TILOVBOY OTANING BOShQAChA OʻGʻLI

Xidirboy serfarzand oilada voyaga yetdi. U Tilovboy ota bilan Oymon onaning uchinchi farzandi edi. Oʻzidan boshqa 10 nafar aka-uka, opa-singillari har bir masalada Xidirboyga maslahatgoʻy, sirdosh va doʻst kabi mehribonlik koʻrsatishardi. Tilovboy ota oʻqimishli hosilot – agronom edi. Ilm-u maʼrifatli otasidan mehnatkashlikni, pishiq-puxtalikni, ilmni qadrlashni oʻrgangan farzandlar ham el-yurtda kam boʻlishmadi. Besh aka-ukaning barchasi oliy maʼlumotli boʻlishib, el-yurtda obroʻ-eʼtibor qozonganlaridan mamnun Tilovboy ota faxr bilan soʻzlaydilar:

– Avval farzandlarim 11 nafar edi, kelin-u kuyov bolalarim bilan 22 nafar boʻlishdi, nevaralarimning hisobidan adashib ketaman, ming shukur, – deydi otaxon. – Ammo, shu Xidirboy oʻgʻlim baribir boshqacha.

Tilovboy ota taʼrif berganlariday, Xidirboy Tojimov haqiqatdan ham bolaligidan boshqacha edi. Maktabda eng aʼlochi oʻquvchi, Toshkent Davlat Tibbiyot institutida kursdoshlari orasida eng bilimdon, izlanuvchan talaba, kamgap va kamtarin, biror bir masalada fikr aytish galida qatʼiyatli va choʻrtkesar inson, samimiy doʻst sifatida tanildi. 1988-yilda institutni muvaffaqiyatli tugatgan Xidirboy Tojimov ish faoliyatining ilk internatura bosqichini Rossiyaning Tyumen shahar shifoxonasida oʻtkazdi. Amaliy ish faoliyatining bir yillik internatura bosqichini muvaffaqiyatli oʻtagan Xidirboyga Qoʻngʻirot tuman markaziy shifoxonasiga yoʻllanma berishdi. Bu yerda bir yil davomida tibbiyotning jarrohlik yoʻnalishi boʻyicha oʻz mahoratini oshirgan Xidirboy Tojimov 1990-yildan 2001-yilgacha oʻzi tugʻilib-oʻsgan Amudaryo tuman Tibbiyot birlashmasi huzuridagi koʻp tarmoqli poliklinikada onkolog-shifokor sifatida xalqqa samarali xizmat qildi.

Ishda talabchan va izlanuvchan, oʻz sohasi boʻyicha bilimdon bu yigitga ishonch bildirishib, 2001-yilda tuman Tibbiyot birlashmasi huzuridagi tashhis boʻlimi mudirligiga tayinlashdi. Bir vaqtning oʻzida boʻlim rahbarligi hamda endoskopist-shifokor vazifalarini aʼlo darajada uddalashga erishgan Xidirboy Tojimovni 2012-yilda tuman Tibbiyot birlashmasi boshligʻining oʻrinbosari lavozimiga tayinladilar.

Fidoyilikning mukofoti – ishonch, – deydi xalqimiz. Qariyb 30 yillik shifokorlik faoliyati davomida oʻzi rahbarlik qilgan tibbiyot birlashmasi tashhis boʻlimida havas qilarli darajada namunali mehnat intizomi yaratib, boʻlimning eng zamonaviy tibbiyot asbob-anjomlari bilan taʼminlanishiga erishgan, jarroh-onkolog, shifokor-endoskopist sifatida koʻplab insonlarga hayot quvonchini ato etgan Xidirboy Tojimovning bugungi kunda oʻnlab shogirdlari el-yurt salomatligi fidoyilaridir.

–Insonning neki qilgan yaxshi ishi boʻlsa, el-yurt aytsin, xalqning bahosi – haqiqiy baho, - deydi Xidirboy Tojimov. – Men esa oʻz zimmamdagi vazifamni ado etayapman, xolos.

Xidirboy Tojimov oilada ham qatʼiyatli va talabchan ota, mehribon va hurmatli umr yoʻldosh. Rafiqasi Shirinoy 52-sonli maktabda oʻqituvchi. Bu ziyoli oila tarbiyasini olgan ikki nafar oʻgʻillarining biri – Gʻulomjon Toshkent Davlat pediatriya institutining Nukus filialida, Odilbek esa Qoraqalpoq Davlat Universitetida tahsil olishmoqda. Ayni paytda 85 yoshga toʻlgan Tilovboy otaning: “Xidirboy oʻgʻlim boshqacha”, – deya quvonganlaricha bor, Xidirboyning oʻgʻillari ham boshqacha – otasiga tortishgan – intiluvchan, qatʼiyatli va bilimdon.

Hayot ana shunday insonlar bilan goʻzal, zavqli. Biz fidoyi inson Xidirboy Tojimovning oila aʼzolariga hayotingiz hamisha zavqqa toʻlsin, sogʻlik va baxt hamrohingiz boʻlsin, – deymiz.

Robiya YOʻLDOShEVA.