TAʼLIM-TARBIYaDA IKKINChI DARAJALI VAZIFA YOʻQ

Bizning "Barkamol avlod” bolalar markazimiz maktabdan tashqari taʼlim muassasasi boʻlib, oʻquvchilarga qoʻshimcha taʼlim berish, ularning maktabdan tashqari boʻsh vaqtlarini mazmunli tashkil etish, ular ongida milliy va umumbashariy qadriyatlarga asoslangan yuksak maʼnaviy-axloqiy fazilatlarni tarbiyalash, oʻz Vatani va xalqiga sadoqat, atrof- muhitga ongli munosabatda boʻlish tuygʻusini rivojlantirish, ajdodlarimizning boy tarixi, madaniy meroslari va milliy qadriyatlarini yosh avlodga yetkazish, shuningdek oʻquvchilarda boshlangʻich kasb-hunar va mehnat koʻnikmalarini hosil qilish maqsadida faoliyat olib bormoqda.

Markazimizda texnik ijodkorlik, badiiy ijodiyot hamda oʻlkashunoslik va ekologiya yoʻnalishlarida toʻgaraklar tashkil etilgan.

Yakunlangan oʻquv yilida markazimizda 42 ta toʻgarakda 954 nafar oʻquvchilar qatnashib, turli kasblar boʻyicha boshlangʻich taʼlim oldilar. Ayniqsa Gulasal Ollombergenova rahbarligidagi toʻqish toʻgaragi, Shahlo Eshimbetova rahbarligidagi "Boshlangʻich texnik modellashtirish”, Nilufar Avezova va Zamira Otaboyeva rahbarligidagi "Yosh ekolog”, Zulfiya Ollayorova rahbarligidagi "Yosh jurnalist va notiq” toʻgaraklari samarali faoliyat olib bordi. Uslubchi Shokir Xudoybergenov rahbarligidagi  "Shoʻx bolalar” jamoasi, Manzura Ashirboyeva rahbarligidagi "Amu” guruhi tumanimizdagi madaniy-maʼrifiy tadbirlarda faol qatnashib kelayotganligidan  faxrlanamiz.

Oʻquvchilarimizning toʻgaraklar faoliyatiga qiziqishlarini oshirish va kengroq jalb qilish maqsadida turli madaniy-maʼrifiy tadbirlar oʻtkazilmoqda. Vatanimiz Mustaqilligining 24 yilligi munosabati bilan "Betakrorimsan, yagonasan, ona Vatanim - Oʻzbekistonim!” shiori ostida tuman "Mahalla” xayriya jamoat fondi, "Olmazor” mahalla fuqarolar yigʻini bilan hamkorlikda "Uch avlod uchrashuvi”, "Xotira uygʻonsa goʻzaldir”, "Faxriylarimiz-faxrimiz” mavzusidagi tadbirlarda Mangʻit shahri mahallalarida  yashovchi mehnat faxriylari, yoshlar vakillari ishtirok etishdi va markazimiz faoliyati bilan yaqindan tanishishdi.

Yozgi taʼtil kunlarida oʻquvchilarning boʻsh vaqtlarini mazmunli oʻtkazish maqsadida har haftaning shanba kuni toʻgaraklar aʼzolari tomonidan koʻrgazma va kontsert dasturlari tashkil etildi.  "Biz baxtli bolalarmiz”, "Farzandlari sogʻlom yurt qudratli boʻlur”, "Avlodlar yodi qalbimizda”, "Aytgil doʻstim, nima qilding Vatan uchun?” kabi mavzularda  oʻtkazilgan tadbirlar barchaga manzur boʻldi.

Bugungi kunda markazimizda oʻquvchilarga kasb-hunar oʻrgatish uchun barcha shart-sharoitlar muhayyo. 2015 oʻquv yilida yangidan 10 million 434 ming soʻmlik duradgorlik stanoklari, 9 million soʻmlik tikuv mashinalari, 16 dona kompyuter, videokamera, fotoapparatlar, 52 million soʻmlik  yangi mebellar berilishi markazimizda yoshlar tarbiyasi borasidagi ishlarni yanada yaxshilash imkonini berdi.

Oʻzbekiston Respublikasi Vazirlar Mahkamasining 2011-yil 11-maydagi 130-sonli qaroriga asosan "Barkamol avlod” bolalar markazlarida toʻgarak mashgʻulotlari har yili 15-sentyabrdan boshlanadi. Har yilgi anʼanaga  koʻra shu kuni "Ochiq eshiklar” kuni oʻtkaziladi va birinchi mashgʻulot har bir toʻgarakda "Mustaqillik darsi” bilan boshlanadi. Jamoamiz aʼzolari ushbu kunga puxta tayyorgarlik koʻrmoqdalar.

Taʼlim-tarbiya jarayonida hech bir masalaning katta-kichigi boʻlmaydi. Chunki farzandlarimiz uchun bizning oiladagi har bir xatti-harakatimizning  taʼsiri boʻlganidek,  jamoada ham atrofdagi ustozlar,   tengdoshlar, doʻstlarining har bir harakatidan ular yoshiga yarasha xulosa olishadi. Bizning maqsadimiz esa ularga toʻgʻri yoʻl koʻrsatib, iqtidorlariga yarasha kasb tanlashida koʻmaklashishdan iboratdir.

Xonimjon RAJABOVA,

"Barkamol avlod” bolalar markazi direktori.