MAQSADIMIZ – YoShLAR KAMOLI
Bugungi kunda yoshlarga puxta taʼlim-tarbiya berish bilan bir qatorda oʻzlari qiziqqan sohani sidqidildan oʻrganishiga, kasb malakasi va koʻnikmasiga ham ega boʻlib, mustaqil hayotga dadil kirib borishiga erishish oʻrta maxsus, kasb-hunar taʼlimi muassasalari oldidagi dolzarb vazifadir.
Oʻquvchilarning bu tarzda kamol topishi fan oʻqituvchilari bilan bir qatorda ishlab chiqarish taʼlimi ustalarining mahoratiga ham bogʻliq.
Men Amudaryo xizmat koʻrsatish va servis kasb-hunar kollejida 2011-yildan beri toʻqimachilik guruhi oʻquvchilariga dars berib kelaman. Oʻquv mashgʻulotlarimni bevosita amaliyot bilan bogʻlab olib boraman. Bunda bizga kollejimizdagi 18 ta toʻqimachilik dastgohi juda qoʻl keladi.
Ushbu yoʻnalishni tugatgan qizlar bemalol qoʻlda ham, dastgohda ham turli kiyim-kechaklarni toʻqiy oladilar.
Ayni kunda bozorlarimizda ana shunday mahsulotlarga talab juda katta ekanligini inobatga olsak, qizlarimiz bu kasbni egallab, mahoratini oshirib borishsa, oʻz bozorimizni xorijnikidan qolishmaydigan toʻqimachilik mahsulotlari bilan taʼminlay oladilar.
Xalqimiz ayol-qizlari azal-azaldan kasb-hunar egallab, oʻz oilasi iqtisodini taʼminlashga koʻmakchi boʻlib kelishgan, mahorati, didi va mehnatsevarligi bilan yuksak hurmat-eʼtibor qozonishgan.
Shundan kelib chiqib, kollejimizdagi toʻquvchilik yoʻnalishidagi oʻquvchilardan tashqari barcha qiziquvchi qizlarga ham dastgohda va qoʻlda toʻqimachilik sir-asrorlarini oʻrgatayapmiz. Maqsadimiz – yoshlar kamoli.
Oʻzim kabi bu mashaqqatli sohada xizmat qilayotgan barcha ustoz, murabbiylarni kasb bayramlari bilan tabriklayman.
Gulmira XUDOYNAZAROVA, Amudaryo xizmat koʻrsatish va servis kasb-hunar kollejining ishlab chiqarish taʼlimi ustasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
