HARBIYLAR VA TALABALAR NAVOIY IJODIYoTI BOʻYIChA “ZAKOVAT” MAYDONIDA KUCh SINAShDI

Buyuk mutafakkir, gʻazal mulkining sultoni Mir Alisher Navoiy tavalludining 585 yilligi mamlakatimizda keng nishonlanmoqda. Ushbu qutlugʻ sana munosabati bilan harbiy qismlar va taʼlim muassasalarida tashkil etilayotgan maʼnaviy-maʼrifiy tadbirlar yoshlarda milliy merosga ehtirom, kitobxonlik va faol fuqarolik pozitsiyasini mustahkamlashga xizmat qilmoqda. Ana shunday tadbirlardan biri Shimoli-gʻarbiy harbiy okrugning Maʼnaviyat va maʼrifat markazida oʻtkazilgan “Zakovat” intellektual oʻyini boʻldi.

Mazkur bellashuvda Nukus garnizonida xizmat qilayotgan harbiy xizmatchilar hamda Nukus innovatsion texnologiyalar universiteti talabalari ishtirok etib, oʻz bilim va zakovatlarini sinovdan oʻtkazdilar.

Tadbirning asosiy gʻoyasi — Vatan himoyachilari va yoshlar oʻrtasida milliy adabiyotimizga, xususan, Hazrat Navoiy ijodiga boʻlgan qiziqishni yanada oshirish, maʼnaviy dunyoqarashni kengaytirishdan iborat boʻldi.

Intellektual bahsda jamoalar Mir Alisher Navoiyning hayot yoʻli, serqirra ijodi, uning mashhur “Xamsa” asari, tarixiy shaxslar hamda milliy qadriyatlarimizga oid savollarga javob izladilar. Savollar mazmuni ishtirokchilardan nafaqat faktlarni bilishni, balki mantiqiy xulosa chiqarish, taqqoslash va tezkor qaror qabul qilish koʻnikmalarini ham talab etdi.

Oʻyin davomida, ayniqsa, gʻazalxonlikka oid shartlar katta qiziqish uygʻotdi. Navoiy gʻazallaridan parchalar keltirilib, ularning davomini topish yoki mazmunini qisqa, aniq ifoda etish vazifalari berildi. Bu esa jamoalarning kitobxonlik darajasi bilan birga nutq madaniyati, maʼno anglash va jamoa boʻlib ishlash qobiliyatini ham namoyon qildi. Tomoshabinlar oldida shakllangan doʻstona raqobat muhiti bellashuvga alohida ruh bagʻishlab, har bir toʻgʻri javobdan soʻng zalda quvonchli qarsaklar yangradi.

Tadbirda soʻz olganlar Navoiy asarlarida insonparvarlik, adolat, vatanparvarlik va ilm-maʼrifatga intilish kabi yuksak gʻoyalar mujassam ekanini qayd etib, bu meros bugungi kun yoshlari uchun haqiqiy hayot maktabi ekanini taʼkidladilar. Shu maʼnoda, “Zakovat” kabi intellektual loyihalar bilimni mustahkamlash bilan birga, mafkuraviy immunitetni kuchaytirish, yoshlarning boʻsh vaqtini mazmunli tashkil etish, xizmat va oʻqish muhitida hamkorlik hamda oʻzaro hurmatni oshirishga xizmat qiladi.

Bellashuv yakunida eng yuqori natija koʻrsatgan, zukkoligi va jipsligi bilan ajralib turgan jamoalar tashkilotchilar tomonidan diplom va esdalik sovgʻalar bilan taqdirlandi. Gʻoliblarning eʼtirofi, ishtirokchilarning faolligi va tadbirning mazmunli tashkil etilgani barchaga birdek manzur boʻldi.

Shimoli-gʻarbiy harbiy okrug rahbariyati tashabbusi bilan oʻtkazilgan mazkur “Zakovat” oʻyini shunchaki bellashuv emas, balki buyuk ajdodlarimizga boʻlgan hurmat va eʼtiborning yorqin namunasidir. Zero, Navoiyni, uning buyuk merosini va boy adabiyotimizni anglash harbiylar hamda yoshlar uchun maʼnaviy tayanch va hayotiy yoʻl-yoʻriqdir. Navoiy asarlari insonparvarlik, adolat, vatanparvarlik, matonat va halollik kabi fazilatlarni mustahkamlaydi. Harbiylar uchun bu meros xizmat burchini ongli ado etish, xalqqa sadoqat va xizmat jarayonida qatʼiy intizomni namoyon qilishga yordam beradi. Talab yoshlar esa Navoiy ijodi orqali milliy oʻzlikni his etadi, maʼnaviy immunitetini kuchaytiradi, nutq madaniyati va fikrlash darajasini oshiradi.

Bu kabi maʼnaviy-maʼrifiy tadbirlar yoshlarni vatanparvarlik ruhida tarbiyalash, ularni ilm-maʼrifatga undash va milliy qadriyatlar atrofida birlashtirishda muhim oʻrin tutadi.