Vatan himoyachilari kuniga bagʻishlangan bayram tadbiri

Har qanday davlatning mustaqilligini birinchi navbatda uning oʻz armiyasi himoya qiladi. Shu bois istiqlolimizning dastlabki kunlarida — 1991-yil 6-sentyabrda Oʻzbekiston Mudofaa ishlari vazirligi tashkil etilib, 1992-yil 14-yanvar kuni mamlakatimiz hududidagi barcha harbiy qism va boʻlinmalarni Oʻzbekiston tasarrufiga oʻtkazish toʻgʻrisida qaror qabul qilingan edi. 1993-yilning 23-dekabrida esa Oʻzbekiston Respublikasi Oliy Kengashining qarori bilan 14-yanvar – Vatan himoyachilari kuni qilib belgilandi. Mana, bir necha yildirki bu sana butun mamlakatimiz boʻylab keng nishonlanib kelinmoqda.

Markaziy madaniyat uyida 14-yanvar – Vatan himoyachilari kuni va Qurolli Kuchlarimiz tashkil topganligining 22 yilligiga bagʻishlangan bayram tadbiri boʻlib oʻtdi. Tadbirda tuman mudofaa ishlari boʻlimi va chegara qismlari ishchi va xizmatchilari, jamoat tashkilotlari vakillari, askarlar, akademik litsey va kollejlar oʻquvchilari va keng jamoatchilik vakillari qatnashdilar.

Tadbirni tuman hokimi oʻrinbosari, xotin-qizlar qoʻmitasi raisi Maryam Ahmedova kirish nutqi bilan ochdi va olib bordi.

Tadbirda tumanimiz hokimi Rajabboy Yoʻldoshev maʼruza qildi. Taʼkidlanganidek, Vatanni himoya qilish, uning daxlsizligini saqlash, har bir fuqaroning burchidir. Qolaversa, hozirgi kunda dunyo boʻyicha, turli mafkurviy tahdidlar, jumladan diniy ekstemizm, terrorchilik kabi harakatlar mamlakatlar tinchligiga xavf solib turgan bir paytda, milliy armiyamizning ahamiyati va oʻrni beqiyosligi eʼtirof etilmoqda. Yurtimizning ozodligi va kun sayin obod boʻlib borayotgani, kunlarimizning tinch va tunlarimizning osuda oʻtayotgani harbiylarning vatanimiz sarhadlarini himoya qilishdagi fidoyiligi sabablidir.

Tumanimiz hokimi oʻz soʻzida barcha harbiylarga vatan himoyasidek oliyjanob faoliyatida omadlar tilab, chegara postlari oʻrtasida oʻtkazilgan musobaqada birinchi faxrli oʻrinni egallagan Mangʻit chegara posti va ikkinchi oʻrin sohibi boʻlgan Ayoqchi chegara posti maʼmuriyatini tuman hokimligining fxriy yorligʻi va esdalik sovgʻalari bilan taqdirladi. Shu bilan birga, Vatan himoyachilari kuni munosabati bilan oʻtkazilgan sport musobaqalarida faxrli oʻrinlarni egallagan Amudaryo akademik litseyi, Mangʻit iqtisodiyot kolleji, Amudaryo maishiy xizmat koʻrsatish kolleji vakillariga ham faxriy yorliqlar va esdalik sovgʻalari topshirildi.

Tadbir davomida tuman mudofaa ishlari boʻlimi boshligʻi oʻrinbosari Akmal Olimov, 40-sonli umumtaʼlim maktabining maʼnaviyat va maʼrifat ishlari boʻyicha direktor oʻrinbosari Sayyora Jumamurodova, tumanimiz chegara postida xizmat vazifasini oʻtayotgan askar Sherzod Anarboyevlar soʻzga chiqib, hammani bayram bilan tabrikladilar.

Tadbir vatan himoyachilari kuniga bagʻishlab tayyorlangan kontsert dasturi bilan davom etdi. Kontsert dasturida, ayniqsa bolajonlar ijro etgan kuy va qoʻshiqlar, raqs namoyishlari yuraklarni toʻlqinlantirib, tomoshabinlarga olam-olam zavq bagʻishladi.