IShLARIMIZ KOʻLAMI KENG

Bizning "Toshyop” OFY "Obod turmush yili”da, aniqrogʻi, 2013-yil 7-yanvarda tashkil topgan yangi oʻzini-oʻzi boshqarish organidir. Bu yangi elatimizda "Birlashgan”, "Taqirqalʼa” va "Ozodlik” aholi punktlari mavjud boʻlib, bu maskanlarda jami 682 oila istiqomat qilmoqda. Bu oilalarda esa 3225 nafar aholi bugungi farovon va obod, saodatli hayot gashtini surmoqdalar. Har bir oilaning tomorqa yerlari mavjud boʻlib, tomorqa yerlardan unumli foydalanishga harakat qilmoqdalar. Negaki, tomorqa yerlar qishloq aholisining tirikchilik manbai boʻlib, u yerda yetishtirilayotgan gʻalla, sabzavot va poliz ekinlaridan yuqori hosil olinib, xonadon talab-ehtiyojlaridan tashqari ichki bozorimizni arzon va toʻkin-sochin qilishga xizmat qilmoqda. Tomorqa yerlardan unumli foydalanib, oziq-ovqat mahsulotlarini koʻpaytirishga munosib hissa qoʻshayotgan tadbirkor dehqonlarimizdan Karimboy Boboniyozov, Saʼdulla Otamurodov, Bekimbat Ollaberganov, Oygul Avazboyeva, Bektursun Oʻrozboyev, Oqmon Shomurodov, Qulmambat Eshchonov, Bozorboy Xolmanov, Karimboy Rajabov va Jumaboy Ollaberganovlar ertagi sabzavot mahsulotlarini va ertagi kartoshka yetishtirishda boshqalarga namuna boʻlmoqdalar.

 Bogʻ – elning toʻkin-sochinlik ramzi, koʻrki va savlati hamda soʻlim goʻshasidir. Ovulimiz odamlari bogʻdorchilikka juda qiziqadilar. Har bir uy, har bir xonadon hovlisida albatta mevali daraxtlar oʻstiriladi. Bundan tashqari, 30 gektarolma bogʻ, 10 gektaruzumzorlardan har yili moʻl va shirin-shakar meva yetishtirilib, el dasturxoniga tortiq qilinmoqda. Shuningdek, tadbirkor fermerlardan Ozod Qurbonboyev 5 gektar va Roza Karimova 2 gektar yangi olma bogʻ tashkil etganlar. Bu bogʻlar ham endilikda moʻl hosil bera boshladi.

Har yilgi anʼanaga koʻra erta bahordan boshlab elimizni obodonlashtirish va koʻkalamzorlashtirish ishlari qizib ketadi va bu xayrli ish umumxalq ishiga aylanadi. Bu xayrli ishda har bir kishi, har bir xonadon, har bir koʻcha ahli faol qatnashib yurtimizning obod, yanada koʻrkam boʻlishi uchun jon kuydirmoqda.

Yurtimizning obodligi va farovonligidan darak beruvchi yana bir timsol – bu namunaviy loyihadagi uy-joylar qurilishidir. Bunga amaliy namuna sifatida "Taqirqalʼa” aholi punktidagi 100 ta namunaviy loyihadagi zamonaviy uy-joylarni koʻrsatishimiz mumkin. Bu yangi uy-joylarda barcha qulaylik va  shart-sharoitlar yaratilgan hamda yangi shaharcha tusini olgan. Bu yil bu yerda yana 10 ta yangi uy-joylar qurilmoqda. Bu yangi uy-joylar Mustaqilligimizning 22 yilligi sharafiga bitkazilib, ulugʻ bayramga sovgʻa qilinadi.

 Xalq farovonligi va el obodligi yoʻlidagi koʻlamdor ezgu ishlarimizni qizgʻin davom ettirib, istiqlol bayramimizni munosib kutib olamiz.

Ahmadjon OʻROZBOYeV,

"Toshyop” O.F.Y raisi.