BOLALARI SOFLOM YuRT
Bizning 25-sonli maktabgacha taʼlim muassasamizda 5-6 yoshli bolalarni maktab taʼlimiga tayyorlash, ularning qobiliyat va iqtidorlarini rivojlantirish, borasida oʻziga xos tajriba toʻplangan. Katta va kichik guruh tarbiyachilarining oʻzaro hamkorligi tufayli bolalar MTMlar uchun belgilangan taʼlim-tarbiya dasturini juda tez va oson oʻzlashtirishadi. Bunda guruhlararo oʻtkaziladigan "Shirintoy-kichkintoy”, "Sogʻlomjon-Polvonjon” koʻrik-tanlovlari va "Shaxmat-shashka”, "Zumradoylar davrasi” ashula va raqs, "Kichkintoy sportchi” toʻgaraklarining mashgʻulotlari bolalar dunyoqarashining shakllanishida, ularning qalbida oʻzaro mehr-oqibat tuygʻularining uygʻonishida muhim ahamiyat kasb etmoqda.
Ayniqsa, "Sogʻlomjon-Polvonjon” koʻrik-tanlovida qatnashishga, gʻolib boʻlishga intilish, oʻziga ishonch tuygʻusi bolalarni kuchli va irodali boʻlishga oʻrgatadi. Muqaddas Xoʻjalapesova, Omongul Bekniyozova, Toʻlgʻonoy Oʻrozboyeva, Anorgul Saparboyeva, Zumradxon Shermatova kabi tarbiyachilarning oʻz ishlariga ijodiy yondashib, har bir mashgʻulotni koʻrgazmali qurollar asosida, tabiat qoʻyniga sayohat tarzida oʻtkazishlari bois, bolalar bunday mashgʻulotlarda oʻta qiziquvchanlik bilan ishtirok etadilar. Ashula va raqs toʻgaragi rahbari Sabohat Ismoilova tomonidan ishlab chiqilgan toʻgarak rejaviy tadbirlari bolalarning jon-u dili. Chunki bolalar ona Vatan haqida, baxtiyor bolalik haqida qoʻshiq oʻrganibgina qolmay, Sabohat opalari rahbarligida ona Vatan manzaralarini tasavvurlarida jonlantirishni, bu haqda erkin hikoya qilib berishni oʻrganadilar.
Muassasamiz har yili tuman va respublika miqyosidagi turli koʻrik-tanlovlarda muvaffaqiyatli ishtirok etib kelmoqda. Ayniqsa, "Sogʻlomjon-Polvonjon” koʻrik-tanlovida 2013-yilda tuman va Qoraqalpogʻiston Respublikasida faxrli 1-oʻrinni egallagan bolajonlarimiz 2016-yilda ham ushbu koʻrik-tanlovning tuman bosqichi gʻolibi boʻlishdi va Qoraqalpogʻiston Respublikasi bosqichiga yoʻllanma oldik.
Kichkintoylarning sogʻligini har kuni koʻrikdan oʻtkazib, ularga berilayotgan taomlar roʻyxatini tuzishda muassasa hamshirasi Tamara opa Usanboyevaning xizmati alohida tahsinga loyiq. Bundan tashqari, muassasa mudiri Baxtiyor Yeshimbetov taʼmirlash, obodonlashtirish va koʻkalamzorlashtirish ishlariga alohida eʼtibor berganligi tufayli bogʻchamiz havas qilsa arzigulik koʻrkam qiyofa kasb etgan. Muassasamizga rahbarlik qilib kelayotgan Baxtiyor Yeshimbetov muassasamizda oʻtkaziladigan barcha tadbirlarning saxovatpesha homiysi hisoblanadi.
Yurtimizda har kuni bayram. Mustaqilligimizning 25 yilligiga bagʻishlangan bayramona tadbirlar bizning Bobur nomli ovulga ham tantanavorlik baxsh etgan. Oʻzlarining chiroyli raqslari, shoʻx-shodon ashulalari bilan ana shunday tadbirlarda ishtirok etayotgan bolajonlarimizning yuzlaridagi quvonch va baxtiyorlik nashidasi har bir koʻngilga xotirjamlik bagʻishlaydi.
Bolalari sogʻlom, baxtiyor va quvnoq Vatanimizda, xalqimiz qalbida ana shunday xotirjamlik hokim ekan, HURlik va OZODLIK, TINChLIK quyoshi mangu porlayveradi.
Tozagul NORBOYeVA,
Bobur nomli ovuldagi 25-sonli MTM tarbiyachisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
