9-sonli bolalar musiqa va sanʼat maktabida hisobot kontserti boʻlib oʻtdi

Sanʼat va musiqa inson ruhiyatini poklab, uning qalbida goʻzallikka boʻlgan muhabbatni uygʻotuvchi beqiyos kuchdir. Aynan shu sehrli olamga qadam qoʻygan yosh isteʼdodlar yurtimizning ertangi madaniy qiyofasini yaratadilar, milliy merosimizni butun dunyoga tarannum etadilar. Boʻlajak madaniyat va sanʼat namoyandalari taʼlim olayotgan Amudaryo tumanidagi 9-sonli bolalar musiqa va sanʼat maktabida 2025-2026 oʻquv yilining muvaffaqiyatli yakunlanishi munosabati bilan hisobot kontserti tashkil qilindi.

Hisobot kontsertida Amudaryo tumani hokimi Sobir Xoʻjametov ishtirok etib, 9-sonli Bolalar musiqa va sanʼat maktabi jamoasini, barcha oʻqituvchi va oʻquvchilarni joriy oʻquv yilida qoʻlga kiritilgan yutuqlar, erishilgan yuksak natijalar bilan chin dildan tabrikladi.

Aytish joizki, bugungi kunda mazkur maktabda jami 194 nafar oʻgʻil-qiz sanʼat sirlarini qunt bilan oʻrganmoqda. Ularning orasidan 27 nafar bitiruvchi joriy oʻquv yilida muassasani muvaffaqiyatli tamomlab, katta hayot sari oʻzlarining dastlabki qadamlarini tashlamoqdalar.

Ushbu ijod maskanining tashkil qilinganiga 60-yilga yaqin vaqt boʻldi. 1968-yilda asos solingan maktab dastlabki yillarda faqatgina musiqa yoʻnalishida iqtidorli bolalarni tarbiyalashga ixtisoslashgan edi. Yillar oʻtishi bilan muassasa oʻz koʻlamini kengaytirib, sanʼatning turli sohalarini ham qamrab oldi. 1990-yilda bino qayta qurilib, Hamza nomidagi musiqa maktabi maqomida faoliyatini davom ettirdi.

Mamlakatimizda yosh avlodning madaniyat va sanʼat sohasidagi taʼlimiga qaratilayotgan yuksak eʼtibor va gʻamxoʻrlik natijasida 2015-yilda maktab binosida keng koʻlamli rekonstruktsiya ishlari amalga oshirildi. Natijada, butunlay yangi qiyofa kasb etgan muassasada eng soʻnggi talablarga javob beradigan zamonaviy oʻquv xonalari, keng va yorugʻ mashq zallari hamda haqiqiy ijodiy muhit yaratildi. Bunday keng imkoniyatlar yoshlarning oʻz ustida muntazam ishlashiga, katta sahnalar sari dadil qadam tashlashiga bevosita xizmat qilmoqda.

Bugungi kunda maskanda oʻquv jarayonlari jami 10 ta asosiy yoʻnalish boʻyicha tizimli ravishda olib borilmoqda. Jumladan, fortepiano, xalq cholgʻulari, estrada cholgʻulari, anʼanaviy xonandalik, baxshichilik, tasviriy sanʼat, xoreografiya, estrada xonandaligi, anʼanaviy ijro hamda amaliy sanʼat sinflarida oʻquvchilarning ijodiy tafakkuri va estetik didi shakllantirilmoqda, ularning ichki dunyosi boyitilmoqda. Bu masʼuliyatli va sharafli vazifani oʻz kasbining fidoyisi boʻlgan 36 nafar pedagoglar amalga oshirib kelmoqda. Ularning 19 nafari oliy maʼlumotli mutaxassislar boʻlsa, 17 nafari maxsus musiqa va sanʼat kollejlarini tamomlagan tajribali ustozlardir. Pedagoglar doimiy ravishda tasdiqlangan reja-jadvallar asosida malaka oshirish markazlarida hamda sanʼat maktab-internatlarida oʻz kasbiy mahoratlarini, nazariy va amaliy bilimlarini muntazam oshirib bormoqdalar.

Hisobot kontserti davomida fidoyi oʻqituvchilar va faol oʻquvchilarga Bolalar musiqa va sanʼat maktabining faxriy yorliqlari va esdalik sovgʻalari topshirildi. Maktab direktori Toʻliboy Hayitboyev, tuman Madaniyat boʻlimi boshligʻi Murod Ibragimov va maktab faxriysi Yoʻldosh Abdalovlar oʻquvchilarni yana bir oʻquv yilining muvaffaqiyatli yakuni, bitiruvchilarni esa katta hayotga qadam qoʻyayotgani bilan tabriklab, kelgusi ishlarida omad va muvaffaqiyatlar tiladilar.

Mazkur taʼlim muassasasi oʻquvchilari turli milliy va xalqaro koʻrik-tanlovlarda yuqori natijalarni qayd etib, joriy oʻquv yilini muvaffaqiyatli yakunlamoqdalar. Jumladan, "Khiva Art Fest – 2025" hamda "Zamin yulduzlari – 2026" xalqaro tanlovlarida jami 10 nafar oʻquvchi Gran-pri mukofotini, 23 nafar oʻquvchi 1-oʻrinni, 18 nafar oʻquvchi 2-oʻrinni va 14 nafar oʻquvchi 3-oʻrinni qoʻlga kiritdi. "Orolim ovozi – 2026" koʻrik-tanlovida esa 11 nafar oʻquvchi Gran-pri, 21 nafar oʻquvchi 1-oʻrin, 10 nafar oʻquvchi 2-oʻrin va 4 nafar oʻquvchi 3-oʻrin sohibi boʻldi. Shu bilan birga, "Yoshlar ovozi" tanlovining Qoraqalpogʻiston Respublikasi bosqichida 2 nafar oʻquvchi 2-oʻrinni band etdi.

Birgina oʻtgan may oyida erishilgan muvaffaqiyatlarni sanab oʻtsak: Jizzax shahrida boʻlib oʻtgan "Zamin yulduzlari – 2026" xalqaro koʻrik-tanlovida maktabning "Tasanno" raqs dastasi xoreografiya yoʻnalishi boʻyicha eng oliy mukofot – Gran-pri sohibiga aylandi. Yakka raqs ijrochiligida esa Shahrizoda Gulmirzoyevva 3-oʻrinni qoʻlga kiritdi. Anʼanaviy xonandalik yoʻnalishida "Amu yulduzlari" maqomchilar ansambli, shuningdek, Asadbek Jumaboyev va Abbos Bahramovlar mutlaq gʻolib deb topilib, 1-oʻringa sazovor boʻldi. Behruz Sergeyev hamda Temur Tirkashevlar 2-oʻrinni, Sardor Koʻklanov esa 3-oʻrinni qoʻlga kiritishdi. Estrada xonandaligi yoʻnalishida Sunnatillo Kenjaboyev va Sarvar Gulmirzoyev 3-oʻrin sovrindorlari qatoridan joy oldi.

Xalq cholgʻulari yoʻnalishida "Guldasta" dutorchilar ansambli, Ilyos Mahmudov, Izzat Anvarov, Amirxon Alimboyev hamda Diyorbek Baymuradovlar 1-oʻrinni egallashdi. Diyorbek Boltoboyev, Qadam Sharipov, Diyorbek Gulmanov, Azizbek Ernafasov, Farmonbek Yunusov hamda Asaloy Yusupova va Ilyos Mahmudovlar dueti faxrli 2-oʻringa munosib koʻrildi. Ravshan Gulmirzoyev, Behruz Ahmadjonov, Diyorbek Sultonboyev, Nurhosil Kengashboyev va Abdulla Baxtiyorovlar 3-oʻrin sovrindorlariga aylangan boʻlsa, fortepiano yoʻnalishida Aslzoda Yoʻldoshev 1-oʻrin sohibi boʻldi.

Bu kabi yutuqlari bilan Amudaryo tumanidagi 9-sonli bolalar musiqa va sanʼat maktabi oʻquvchilari mazkur taʼlim dargohi nomini butun respublika va xalqaro maydonlarda baland jaranglatib, oʻzbek milliy madaniyati va sanʼatining ertangi kuni naqadar ishonchli qoʻllarda ekanligini isbotladilar. Ularning zafarli yurishlari hech qachon toʻxtamasligiga, sanʼat choʻqqilarini zabt etishda doimo peshqadam boʻlishlariga tilakdoshmiz!