“AJOYIB MATEMATIKA” TADBIRI MATEMATIKAGA DOIR BILIMLARNI YaNADA BOYITDI

Tumanimizdagi barcha umumiy  oʻrta taʼlim maktablaridan boʻlganidek, 14-sonli maktabda ham fevral aniq fanlar  oyligi deb belgilanganligiga muvofiq turli tadbirlar tashkillashtirildi. Oylik doirasida ochiq oʻquv mashgʻulotlari, koʻrgazmalar, turli bellashuvlar va boshqa tadbirlar oʻtkazildi.

Oʻqituvchilarning oʻz faniga ijodiy yondashuvi, interfaol usullarni qoʻllay olishi va dars mashgʻulotlarini oʻquvchilar uchun  qiziqarli tarzda olib bora olishi jiddiy sinovlardan oʻtkaziladigan, oʻquvchilarning kundalik mashgʻulotlarni qay darajada egallayotganini koʻrsatadigan oylik doirasidagi tadbirlarda maktabdagi barcha sinflar qamrab olindi. Fan oʻqituvchilari tomonidan tashkil etilgan tadbirlar va bellashuvlarda, ochiq oʻquv mashgʻulotlarida oʻquvchilarning faol ishtiroki taʼminlanib, fanga boʻlgan qiziqishlari yanada oshirildi.

14-sonli maktabda mazkur fan oyligi munosabati bilan aniq fanlar oʻqituvchilari Alibek Bekmurodov, Shavkat Madatovlar rahbarligida tashkil etilgan tadbir esa “Ajoyib matematika” deb nomlandi.

Tadbir matematika fanini oʻrganishning ahamiyati haqida maʼruza  bilan boshlandi. Aynan aniq fanlarga ixlos qoʻygan yuqori sinflar oʻquvchilari orasidagi bellashuvga qizgʻin tayyorgarlik koʻrilgani jarayonda yaqqol namoyon boʻldi. Bunda ular Al Beruniy va Al Xorazmiy nomli guruhlarga boʻlinib, matematika va informatika fanlaridan olgan bilimlari boʻyicha oʻzaro kuch sinashdilar.

Jamoalar birinchi shartga koʻra sahnada jamoasi nomini sharhlab berdilar va bellashuvga chiqishdagi maqsadlarini ifodalab, oʻzlarini tanishtirdilar. Ikkinchi shart “Aqlli boʻlsang, gʻolib boʻl” deb nomlandi. Bu shart asosida ikkala jamoa ham maktab oʻqituvchilari, oʻquvchilari va ota-onalar koʻz oldida gʻolib boʻlishga, matematika bilimdoni ekanligini isbotlashga zoʻr kuch bilan intildilar. Bunda oʻquvchilar tafakkurini sinaydigan rasmlar qoʻyilib, farqlarini topish topshirildi.
Berilgan harflardan boshlanuvchi matematik terminlar yozish boʻyicha oʻtkazilgan uchinchi shart ham qiziqarli va hayajonli boʻldi. Tezkorlik va topqirlik talab qilinuvchi bu shartni oʻquvchilar aʼlo darajada ado etdilar. Har ikkala jamoa aʼzolari matematik terminlarni koʻproq oʻylab topishga urinib, bir-biridan ortda qolmaslikka harakat qildilar.

Odatda maktabdagi dars mashgʻulotlarida aynan bir mavzu yuzasidan oʻquvchilarga darslik doirasida bilim beriladi. Agar  oʻqituvchi ijodiy izlanib, ixtisosligiga doir qoʻllanmalarni, yangiliklarni oʻqib borsa, bolalarga ham mavzu yuzasidan kengroq tushuncha, koʻproq maʼlumotlar bera oladi. Bunday bilimlar turli bellashuvlarda oʻz samarasini koʻrsatadi.

Aynan mazkur tadbirdagi shartlarning barchasida, ayniqsa, geometrik figuralar yasashda oʻquvchilarning aniq fanlar yuzasidan chuqur bilim olayotganliklari ayon boʻldi.

Buni bellashuvni xolis baholab borgan hakamlar ham alohida taʼkidlab oʻtishdi.

“Ajoyib matematika!” Tadbir nomi bunday nomlangani ham bejiz emas. Darhaqiqat, bu bellashuv ham ajoyib, qiziqarli va hayajonlarga boy boʻldi. Shu bilan birga nafaqat bellashuv qatnashchilarining, balki boshqa oʻquvchilarning ham matematikaga doir bilimlarni yanada boyitdi.

O.RAJABOVA.