tizimini yaxshilash hamda koʻprik qurish masalasi koʻtarilgan edi. Deputat tomonidan mazkur muammolar tegishli davlat tashkilotlariga yoʻnaltirilib, natijada muammolarga ijobiy yechim topildi. Ayni paytda Yangiobod mahallasidan Farovon mahallasiga kirish joyidagi zovurga oʻrnatilgan talabga javob bermaydigan temir koʻprik buzilib, mustahkam koʻprik qurilmoqda. Bu ishlarda aholining hissasi ham katta boʻlmoqda.

Bu kabi ishlar xalq deputatlari mahalliy Kengashlarining aholi hayotidagi ahamiyatini yanada oshirib, davlat organlari faoliyatini xalq manfaatlariga yoʻnaltirishda muhim omilga aylanmoqda. Mahalliy Kengashlar faoliyatini yanada takomillashtirish esa yurtimizda demokratik islohotlarning izchil davom etishini taʼminlaydi.

Zero, “Oʻzbekiston — 2030” strategiyasida belgilangan ustuvor vazifalar mahalliy davlat hokimiyati vakillik organlarini xalqning haqiqiy “ovozi”ga aylantirishni taqozo etmoqda. Ushbu strategik maqsadlar mahalliy ijro etuvchi hokimiyat organlari faoliyatini tubdan transformatsiya qilish, hududiy boshqaruvni “aholi manfaatlariga xizmat qilish” tamoyili asosida yoʻlga qoʻyishni talab etadi. Xalq deputatlar Amudaryo tuman Kengashi deputatlarining faoliyati ushbu yoʻnalishda mahalliy Kengashning faol, tashabbuskor va masʼuliyatli pozitsiyani egallaganidan dalolat beradi.

Shu oʻrinda aytish kerakki, yangi tahrirdagi Oʻzbekiston Respublikasi Konstitutsiyasida mahalliy davlat hokimiyati vakillik organlari hamda ijro etuvchi hokimiyat organlari vakolatlarining aniq belgilab qoʻyilishi, mahalliy Kengash raisi va hokim lavozimlarining bir-biridan ajratilgani ham hokimiyatlar boʻlinishiga oid konstitutsiyaviy tamoyilning mahalliy darajada toʻlaqonli amalga oshirilishiga xizmat qilmoqda. Bu esa mahalliy Kengashlarning mustaqilligini oshirib, ularning aholi manfaatlarini himoya qilishdagi rolini kuchaytirmoqda.