Parvozing yanada yuksalaversin, “Burgut”

Hozirgi kunda taʼlim maskanlarida tez-tez oʻtkazilib turilayotgan tadbirlar yosh avlodning barkamol boʻlib yetishishida katta ahamiyat kasb etmokda. Bugungi kunda butun mamlakatimiz boʻylab oʻtkazilayotgan "Yosh chegarachilar” harbiy-sport musobaqasi ham bunga yaqqol misoldir.

Bizning Amudaryo melioratsiya va suv xoʻjaligi kasb-hunar kollejimizda 2013-yili    tashkil topgan "Burgut”  jamoasi 10 oʻquvchi – 8 oʻgʻil va 2 qizlarni oʻzida jipslashtirdi. 2013 va 2014 yillarda bu jamoa tuman miqyosida oʻtkazilgan "Yosh chegarachilar” harbiy-sport musobaqasida qatnashib, oʻz mahoratlarini oshirib bordi. 2014 va 2015-yillarda tanlovning tuman bosqichida ketma-ket faxrli 1-, 2-oʻrinlarni egallab, Qoraqalpogʻiston Respublikasi bosqichiga yoʻllanma oldi va  2015-yili Respublika bosqichida 3-oʻrinni qoʻlga kiritdilar.

Albatta, bunday muvaffaqiyatlarga erishish oʻzidan-oʻzi boʻlgan emas. Bu muvaffaqiyatlar  zamirida yoshlarni chaqiriqqacha tayyorlash fani oʻqituvchisi Laziz Matsapoyevning mashaqqatli mehnati  bor. U jamoa aʼzolarida oʻzlariga boʻlgan ishonchni mustahkamladi va orzuni roʻyobga chiqarish uchun esa tinmay oʻz ustida ishlash, izlanish kerakligini oʻrgatdi.

Musobaqada jamoalar safda harbiycha yurish, saf qoʻshigʻini kuylash, 100-1000 m.ga yugurish, simli toʻr va toʻsiqlardan sakrab oʻtish, oʻq-dori solingan idishlarni koʻtarib yugurish, qurollarni  tez va toʻgʻri sochib-yigʻish, azimut boʻyicha yugurish, mina maydonidan oʻtish kabi bir-biridan qiziqarli va murakkab shartlar asosida bellashadilar.

Jamoa orasida qizlarimiz borligi  ham biz uchun quvonchlidir.  Qizlarimiz yigitlar bilan bir safda turib barcha shartlarni birgalikda bajarishadi. Bundan tashqari   birinchi tibbiy yordam koʻrsatish boʻyicha ham  qizlarimiz faoldir. 

2016-yil jamoa uchun juda omadli boʻldi. Ular tuman miqyosida birinchi oʻrinni egallab, Qoraqalpogʻiston Respublikasi bosqichida ham gʻolib boʻlishdi. Endilikda Oʻzbekiston Respublikasi miqyosida Chirchiq shahrida boʻlib oʻtadigan musobaqaga qizgʻin tayyorgarlik koʻrishmoqda. Butun kollejimiz mehnat jamoasi ularni qoʻllab-quvvatlagan holda qoʻllaridan kelgan yordamlarini ayamayapti. Ijtimoiy-siyosiy tayyorgarligini oshirishda, ingliz tili saboqlarini mustahkamlashda Shahlo Iskandarova, Sherzod Polvoniyozov, Sanjar Qalandarov va boshqa oʻqituvchilar oʻquvchilar bilan tinmay shugʻullanmoqdalar.

Ularning yakuniy bosqichda ham gʻoliblikni qoʻlga kiritishiga tilakdoshmiz.

Yulduz SOBUROVA, kollejning iqtisodiyot fanlari kafedrasi mudiri.

Sherzod POLVONIYoZOV,  shu kollejning tarix fani  oʻqituvchisi.