“ChORVANASL” MARKAZI TUMAN BOʻLIMI MUTAXASSISLARIGA XIZMAT VELOSIPEDLARI TOPShIRILDI

Mamlakatimizda chorvachilik tarmogʻini jadal rivojlantirish, chorva mollarining mahsuldorligini oshirish, chorvachilikka ixtisoslashgan fermer xoʻjaliklari hamda aholi qaramogʻidagi yirik shoxli qoramollar va qoʻy-echkilar naslini yaxshilash, sunʼiy urugʻlantirishni tashkil etish hamda naslchilik ishlab chiqarish hajmlarini koʻpaytirish, chorva ozuqa bazasini mustahkamlash borasida tizimli ishlar amalga oshirilmoqda. Jaydari qoramollar va qoʻy-echkilar oʻrnini zotdor, sermahsul turlar bilan toʻldirish, sifatli goʻsht va sut mahsulotlari yetishirishni yanada koʻpaytirish maqsadida olib borilayotgan saʼy-harakatlar buning yaqqol dalilidir.

Oʻzbekiston Respublikasi Prezidentining  2019-yil 28-martdagi 4254-sonli Qaroriga asosan Oʻzbekiston Respublikasi Veterinariya va chorvachilikni rivojlantirish davlat qoʻmitasi huzurida “Oʻzbekchorvanasl” Agentligi tashkil etildi.  Ayni paytda ushbu Agentlikning hududiy va tuman boʻlimlarining faoliyati yoʻlga qoʻyildi.

Qoraqalpogʻiston Respublikasi chorvachilikni rivojlantirish qoʻmitasi huzurida ham “Chorvanasl” markazi tashkil etilib, tumanimizda mazkur markazning veterinariya va chorvachilikni rivojlantirish boʻlimi ish boshladi. Boʻlimga 11 nafar texnik oseminatorlar ishga qabul qilindi. Boʻlim mutaxassislari xizmat vazifalarida uzviylik, sifat va samaradorlikni taʼminlash maqsadida davlat tomonidan 2 ta kompyuter va 2 ta printerlar berildi.

Tumanda sohaga qaratilayotgan mana shunday eʼtibor tufayli chorvachilik mahsulotlarini yetishtirish yil sayin oshmoqda. Ayni paytda tumanimizda 49 ta chorvachilik subʼektlari faoliyat koʻrsatmoqda. Shundan 13 tasi fermer xoʻjaliklari, 36 tasi turli yoʻnalishdagi qishloq xoʻjalik korxonalari hisoblanadi. Ushbu xoʻjaliklarda 161,9 ming bosh yirik shoxli qoramollar boʻlib, shundan 103,5 ming bosh qoramol dehqon va shaxsiy yordamchi xoʻjaliklarda, 200 bosh qoramollar fermer xoʻjaliklarida, 1000 bosh qoʻy-echkilar qishloq xoʻjalik korxonalarida zooveterinariya qoidalari asosida parvarish qilinmoqda.

Oʻtgan 2019-yilda chorvachilik  subʼektlari ixtiyoridagi 2289 gektar yer maydoni va yaylovlar, ekishlik yerlarga oʻz vaqtida agrotexnik ishlov berish, zootexnika vositalaridan unumli foydalanish natijasida chorvachilik xoʻjaliklari tomonidan tirik vaznda 10 ming 495 tonna goʻsht, 37 ming 650 tonna sut mahsulotlari yetishtirildi.

6-yanvar kuni Qoraqalpogʻiston Respublikasi Veterinariya va chorvachilikni rivojlantirish qoʻmitasi huzuridagi “Chorvanasl” markazining tuman boʻlimida yigʻilish boʻlib oʻtdi. Yigʻilishda tuman hokimining qishloq va suv xoʻjaligi masalalari boʻyicha oʻrinbosari Fayzulla Saʼdullayev, tuman Veterinariya va chorvachilikni rivojlantirish boʻlimi boshligʻi Alisher Matkarimov hamda “Chorvanasl” markazi tuman boʻlimi vakillari ishtirok etdilar.  texnik oseminatorlarga 11 ta xizmat velosipedlarini topshirdilar. Shu bilan birga tumanimizda chorvachilik subʼektlariga malakali veterinariya xizmatini koʻrsatish yuzasidan tegishli maslahatlar berdilar.

Chorvachilik subʼektlariga zooveterinariya xizmati koʻrsatish sifatini yaxshilash chorvachilik mahsulotlari yetishtirishda yuqori natijalarga erishishni taʼminlaydi.  barcha toifadagi chorvachilik subʼektlari va aholi qaramogʻidagi yirik shoxli qoramollar, qoʻy-echkilar mahsuldorligini oshirish, naslini yaxshilash, zotdor qoramollarni tumanimiz iqlim sharoitiga moslashtirish borasidagi ishlarni yanada yaxshilash va veterinariya xizmati samaradorligini oshirish maqsadida rejaviy-tadbirlar ishlab chiqilib, ish olib borilmoqda.

Robiya YOʻLDOShEVA.