ZEBO – INNOVATsION OLIMPIADANING OʻZBEKISTON BOSQIChI GʻOLIBI

Taʼlim sifatini oshirish hamda yoshlarning iqtidorlarini yuzaga chiqarish borasida sohada koʻplab yangilanishlar tatbiq etilmoqda. Umumiy oʻrta taʼlim, kasb-hunar taʼlimi va oliy taʼlim tizimida taʼlim olayotgan yoshlar uchun bilim, koʻnikma va malakalarini namoyon etishlariga keng imkoniyat yaratilmoqda.

Umumiy oʻrta taʼlim muassasalari oʻquvchilari oʻrtasida oʻtkazilib kelinayotgan bilimlar sinovi, fanlar olimpiadasi tanlovlari qatorida innovatsion olimpiada ham tashkil etildi. Iqtidorli oʻquvchilar oʻrtasida sogʻlom raqobat muhitini shakllantirish, oʻzaro doʻstona munosabatlarni mustahkamlash hamda intellektual qobiliyatlarini rivojlantirish maqsadida joriy yilda tashkil etilgan innovatsion olimpiadaning Qoraqalpogʻiston Respublikasi bosqichida tumanimiz umumiy oʻrta taʼlim muassasalarining iqtidorli oʻquvchilari faol ishtirok etdilar. Bu bosqichda gʻoliblikni qoʻlga kiritgan tumanimiz oʻquvchilaridan 5 nafari innovatsion olimpiadaning Oʻzbekiston Respublikasi bosqichiga qatnashish huquqini qoʻlga kiritdilar. Mazkur bosqich har bir fan boʻyicha Toshkent shahri va viloyatlar markazida oʻtkazildi.

Oʻquvchilarning bilimlari Respublika tashkiliy qoʻmitasi tomonidan taqdim etilgan elektron dastur yordamida onlayn tarzda test asosida sinovdan oʻtkazildi.

Tumanimizdagi 12-maktabning 8-sinf oʻquvchisi Zebo Omonboyeva chizmachilik fani boʻyicha Nukus shahrida, 22-maktabning 10-sinf oʻquvchisi Rayhon Bekmurodova, 26-maktabning 9-sinf oʻquvchisi Jamshid Rajabovlar informatika fani boʻyicha Toshkent shahrida, 32-maktabning 9-sinf oʻquvchisi Temurbek Umarbekov matematika fani boʻyicha Urganch shahrida, 56-maktabning 10-sinf oʻquvchisi Javlon Ismoilov fizika fanidan Samarqand shahrida oʻtkazilgan onlayn tarzidagi test sinovlarida qatnashdilar.

Iqtidorli oʻquvchilarimiz innovatsion olimpiadaning test sinovlaridan muvaffaqiyatli oʻtib, yuqori ball toʻplashga erishdilar va “Faxriy yorliqlar” bilan taqdirlandilar.

Eng quvonarlisi, chizmachilik fani boʻyicha ishtirok etgan 12-maktab oʻquvchisi Zebo Omonboyeva oʻqituvchisi Maqsuda Avezovadan olgan bilimlarini oqlab, innovatsion olimpiadaning Oʻzbekiston Respublikasi bosqichi 1-oʻrin gʻolibi deb topildi. Zebo Omonboyeva 1-darajali Diplom, “Faxriy yorliq” va sovgʻalar bilan taqdirlandi.

Qobiliyatli va iqtidorli yoshlar juda koʻp. Bunday yoshlarni aniqlash maqsadida oʻtkazilayotgan sinov va tanlovlar ularning intellektual qobiliyatlarini rivojlantirishda, bilim va malakalari, ijodiy faolligini oshirishda katta ahamiyat kasb etadi.

Ravshan XOLMURODOV,

XTB taʼlim sifati monitoringi boʻlimi bosh inspektori,

xalq deputatlari tuman Kengashi deputati.