YaNGI MAKTABDA TAʼLIM SIFAT VA SAMARADORLIGIGA KATTA EʼTIBOR BERILAYaPTI

Tumanimizdagi Doʻrman qishloq xoʻjalik kasb-hunar kolleji faoliyati tugaganligi sababli ushbu kollej binosi yangidan tashkil etilgan 84-sonli umumtaʼlim maktabi ixtiyoriga topshirilgan edi.

Joriy yilning sentyabr oyidan ish boshlagan ushbu yangi maktabda ayni kunda 31 nafar oʻqituvchi 365 nafar oʻquvchiga taʼlim berayapti.

Maktabda 15 ta sinf mavjud boʻlib, shundan 6 tasini boshlangʻich, 9 tasini esa yuqori sinflar tashkil etadi.

Bugungi kunda maktab pedagoglari jamoasining har bir aʼzosi oʻtilayotgan darslar samaradorligini oshirish, har bir oʻquvchida darslarni aʼlo darajada oʻzlashtirish koʻnikmalarini shakllantirish yoʻlida fidokorona mehnat qilmoqdalar.

Oʻquvchilarning fanlarga boʻlgan qiziqishlarni oshirish maqsadida maktabda fan toʻgaraklaridan keng foydalanilmoqda. Shuningdek, maktabda tashkil etilgan sport va musiqa toʻgaraklari oʻquvchilarda sportga hamda sanʼatga boʻlgan qiziqishni yanada oshirishga omil boʻlayapti.

Joriy yilning dekabr oyi boshlangʻich sinflar fan oyligi deb eʼlon qilinganligi tufayli maktabning boshlangʻich sinflarida ochiq darslar, koʻrik-tanlovlar, “Sogʻlomjon-polvonjon” deb nomlangan sport tadbirlari, yosh kitobxon va quvnoq startlar musobaqalari oʻtkazilib, bu tadbirlarga oʻquvchilarning ota-onalari ham taklif etilmoqda.

Yangi yil arafasida Doʻrman ovuli tadbirkorlari ham yangi maktabga tashrif buyurishib, oʻquvchilarga oʻzlarining sovgʻa-salomlarini topshirishmoqda. Yaqinda ovuldagi Yoʻldosh Oʻrozboyev nomli muqobil mashina traktor parki rahbari Qurbongʻaliy Beshboyev va tadbirkor Hakimboy Bobojonovlar maktabning 1-sinf oʻquvchilariga oʻzlarining yangi yil sovgʻalarini topshirdilar. Ularning yangi yil sovgʻalari kichkintoy oʻquvchilarga katta quvonch bagʻishladi.

Ayni kunda maktabda oʻquvchilarni 2019-2020 oʻquv yilida boʻladigan fan olimpiadalariga tayyorlash ishlariga ham alohida eʼtibor berilayapti.

Qishki taʼtil paytida maktab maʼmuriyati tomonidan oʻquvchilarning Chilpiq qoʻrgʻoniga va Nukus shahridagi Savitskiy nomidagi tarixiy muzeyga sayohatini amalga oshirish rejalashtirilmoqda.

A.JUMANIYoZOV.