Yoshlarning huquqiy savodxonligini yuksaltirish va kasbga yoʻnaltirish borasida amaliy muloqotlar tashkil etildi
Mamlakatimizda huquqiy demokratik davlat va kuchli fuqarolik jamiyati barpo etish yoʻlida amalga oshirilayotgan islohotlarning muvaffaqiyati, hech shubhasiz, yoshlarning huquqiy ongi va madaniyati qay darajada rivojlanganligiga bevosita bogʻliq. Soʻnggi yillarda Oʻzbekistonda oʻsib kelayotgan yosh avlodni qonunga itoatkorlik ruhida tarbiyalash hamda ularning kelajakda munosib va jamiyat uchun foydali kasb egalari boʻlib yetishishlarini taʼminlash davlat siyosatining eng ustuvor yoʻnalishlaridan biriga aylangan. Ushbu ezgu maqsadlarni hayotga tatbiq etish, oʻquvchi-yoshlar oʻrtasida turli huquqbuzarliklarning oldini olish hamda ularning huquqni muhofaza qiluvchi organlar faoliyatiga boʻlgan qiziqishini yanada ragʻbatlantirish maqsadida joylarda turli maʼrifiy tadbirlar, seminarlar va ochiq muloqotlar muntazam ravishda oʻtkazib kelinmoqda.
Amudaryo tumanidagi 1-sonli politexnikum hamda 40- va 1-sonli umumtaʼlim maktablari binolarida aynan yuqoridagi maqsadlarga xizmat qiluvchi, yoshlarning huquqiy ongi va bilimlarini mustahkamlashga qaratilgan keng qamrovli uchrashuvlar boʻlib oʻtdi.
Uchrashuvlarda sohaning yetuk va tajribali mutaxassislari, mahalliy davlat hokimiyati vakillari va huquq-tartibot idoralarining rahbar xodimlari bevosita ishtirok etib, yoshlar bilan yuzma-yuz, samimiy muloqot qildilar. Tadbirlarda Oʻzbekiston Respublikasi Bosh prokuraturasi huzuridagi Huquqni muhofaza qilish akademiyasining masʼul xodimi Alisher Yesemuratov, Qoraqalpogʻiston Respublikasi prokuraturasining katta prokurori Rasul Jalgʻasbayev, shuningdek, Amudaryo tumani hokimining oʻrinbosari Nodirbek Kamolov hamda tuman prokurorining yordamchisi Sanjar Abdullayevlarning ishtirok etdi.
Soʻzga chiqqan soha mutaxassislari tomonidan Oʻzbekiston Respublikasi Bosh prokuraturasi huzuridagi Huquqni muhofaza qilish akademiyasining bugungi kundagi faoliyati, ushbu nufuzli oliy taʼlim muassasasiga oʻqishga qabul qilishning zamonaviy va shaffof tartib-qoidalari toʻgʻrisida yigʻilganlarga atroflicha va qiziqarli maʼlumotlar taqdim etildi. Tadbir ishtirokchilariga akademiyadagi mavjud taʼlim yoʻnalishlari, oʻqitishning oʻziga xos innovatsion xususiyatlari batafsil tushuntirildi.
Uchrashuvlar erkin ochiq muloqot va savol-javoblar formatida oʻtdi. Bu esa yoshlarga oʻzlarini qiziqtirgan, yechimini kutayotgan barcha masalalar yuzasidan bevosita mutaxassislardan javob olish imkonini yaratdi. Oʻquvchi-yoshlar tomonidan huquqni muhofaza qilish organlariga ishga kirish jarayonlari, talab etiladigan kasbiy va shaxsiy fazilatlar, prokuratura tizimidagi masʼuliyatli xizmat faoliyati yuzasidan koʻplab savollar berildi. Malakali mutaxassislar va rahbar xodimlar har bir savolga hayotiy misollar va amaldagi qonunchilik hujjatlariga tayangan holda, yoshlar auditoriyasi uchun tushunarli, sodda va atroflicha javoblar qaytardilar. Bunday samimiy muloqot oʻquvchilardagi mavjud tushunmovchilik yoki ikkilanishlarni bartaraf etib, ularning kelajakdagi maqsadlarini yanada oydinlashtirib olishga katta yordam berdi.
Amudaryo tumanidagi taʼlim muassasalarida tashkil etilgan ushbu mazmunli va foydali uchrashuvlar yoshlarning huquqiy bilimlarini oshirib, ularning jamiyatdagi ijtimoiy-siyosiy jarayonlarga boʻlgan faol pozitsiyasini shakllantirish, yurt kelajagiga daxldorlik hissini kuchaytirishga xizmat qildi.
Bu kabi uchrashuvlar oʻsib kelayotgan yosh avlodni qonun-qoidalarga hurmat, yuksak vatanparvarlik va adolatparvarlik ruhida tarbiyalashda mustahkam maʼnaviy poydevor vazifasini oʻtaydi. Qolaversa, ertangi kunimiz egalari boʻlgan yoshlarni huquqni muhofaza qilish organlarida halol va fidokorona xizmat qilishga ragʻbatlantirib, mamlakatimizda qonun ustuvorligini taʼminlashga munosib hissa qoʻshadigan yetuk kadrlar zahirasini shakllantirishda ham bu kabi tadbirlarning ahamiyatm beqiyosdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
