MUROJAATNI QOʻLLAB-QUVVATLAYMIZ
Barchamiz ham el farzandlarimiz. Shunday ekan, shu el uchun, shu Vatan uchun xizmat qilib uning ravnaqi, farovon va obod boʻlishi yoʻlida mehnat qilmoqdamiz, taʼlim-tarbiya ishlarini davr talablari darajasida olib borib, yoshlarimizning barkamol avlod boʻlib yetishishlari uchun jon kuydirmoqdamiz. Qolaversa oʻquvchi-yoshlarning maʼnaviy-axloqiy jihatdan yuksak, chuqur bilimli va intellektual salohiyatli, jismonan esa sogʻlom hamda chiniqqan boʻlishlari yoʻlida butun kuch-gʻayratimizni, bilimimiz va pedagogik mahoratimizni sarflamoqdamiz. Zotan, bugungi yosh avlod kelajagimiz egalari boʻlib yetishib, bizning ezgu ishlarimizni davom ettiradilar.
Maktabimiz "Boʻzyop” ovuli markazida joylashgan yetakchi bilim maskanlaridan biridir. 402 nafar oʻquvchilarga 70 nafar bilimdon va malakali oʻqituvchilar taʼlim-tarbiya bermoqdalar. Sinfxonalarda har bir dars mashgʻulotlari yangi pedtexnologiya usullari asosida qiziqarli va mazmunli oʻtkazilmoqda. Natijada oʻquvchilarimizning fanlardan oʻzlashtirishlari talab darajasida boʻlmoqda. Ularning "Fanlar olimpiadasi” va "Bilimlar bellashuvi” kabi intellektual koʻriklardagi ishtiroklari yildan yilga faollashmoqda. Mana 2012-2013 oʻquv yili ham yakunlanish arafasida turibdi. Fikrimcha, oʻquv yili maktabimizda yaxshi yakunlanmoqda. Ikkita bitiruvchi sinf – "9A” va "9B” sinflaridagi 51 nafar oʻquvchilarning kasb tanlash boʻyicha oʻz fikr-mulohazalari, qiziqqan kasb-hunarlari bor. Ularni navbatdagi bilim olish bosqichiga tayyorlash yuzasidan amaliy ishlar qilindi va kasb-hunar kollejlarida hamda Mangʻit shahridagi Akademik litseyda oʻqishni davom ettirish imkoniyatlari yaratildi.
Bizning maktabimiz oʻquvchilari va oʻqituvchilari ahil jamoa hisoblanadi. Oʻquvchi-yoshlarimiz oʻz oʻqituvchilarini jonkuyar, fidoyi ustoz deb bilishadi. Har kuni maktab boʻsagʻasida va sinfxonalarda "Assalomu alaykum” degan muborak kalom bilan kutib olishadi va dars mashgʻulotlarida ustoz-oʻqituvchilarning har bir soʻzini jon quloqlari bilan tinglashadi. Mana shunday ahillik va hamjihatlik maktabni, har bir sinfxonani va maktab tevarak atroflarini ozoda hamda saranjom-sarishta tutishda, sinfxonalarni tabiiy gullar bilan bezatishda, maktab atrofini koʻkalamzor qilishda-yam yaqqol koʻzga tashlanmoqda. Bu yil erta bahordan maktab atrofidagi dov-daraxtlarga shakl berish, tublarini ohaklash, yangidan 550 tup manzarali va mevali daraxt koʻchatlarini oʻtqazish ishlari amalga oshirildi. Maktabning old qismidagi maydonchani kichik gulzorga aylantirdik. Anvoyi gullarni koʻrib bahri dilingiz ochilib yayraydi, charchogʻingiz chiqadi.
Oʻqituvchilarimiz va oʻquvchilarimiz faqat maktabni obodonlashtirish va koʻkalamzorlashtirish bilangina cheklanib qolmay, oʻz uylari va xonadonlarini, koʻchalari va mahallalarini yanada soʻlim va yanada koʻrkam qilishga oʻz hissalarini qoʻshmoqdalar. Tomorqa yerlarida sabzavot, poliz, dukkakli va boshoqli ekinlar ekib parvarishlashga yordam bermoqdalar.
"Taraqqiyot koʻzgusi" gazetasining oldingi sonida eʼlon qilingan murojaatni oʻqib, barchamiz shu erkin va obod Vatanning gullab-yashnashiga hissa qoʻshishimiz lozimligini yana bir bor chuqur his qildik va yurtimizning yanada ravnaq topishiga oʻz hissamizni qoʻshishga axd qildik. Negaki, el-yurt farzandi sifatida uni yanada obod va farovon qilishga har birimiz masʼulmiz. Biz oʻqituvchilar va oʻquvchilar Murojaatni qoʻllab-quvvatlab, barchani yanada unumli mehnat qilishga, koʻlamdor bunyodkorlik ishlarini amalga oshirishga va tobora yaqinlashayotgan mustaqilligimizning 22 yillik bayramini munosib kutib olishga chaqiramiz. Zero, toʻyga toʻyona bilan borish bizning qadimiy eng yaxshi udumlarimizdir.
Gulasal MATYoQUBOVA.
10-sonli umumtaʼlim maktabi direktori, Qoraqalpogʻiston Respublikasi xalq taʼlimi aʼlochisi, xalq deputatlari tuman Kengashi deputati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
