Maktablarda pullik taʼlim xizmatlari
“Oʻzbekiston Respublikasi Xalq taʼlimi vazirligi tizimidagi umumiy oʻrta taʼlim muassasalarida pullik taʼlim xizmatlarini koʻrsatish tartibi toʻgʻrisida”gi Nizomda Oʻzbekiston Respublikasi Xalq taʼlimi vazirligi tizimidagi umumiy oʻrta taʼlim muassasalarida oʻquvchilar uchun ixtiyoriylik asosida tashkil etiladigan pullik taʼlim xizmatlari koʻrsatish tartibi belgilab berilgan.
Pullik taʼlim xizmatlari zarur moddiy-texnika bazasi hamda tegishli pedagog xodimlarga ega boʻlgan yoki tegishli mutaxassis jalb qilingan holda maktablarda tashkil qilinishi mumkin.
Bunda pullik taʼlim xizmatlarini koʻrsatish oʻquvchining maktablarda oʻquv dasturi boʻyicha olib boriladigan taʼlim-tarbiya jarayoniga xalaqit bermasligi nazarda tutilgan.
Maktablarda tashkil qilinadigan qoʻshimcha taʼlim berishga qaratilgan pullik taʼlim xizmatlari maktablarning oʻquv dasturlarida nazarda tutilmagan mashgʻulotlar boʻyicha maktab direktori va oʻquvchilarning ota-onasi yoki ularning oʻrnini bosuvchi shaxslar oʻrtasida ushbu Nizomga muvofiq tuziladigan shartnoma asosida amalga oshiriladi.
Maktabda pullik taʼlim xizmat koʻrsatishga, birinchi navbatda, shu maktabda faoliyat yuritayotgan oʻqituvchilar shartnoma asosida jalb etiladi. Buyurtmachilar tomonidan kelib tushadigan mablagʻlarning bir qismi (50 foizidan kam boʻlmagan miqdori) oʻqituvchilarga xaq toʻlashga yoʻnaltirilishi mumkin.
Maktab maʼmuriyati buyurtmachidan shartnomada belgilangan toʻlovlarni oʻz vaqtida toʻlashni talab qilish va ushbu talab bajarilmasa, oʻquvchini pullik taʼlim xizmatlari boʻyicha mashgʻulotlardan chetlashtirish huquqiga ega. Pullik taʼlim xizmatlari koʻrsatuvchi maktab qonun hujjatlariga muvofiq boshqa huquqlarga ham ega boʻlishi mumkinligi aytib oʻtilgan.
Bundan tashqari, mashgʻulotlar jarayonlariga malakali oʻqituvchilarni jalb etish, ilgʻor taʼlim texnologiyalarini, zamonaviy kompyuter va axborot-kommunikatsiya texnologiyalari va vositalarini joriy etish belgilangan.
Koʻrsatilayotgan pullik taʼlim xizmatlarining bir kalendar oyi uchun belgilangan toʻlov miqdorini shartnoma talablariga muvofiq toʻliq hajmda va oʻz vaqtida toʻlash, toʻlov hujjati nusxasini esa mashgʻulotlar boshlanishidan oldin maktab maʼmuriyatiga taqdim etishlari kerak boʻladi. Shartnoma talablariga soʻzsiz amal qilish maqsadida va shartnomada koʻrsatilgan qoʻshimcha taʼlim va boshqa xizmatlardan foydalanish uchun oʻquvchining darslarga muntazam ravishda qatnashishini taʼminlash zarur boʻladi. Oʻquvchi maktabning mulkiga yetkazilgan moddiy zararni qoplashga majburdir. Buyurtmachi qonun hujjatlariga muvofiq boshqa majburiyatlarni ham olishi mumkinligi aytib oʻtilgan.
Xulosa oʻrnida shuni aytish mumkinki, farzandlarimiz uchun yaratilayotgan bu imkoniyatlardan oqilona foydalana bilsak, qoʻshimcha taʼlim mashgʻulotlari ularning boʻsh vaqtlarini samarali oʻtishiga hissa qoʻshadi.
Albatta, farzandlarimiz mustaqil fikrlaydigan, yuksak intellektual va maʼnaviy salohiyatga ega boʻlib, dunyo miqyosida oʻz tengdoshlariga hech qaysi sohada boʻsh kelmaydigan insonlar boʻlib kamol topishi, baxtli boʻlishiga imkon beradi.
Ravshan XOlmurODov, tuman XTB Taʼlim sifati monitoringi boʻlimi
bosh inspektor-metodisti, Xalq deputatlari tuman Kengashi deputati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
