YuKSAKNI KOʻZLAB
Istiqlolimizning dastlabki yillaridanoq barkamol avlodni tarbiyalash davlatimizning eng ustuvor vazifasi etib belgilandi. Muhtaram Birinchi Prezidentimiz I.A.Karimovning (Alloh rahmat qilsin) oqilona siyosati va taʼlim-tarbiya sohasiga qaratgan yuksak eʼtibori yosh avlodning har tomonlama yetuk va barkamol boʻlib voyaga yetishida muhim ahamiyat kasb etmoqda.
Haqiqatan ham yurtimizda taʼlim tizimida ulkan ishlar amalga oshirilmoqda. Buni birgina tumanimizda joylashgan tayanch maktab – 40-sonli umumtaʼlim maktabi misolida ham koʻrish mumkin. Tashqi koʻrinishidan juda hashamatli va koʻrkam maktabda bir ming bir yuz nafardan ortiq oʻquvchi taʼlim-tarbiya olmoqda. Yoshlarning yuqori saviyada bilim olishlari uchun barcha qulayliklar mavjud. Maktabda har bir oʻqituvchi oʻz fanining fidoyisi. Ular oʻz darslarini hozirgi zamon talabiga mos zamonaviy pedagogik va axborot texnologiyalaridan foydalangan holda oʻtadilar. Ular foydalanayotgan taʼlimiy-didaktik oʻyinlar va pedagogik uslublar oʻquvchilarning fanlarni oʻzlashtirish jarayonini yengillashtirishga, ularni darsga toʻliq jalb etishga yordam beradi.
Bularning samarasini maktabning iqtidorli oʻquvchilari misolida koʻrish mumkin. Kitobga chin dildan ixlos qoʻygan, kelajakda ustozlari singari yetuk ustoz boʻlish orzusida izlanayotgan Munira Zarifboyeva, Zebo Erkaboyeva, Mahbuba Oʻtamurodova, Barno Murodboyevalardan maktab maʼmuriyatining bu yil umidlari katta. Bu oʻquvchilar oʻtgan oʻquv yilida ona tili va adabiyot, kimyo, biologiya fanlaridan oʻtkazilgan "Bilimlar bellashuvi”ning Respublika bosqichida faxrli 3-oʻrinni egalladilar.
- Maktabimizda "Bellashuvchilar maktabi” toʻgaragi tashkil etilgan. Unda oʻz fanining bilimdonlari boʻlgan G.Yunusova, G.Habibullayeva, M.Rahimova, I.Qilicheva, D.Xoʻjamurodova kabi tajribali oʻqituvchilarimiz bizlarga nazariy va amaliy jihatdan fan sirlarini oʻrgatishmoqda, – deydi 9-"g” sinf oʻquvchisi Munira Zarifboyeva. – Biz bundan-da yuksak marralarni egallashimiz uchun oʻqish, oʻrganishda davom etaveramiz.
Raʼno NURMETOVA,
40-sonli maktabning ona tili va adabiyot fani oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
