Yangi ish oʻrinlari koʻpaymoqda

Har bir shaxs mehnat qilish, erkin kasb tanlash, adolatli mehnat sharoitlarida ishlash va qonunda koʻrsatilgan tartibda ishsizlikdan himoyalanish huquqiga egadir.

Oʻzbekiston Respublikasi Konstitutsiyasining

37-moddasidan.

Mamlakatimizda istiqlol yillarida fuqarolarning tinch-osoyishta yashashi, oʻz qobiliyat va intilishlariga yarasha mehnat qilishi, oʻz mehnatlari tufayli toʻq va farovon umr kechirishlariga erishishlari uchun gʻamxoʻrlik tobora kuchaytirilmoqda. Bunda ishga yaroqli aholining ish bilan bandligiga erishish juda muhim oʻrin tutadi. Axir biron faoliyat turi bilan band boʻlmay turib, oila farovonligini taʼminlash haqida gap ham boʻlishi mumkin emas-da.

Yurtimizning har bir fuqarosi Asosiy Qonunimizda belgilab qoʻyilganidek "... Mehnat qilish, erkin kasb tanlash, adolatli mehnat sharoitlarida ishlash va qonunda belgilangan tartibda ishsizlikdan himoyalanish huquqiga egadir”.

Tumanimizda fuqarolarning ish bilan bandligini taʼminlash, ishga yaroqli ishsiz fuqarolar uchun yangi ish oʻrinlarini tashkil etish, ularning ijtimoiy muhofazasini kuchaytirishga alohida eʼtibor qaratilmoqda.

Joriy yil uchun 5231 ta yangi ish oʻrinlari yaratish, shundan 150 tasi yangi ishlab chiqarish obʼektlarini ishga tushirish, mavjud korxonalarni kengaytirish va quvvatlarini oshirish hisobiga, 2288 tasi kichik korxona va mikrofirmalar tashkil qilish hisobiga, 270 tasi yakka tartibdagi tadbirkorlikni qoʻllab-quvvatlash hisobiga, 1232 tasi fermer xoʻjaliklarini rivojlantirish hisobiga, 936 tasi uy mehnatining barcha shakllarini tashkil etish hisobiga, 329 tasi ishlab chiqarish infratuzilmasini rivojlantirish hisobiga, 26 tasi ishlamayotgan korxonalar faoliyatini tiklash hisobiga rejalashtirilgan edi.

Yilimizning oʻtgan davri mobaynida 4871 ta oʻrniga 4969 ta yangi ish oʻrinlari yaratilib, belgilangan reja 102 foizga bajarildi. Ish oʻrinlarining yoʻnalishlar kesimida bajarilishi esa yangi ishlab chiqarish obʼektlarini ishga tushirish va tashkil etish hisobidan 128 ta, kichik korxonalar va mikrofirmalarni tashkil qilish va kengaytirish hisobidan 1923 ta, xususiy tadbirkorlikni rivojlantirish boʻyicha 242 ta, kasanachilikning barcha shakllarini tashkil etish hisobidan 851 ta, fermer xoʻjaliklarini rivojlantirish hisobidan 1057 ta, ijtimoiy infratuzilma va aholi punktlarini obodonlashtirish hisobidan 294 ta, ishlamayotgan korxonalar faoliyatini tiklash hisobidan esa 22 ta yangi ish oʻrinlari yaratildi.

Yilimizning oʻtgan 11 oyi davomida 8-marta boʻsh ish oʻrinlari yarmarkalari oʻtkazildi va unda 224 ta korxona, tashkilotlar oʻzlarining mavjud 918 ta boʻsh ish oʻrinlari bilan ishtirok etdi.

Yarmarkalarda tumanimizning ishga yaroqli ishsiz 633 nafar aholisi ishga joylashish uchun yoʻllanma olish imkoniyatiga ega boʻldilar, 264 nafar fuqaroga esa tegishli maslahatlar berildi.

Yangi ish oʻrinlarini yaratish va shu barobarida aholining ish bilan bandligini taʼminlashga eʼtibor kuchaytirilaveradi.

M.MATKARIMOV,

tuman Bandlikka koʻmaklashish va aholini ijtimoiy muhofaza qilish markazi direktori.