AZIZIM VATAN!

Oʻzbekiston mustaqilligining 27 yilligiga

Gul atrin taratgan chamanlaringni,

Bagʻringni toʻldirgan maʼdanlaringni,

“Onajon!”, - deb turgan zabonlaringni,

“Jonim!” – deb evrilgan sanamlaringni,

Qizgʻonaman Vatan, shamollardan ham!

“Bir yuz oʻttiz millat, oʻn ming mahalla, -

desalar,- yashaydi shuncha ahil-a!”

Oʻgʻlonlar maydonda kurashgan palla,

“Qaydan bu kuch-qudrat, totuvlik?!”, - deya

Hayratdan lol-u lol koʻngillardan ham!

Markaziy Osiyo aro sayilgoh –

Tinchlik bazmin qurgan muqaddas dargoh.

Dunyo yoʻllarida porlab turgan moh –

Oʻzbekiston, oʻzing Dengiz, bandargoh!

Xudoyim, asragin, zavollardan ham!

Togʻlaring mustahkam kamar belingga,

Har zarra tuprogʻing samar elingga.

Boqsam, zavqim kelar dalalaringga,

Koʻz tegmasin qadri buyuk yoʻlingga.

Tilayman, asra yot xayollardan ham!

Kezdim, qadam yetgan qancha ellarni,

Tinchlik, deb egilgan qadd-u bellarni.

Koʻrib, yer talashgan soʻqir dillarni,

Vatanlari toʻz-toʻz soqov tillarni.

Yo Pab! Asra, dedim gung-u lollardan!

Gʻanimlar moʻralar qay puchmoqlardan,

Jaholat burqsigan oʻt, oʻchoqlardan.

Fitnalar bolalab yotgan yoqlardan

Vatan, diydoringga tashna “oh!”lardan,

Asragin xudoyim, dallollardan ham!

Koʻksingga bosh qoʻysam – Onamsan, Vatan,

Salobatli, fozil Otamsan – Vatan.

Azizim, yagonam, jonajonimsan –

Sajdagohim oʻzing, Kaʼbamsan, Vatan!

Yuksal, yana yuksal, ming yillardan ham!

Boqsam, toʻrt tomonga – bazm-u tantana,

Xalqingga oqibat – mangu anʼana.

Eshiklar lang ochiq, qutlugʻ ostona –

Vatan! Oʻzing bugun zoʻr mehmonxona!

Balki quvvat olding duolardan ham!

Qaddu kamolingdan etib iftixor,

Shukronalar aytdim takror va takror.

Dedim, tinch, osuda, mangu baxtga yor,

Eng aziz, yagona, jonajon diyor –

Vatan! Oʻzing aʼlo, aʼlolardan ham!

Yahudiy yo oʻris, yo turkiy demay,

Din-u til, eʼtiqod yoki irq demay.

Bir-birin qoʻlidan tutib, kamsitmay,

Bagʻrini keng ochgan jonim onam-ay –

Oʻzbekiston! Yuksal, hilollardan ham!

Pobiya, madhingga loyiq soʻzim yoʻq,

Oʻz yerim, oʻz nonim - mangu koʻnglim toʻq.

Mustaqillik bergan hayotimga koʻrk

Bundayin toʻkislik boʻlgan emas! Yoʻq!

Mulki taxtim ulugʻ dunyolardan ham!

Pobiya YOʻLDOShEVA.