Amudaryo tumanida Konstitutsiya kuni keng nishonlandi

Konstitutsiya – huquqiy davlatning asosiy belgisi hisoblanadi. Unda jamiyatning ijtimoiy-siyosiy xususiyatlari, taraqqiyotining bosh mezonlari, mamlakat ichki va tashqi siyosatining asosiy yoʻnalishlari oʻz ifodasini topadi. Ushbu asosiy qonun har bir mamlakatning taraqqiyot yoʻlini belgilab beruvchi muhim hujjat sanaladi.

Asosiy qomusimiz - Oʻzbekiston Respublikasi Konstitutsiyasi qabul qilingan kun, yaʼni  8-dekabr sanasi mamlakatimizda har yili tantanali ravishda keng nishonlanadi. 6-dekabr kuni tuman madaniyat boʻlimida boʻlib oʻtgan tadbir ham shular jumlasidandir.

Tadbirda tuman hokimi Sultonboy Yoʻldoshev, hokim oʻrinbosarlari, deputatlar, huquqni muhofaza qilish organlar, taʼlim muassasalari rahbarlari, ovul va mahalla fuqarolar yigʻinlari raislari hamda keng jamoatchilik vakillari qatnashdilar.

Tadbirda tuman hokimi Sultonboy Yoʻldoshev soʻzga chiqib, bosh qomusimizning huquqiy demokratik davlat va kuchli fuqarolik jamiyatini barpo etish, xalqimizning tinch, obod va farovon hayotini taʼminlash, Oʻzbekistonning xalqaro maydondagi obroʻ-eʼtiborini yuksaltirish, milliy qonunchilik tizimini shakllantirish hamda mamlakatimiz hayotining barcha sohalarida islohotlarni muvaffaqiyatli amalga oshirishdagi oʻrni va ahamiyati haqida toʻxtalib oʻtdi.

Darhaqiqat, Oʻzbekiston Respublikasi Konstitutsiyasi Inson huquqlari umumjahon deklaratsiyasi va boshqa xalqaro hujjatlar talablariga toʻla mos holda, inson huquq va erkinliklarini kafolatlash bilan birga, shaxsning maʼnaviy kamol topishi va har tomonlama uygʻun rivojlanishi uchun zarur shart-sharoitlar yaratdi. Konstituttsiya yurtimizning har bir fuqarosi uchun nafaqat huquq va erkinliklari kafolati, ayni paytda davlat va jamiyat oldidagi burchlarini ham belgilab berdi.

Bayram tadbirida 31- hamda 40-sonli umumtaʼlim maktablarining maʼnaviyat va maʼrifat ishlari boʻyicha direktor oʻrinbosarlari Eldor Oʻrazimbetov va Muyassar Rahmatullayevalar soʻzga chiqib, Konstitutsiyamizning mazmun-mohiyati, asosiy qonunimizning jahon hamjamiyatida tutgan oʻrni, uni yoshlarga oʻrgatishning ahamiyati haqida soʻzladilar.

Tadbir davomida tuman madaniyat boʻlimi sanʼatkorlarining kontsert dasturi namoyish qilindi. Kontsert dasturida maktab oʻquvchilari tomonidan bosh qomusimizning qator moddalariga taʼriflar berildi hamda madaniyat xonandalarining vatanni madh etuvchi, tichlik, ezgulikni tarannum etuvchi kuy-qoʻshiqlari yangradi.

Shuni alohida taʼkidlash kerakki, Konstitutsiyamiz asosida mamlakatimizda milliy qonunchilik tizimi, davlat organlari, fuqarolik jamiyati institutlari shakllandi, bugungi kunda barcha jabhalarda keng koʻlamli islohotlar amalga oshirilmoqda. Ijtimoiy-iqtisodiy, siyosiy va harbiy salohiyatimiz yuksalib, fuqarolarimizning dunyoqarashi tobora oʻsib bormoqda. Bularning barchasi, eng avvalo, bosh qomusimizning hayotbaxsh kuch-qudrati natijasidir.

Shuningdek, asosiy qonunimizda yurtdoshlarimizning kelajak avlodlarga ozod va obod Vatan qoldirish, ularning baxtu kamolini koʻrishdek orzu-havaslari oʻz ifodasini topganligi bilan birga unda jamiki dunyoviy neʼmatlar orasida eng ulugʻi – Inson degan fikr ilgari surilgan va shu asosda fuqaro – jamiyat – davlat oʻrtasidagi oʻzaro munosabatning oqilona huquqiy yechimi belgilab berilgan.

Mamlakatimiz ijtimoiy-siyosiy hayotidagi eng muhim sanalardan biri – Konstitutsiya qabul qilinganligining 27 yilligi arafasida shuni alohida eʼtirof etish lozimki, Konstitutsiyamiz vaqt oʻtgan sari oʻz nufuzini, xalqaro miqyosdagi obroʻ-eʼtiborini mustahkamlab bormoqda. Shu sababli ham Konstitutsiyamiz – ahamiyati beqiyos boʻlgan hujjatdir.

Fursatdan foydalanib barcha yurtdoshlarimizni ushbu bayram –Konstitutsiyamizning 27 yilligi munosabati bilan tabriklaymiz!

Charos Arslonova, tuman hokimligi axborot xizmati rahbari