Ingliz tili fanidan noanʼanaviy usulda namunaviy ochiq dars oʻtkazildi

Mamlakatimizda chet tillar, ayniqsa, ingliz tilini oʻrganish davlat siyosati darajasiga koʻtarildi. Bugungi kunda maktabgacha taʼlim, maktab, oliy taʼlim muassasalarida ingliz tilini dunyo talablariga javob beradigan darajada oʻqitish asosiy vazifalardan biriga aylandi. Chunki til bilgan – el biladi. Ilm-fani, sanoati yuksak rivojlangan Xitoyda ingliz tilini oʻrganganlar va inglizcha soʻzlasha oluvchilar soni  100 million nafardan ortiq ekan.

Bu, albatta, oʻz-oʻzidan Xitoyning bugungidek darajaga yetishida ingliz tili qanchalik katta rol oʻynaganini koʻrsatadi.

Tumanimizdagi 55-sonli maktabda shu yil 12-mart kuni ingliz tili oʻqituvchisi Barchinoy Sobirovaning noanʼanaviy usulda oʻtkazgan namunaviy ochiq darsi muqaddimasida oʻquvchilarga bu haqda batafsil maʼlumot berildi, tilni oʻrganish borasida zamonaviy axborot-kommunikatsion texnologiyalarining roli batafsil tushuntirildi.

“Qanday qilib plagiatlikning oldini olish mumkin” deb nomlangan ushbu namunaviy ochiq darsni maktab oʻqituvchilari, maktab direktorining oʻquv ishlari boʻyicha oʻrinbosari Dilfuza Oʻrozboyeva, uslubbirlashma raisi Oysuluv Omonova, ingliz tili fani oʻqituvchilari Nazokat Ollamberganova, Shahodat Qurbonova, maktab direktorining maʼnaviy-maʼrifiy ishlar boʻyicha oʻrinbosari Bahrom Hikmatullayevlar kuzatib, tahlil qilib bordilar.

Muallim mazkur darsida mavzu yuzasidan oʻquvchilarga toʻla tushuntirish berishga intildi. Dars axborot-komunikatsion texnologiyalar vositalaridan foydalanilgan holda oʻtildi va oʻqituvchi maʼruzasidagi eʼtiborli jihatlar elektron doskada oʻz ifodasini topdi. Mavzu taqdimoti tugagach, pedagog guruh boʻlib ishlash metodidan foydalangan holda oʻquvchilarni guruhlarga ajratdi va mavzuni mustahkamlash uchun savol-javob usulidan foydalanib, mashqlar bajarishga jalb etdi.
Namunaviy ochiq darsni oʻquvchilar qay darajada oʻzlashtirganliklarini aniqlash maqsadida ogʻzaki savol-javoblar ham amalga oshirildi. Bunda oʻquvchilar Hamida Qoʻchqorova, Islombek Koʻklanboyev, Umida Erdosheva, Azamat Kenjayev, Nodirbek Ahmedovlar faol qatnashdilar va oʻzlarining bilimdonligini, zukkoligini yaqqol namoyish etdilar.

Namunaviy ochiq dars kuzatuvchilari dars soʻnggida Barchinoy Sobirovaning noanʼanaviy usulda oʻtgan ushbu darsida mavzu toʻliq ochib berilganligini, mashgʻulot davomida oʻquvchilarning eʼtiborini torta olganligini va yaxshi oʻzlashtirishlariga erishganligini, bu savollarga oʻquvchilarning dadil va aniq javob berishga intilganlarida namoyon boʻlganligini taʼkidladilar. Va yana taʼkidlandiki, dars jarayonini oʻquvchilar uchun qiziqarli mashgʻulotga aylantirish oʻqituvchi mahoratini belgilaydi.

Ingliz tili dunyo ilm-fanini oʻrganish sari yoʻl ochadigan muhim vosita ekan, uni oʻquvchi-yoshlarga puxta oʻqitish, oʻrgatish ham dolzarb vazifalar. Bu yoʻlda eng samarali usullardan foydalana olish ham muhim.

Aytish mumkinki, bu borada 55-sonli umumiy oʻrta taʼlim maktabida amalga oshirilayotgan ishlar ibratga loyiq.

O.RAJABOVA.