NOGIRONLAR DOIMO DAVLATIMIZNING GʻAMXOʻRLIGIDA

Nogironlik tugʻma yoki orttirilgan shaklda boʻlishi mumkin. Tugʻma nogironlik asosan irsiy kasalliklarning nasldan naslga oʻtishi natijasida kelib chiqadi. Tugʻma va irsiy kasalliklar yoshlarning erta turmush qurishi, qarindoshlar oʻrtasidagi nikohlar natijasida uchramoqda. Kasalliklarning kelib chiqishining oldini olish maqsadida Oʻzbeksiton Respublikasi Vazirlar Mahkamasining 365-sonli qarori asosida koʻp tarmoqli markaziy poliklinikada nikohlanuvchilarni profilaktik tibbiy koʻrikdan oʻtkazish yoʻlga qoʻyilgan. Chaqaloqlar tugʻilgan paytda endokrin tizimi kasalliklariga tekshiriladi.

Orttirilgan nogironlik esa kasalliklar, jarohatlanishlar natijasida kelib chiqadi. Ota-bobolarimizning kasallikni davolashdan koʻra, uning oldini olgan afzalroqdir, degan hikmatiga amal qilib, tibbiyot xodimlari tomonidan sogʻlom turmush tarzi afzalliklari, onalik va bolalikni muhofaza qilish, yuqumli va yuqumsiz kasalliklar, jarohatlanishlarning oldini olish toʻgʻrisida aholi orasida keng koʻlamda tushuntirishlar olib borilmoqda.

Oʻzbekiston Respublikasi Prezidentining 2017-yil 1-dekabrdagi “Nogironlarni davlat tomonidan qoʻllab-quvvatlash tizimini tubdan takomillashtirish chora tadbirlari toʻgʻrisida”gi farmoni ijrosini taʼminlashga intilmoqdamiz.

Tumanimizda jami mehnat qobiliyatini yoʻqotganlar 2861 nafar, jumladan, bolalar nogironligi 578 nafarni tashkil etadi. Ularga 93 ta katta nogironlar aravachasi, 93 ta bolalar aravachasi, 14 ta eshitish moslamasi, 26 ta qoʻltiq tayoq, 56 ta hassa, 17 ta koʻzi ojizlar hassasi, 2 ta tirsak tayoq berilgan. Yil boshidan beri 189 nafar nogironlarga sanatoriya-kurortlarga yoʻllanma berildi.

Aholining salomatligini saqlash maqsadida “2018-2022-yillar davrida bolalarda tugʻma irsiy kasaliklarning oldini olish” Davlat dasturi qabul qilingan boʻlib, tibbiyot xodimlari tomonidan mahallalar, oʻquv muassasalarida qarindoshlar oʻrtasida, erta nikoh natijasida kelib chiqadigan tugʻma va irsiy kasalliklarning oldini olish toʻgʻrisida keng koʻlamda targʻibot-tashviqot ishlari olib borilayapti.

Tamara SAIDOVA, Koʻp tarmoqli markaziy poliklinika

Salomatlik boʻlimi shifokori.