“Obod turmush yili“ yangiliklari

Tadbirda ona – Vatan madhi

Shu yilning 19-iyul kuni Nazarxon OFYda "Qadr-qimmatim, tayanchim va iftixorimsan, Mustaqil Oʻzbekiston!” shiori ostida adabiy-musiqiy tadbir boʻlib oʻtdi. Tadbirda yigʻin faollari, hududdagi fermer xoʻjaliklari mehnatkashlari, yozgi taʼtilni maroqli oʻtkazayotgan maktab oʻquvchilari ishtirok etdilar. Tuman madaniyat va sport ishlari boʻlimiga qarashli Qipchoq Madaniyat uyidan tashrif buyurgan bir guruh sanʼatkorlar ona-Vatan, doʻstlik va muhabbatni tarannum etuvchi kuy-qoʻshiqlar ijro etishib, tadbir ishtirokchilarini xushnud etdilar.

 Qoʻli shirin nonvoy

Mangʻit shahrining "Boy ovul” mahallasida oilaviy tadbirkorlik, uy mehnati, kassanachilik faoliyati bilan shugʻullanuvchilar koʻpchilikni tashkil etadi.

Nonvoy Salomat Tilepov oilasining moliyaviy ahvolini yaxshilash uchun chet elga chiqib ishlab kelayotganlarga ergashmadi. Aksincha,  oʻz oilasi bagʻrida yashab ham yaxshi turmush kechirish mumkinligini tengqurlariga isbotlay oldi. Mahalladoshlariga patir, yupqa non, obi non va choʻrak nonlar yopib berib, ularning ham olqishini, ham duosini olishga erishmoqda.

Barchaga manzur boʻldi

Mamlakatimiz mustaqillikka erishgan kun tobora yaqinlashmoqda. Shu munosabat bilan tumanimizning barcha hududlarida istiqlolimizni ulugʻlashga, mazmun-mohiyatini keng targʻib etishga bagʻishlangan madaniy-maʼrifiy tadbirlar oʻtkazilmoqda.

18-iyul kuni "Olmazor” mahallasida ana shunday tadbirlarning navbatdagisi boʻlib oʻtdi.

Tadbirda "Milliy tiklanish” demokratik partiyasi tuman kengashi raisi oʻrinbosari Sh.Yangiboyeva, tuman hokimligi mutaxassisi Gʻayrat Jumamurodov, "Kamolot” YoIH tuman boʻlimi xodimi M.Oʻrozboyev, hududdan xalq deputatlari tuman Kengashiga  saylangan deputat G.Ahmedovalar qatnashdilar va yigʻilganlarni yaqinlashib kelayotgan eng ulugʻ, eng aziz bayramimiz – mustaqilligimizning 22 yilligi bilan qizgʻin qutladilar. Istiqlolni, Vatanni, ozod va baxtiyor zamonamizni madh etuvchi kuy-qoʻshiqlar barchaga manzur boʻldi.

  Moʻl hosil toʻplanmoqda

Iyul oyi – gʻoʻza parvarishida muhim palla ekinligini yaxshi his qilgan qilichboylik paxtakorlar bu davrning  har bir daqiqasidan unumli foydalanib, fidokorona mehnat qilishib, gʻoʻza tuplarida moʻl hosil toʻplashga erishmoqdalar.

Gʻoʻza parvarishi ishlari ayniqsa Qilichboy ovulining "Amirxon” fermer xoʻjaligida namunali tashkil etilmoqda.

90 gektar paxta maydonining har gektaridan 40 tsentnerdan "Oq oltin” hosili yetishtirishni niyat qilgan ushbu fermer xoʻjaligi paxtakorlari gʻoʻzalarni ikkinchi marotaba sugʻorish ishlarini ham qizgʻin boshlab yubordilar.

Gʻoʻza parvarishida fermer xoʻjaligi mexanizatorlari Bektemir Shermanov va Hayitboy Oʻrozmetovlar, tajribali suvchilari Shokir Oʻrozmetov va Qadamboy Raximovlar namunali mehnat qilmoqdalar.

 Zararkunandalarga qarshi kurash kuchaytirilmoqda

Tuman oʻsimliklarni himoya qilish otryadi tomonidan Toshkent bioorganika instituti bilan 2013-yil uchun shartnoma tuzilib, har ikki gektar paxta maydoniga bir donadan feromon tutqichlar va boshqada bir qancha oʻsimliklar zararkunandalariga qarshi kurashda ishlatiladigan biomahsulotlar va vositalar olib kelingan edi.

Mana shu narsalardan oqilona foydalanish natijasida hozirgi kunda gʻoʻza zararkunandalarini keskin kamaytirishga erishilmoqda.

 "Doʻstlik” sistemasi taʼmirlanmoqda

Tumanimizda yerlarning meliorativ holatini yaxshilashda kollektor-drenajlarning ahamiyati nihoyatda katta. Shu sababdan ham tumanda mavjud kollektor-drenajlarni tiklash va taʼmirlash ishlariga alohida eʼtibor berib kelinmoqda.

Tumandagi yirik kollektorlardan biri – "Doʻstlik” sistemasida 75 km. uzunlikda taʼmirlash va tiklash ishlari rejalashtirilgan boʻlib, shu kungacha uning 45 kilometrida jami salkam 300 mln. soʻmlik ish bajarildi.