70 yoshli shijoatli shifokor

Sulton Tojiniyozovning qalbida odamlarga, jonli tabiatga nisbatan yaxshilik qilib yashash, yaratish ishtiyoqi uygʻonganida hali kichkina bolakay edi. 1-sinfdanoq aʼlo baholarga oʻqigan Sulton Toshhovuz shahridagi 5-sonli umumtaʼlim maktabini oltin medal bilan tugatishga muvaffaq boʻldi.

1973-yilda, Toshkent Tibbiyot institutini tugatish arafasida taqsimot komissiyasi tomonidan asli toshhovuzlik Sulton Tojiniyozovga Amudaryo tuman markaziy shifoxonasiga urolog-shifokor sifatida ishlashga yoʻllanma berildi.

U paytlari butun boshli tuman markaziy shifoxonasida bor-yoʻgʻi bittagina “tez yordam” mashinasi bor edi. Oliy maʼlumotli mutaxassislar yetishmasdi.

Ana shunday murakkab ish sharoitida Sulton Tojiniyozov ustozlari Vladimir Pankusovich Gauxman, Abdulla Xoʻjametov, Raʼno Abdullayevalar bilan yelkama-yelka turib el-yurt sogʻligi yoʻlida xizmat qildi. Bilganlarini ustozlari bilan birga baham koʻrdi, bilmaganlarini oʻrganishdan aslo charchamadi. Toshkent Tibbiyot malaka oshirish institutida, Tbilisi, Irkutsk, Chelyabinsk, Kemerova, Sankt-Peterburg shaharlaridagi nufuzli tibbiyot institutlarida jahon tibbiyotining zamonaviy va noanʼanaviy davolash texnologiyalari boʻyicha bir necha marta oʻz malakasini oshirdi. Tajribali urolog-jarroh sifatida yuzlab bemorlarga hayot baxsh etdi.

Uning tibbiyot sohasidagi xizmatlari hukumatimiz tomonidan munosib baholandi. 1992-yilda Qoraqalpogʻiston Respublikasida xizmat koʻrsatgan tibbiyot xodimi unvoniga sazovor boʻldi. Uning koʻksini “Sogʻlikni saqlash sohasi aʼlochisi” nishoni va “Oʻzbekiston mustaqilligining 25 yilligi” yubiley medali bezab turibdi. Umr yoʻldoshi, Alloh rahmat qilsin, koʻplab yoshlarning ustozi Maryam Haydarova bilan 5 nafar oʻgʻilni tarbiyalab, voyaga yetkazishdi.

Doim xalq orasida, xalq dardiga malham boʻlib yashab kelayotgan Sulton Tojiniyozov nafaqaga chiqib qoʻl qovushtirib oʻtirishni oʻziga ep koʻrmadi. Tibbiyot sohasida tadbirkorlik faoliyatini boshladi. «Salomatlik» xususiy shifo markazini ochdi. Markazda zamonaviy hamda noanʼanaviy usullardan foydalangan holda giyohlar, zuluk, asalari zahri va asalari tabiiy mahsulotlari bilan davolashni yoʻlga qoʻydi. Boʻsh vaqtlarida esa kitob oʻqish, tabiat bagʻrida sayr qilishni yaxshi koʻradigan Sulton Tojiniyozov oʻz tomorqasida turli gul va daraxtlarni oʻstiradi, moʻʼjazgina hovuzida baliqning bir necha turlarini parvarishlaydi. Kabutar, bedana, toʻtiqush, tipratikan, hatto ilonlar, timsoh ham boqadi.

Ayni kunlarda umrining 70 yillik dovonidan hatlayotgan Sulton Tojiniyozov hamon tetik, hamon yuragida ishlashga ishtiyoqi baland. Demak, ishtiyoq bormi, albatta, shifo ahlining bu gʻaroyib tabiatli vakili yana yangi orzular sari dadil qadam qoʻyishiga shubha yoʻq. 70 yoshingiz qutlugʻ boʻlsin, yuz yoshda ham sizni shijoat tark etmasin, omon boʻling, azizim Sulton!

Jumaboy YaVQAShEV, tuman Tibbiyot birlashmasi

tashkiliy-uslubiy boʻlimi mudiri.