Oʻzbekiston Respublikasi Konstitutsiyasining 21 yilligi oldidan

Oʻzbekiston Respublikasi Konstitutsiyasining 32-moddasi.

Hamjihatlikda ish olib borayapmiz

"Durunki” mahallasi shahrimizning janubiy qismida joylashgan boʻlib, bir tomoni Turkmaniston davlati bilan, bir tomoni "Yusufxoʻja” aholi punkti bilan tutashgan. Aholisi koʻp millatli boʻlsada, oʻzaro tinch-totuv yashashadi. Biz albatta ish yuritishda mahallamizda yashayotgan koʻpni koʻrgan, hayot tajribasiga ega otaxon-onaxonlar, oʻz qoʻni-qoʻshnilariga hayot tarzi bilan ibrat boʻlayotgan oila boshliqlari va mahallaning faol aʼzolari bilan hamkorlik qilamiz.

"Obod turmush yili” Davlat das-turiga asosan mahallamizda keng koʻlamli ishlar olib borildi.

Mangʻit-Qilichboy guzar yoʻlining ikki tomoni koʻkalamzorlashtirildi, zovurlar atrofi tozalanib, har xil manzarali daraxtlar ekildi. Har bir koʻcha, uy atrofi tartibga keltirildi. Koʻchalarning ikki tomonida qurigan daraxtlar kesilib, oʻrniga yangi manzarali koʻchatlar ekildi.

Mahallamiz hududidagi 2 ta maktab, 2 ta bolalar bogʻchasi tevarak atrofi obodonlashtirildi.

Yil boshidan beri muhim sanalar munosabati bilan turli bayram tadbirlari oʻtkazilib, ularda mahalla ahlining keng ishtiroki taʼminlandi. Tadbirlarda "Eng namunali oila”, "Eng namunali qaynona”, "Eng namunali kelin”, "Eng tadbirkor oila” nominatsiyalari boʻyicha gʻoliblar aniqlanib, mukofotlar oʻz egalariga topshirildi.

"Mahallaning eng ziyoli oilasi” deb eʼtirof etilgan Sobir Safarboyev va Gulora Bekimbetovalar oilalari barchaga ibrat boʻlayapti.

Albatta hayot bir tekis kechmaydi. Turmushning past-balandi hamma joyda boʻlgani kabi mahallamizdagi oilalarda ham baʼzan muammolar yuzaga kelib turadi. Lekin bu muammolar mahalladan tashqari olib chiqilmay, shu yerda hal qilinadi, hamjihatlik bilan ish yuritishimiz natijasida arazlagan oila aʼzolari yarashtirildi.

 Mahalla faollari ishsizlik masalasida ham ish olib boradi. Mahalla hududida joylashgan "Mangʻit ipak” pillaxonasi har yili yoz mavsumida 100 nafar mahalla yoshlarini, oila bekalarini ish bilan taʼminlaydi.

 Bir soʻz bilan aytganda, bizning "Durunki” mahallamiz ahli oila farovonligini oshirish uchun dadil saʼy-harakatlar olib borib, samarali natijalarga erishmoqdalar.

   Gavhar MINGBOYeVA,

 "Durunki” mahallasining diniy maʼrifat va maʼnaviy-axloqiy tarbiya masalalari boʻyicha maslahatchisi.